ژبەر هەبوونا قەیرانا و بێكاریێ گەنج پتر هزرا نەرێنی دكەن

ژبەر هەبوونا قەیرانا و بێكاریێ گەنج پتر هزرا نەرێنی دكەن

4

بێوار حەمدی:

ل دووڤ وان ڤەكۆلینێن هاتینە ئەنجام دان دیاركریە كۆ ب ڕێژەیا 80٪ هزركرنا نەرێنی كارتێكرنا خۆ ل سەر ساخلەمیا مرۆڤی هەیە، دەرونناسەكی ژی گۆت: د نوكە دا ژ ئەگەرێ هەبونا قەیرانا و بێكاریێ و نەبوونا دەلیڤێن دامەزراندنێ، پتر بێهیڤیبون ل دەڤ گەنجا دروستكریە و بویە ئەگەر كۆ گەنج هزرا نەرێنی بەردەوام بكەت.

شێرزاد خۆرشید، دەرونناسە د دیدارەكێ دا بۆ رۆژناما ئەڤرۆ دیار كر، هزركرن كریارەكا مێشكی یە و ل دەڤ هەمی مرۆڤان هەیە، ئەڤ هزركرنە كارتێكرنێ ل هەست و سۆز و ڕەفتارێن مرۆڤی دكەت و جاران دبیتە ئەگەرێ كەیفخۆشیێ و جاران ژی یێ تۆڕەبونێ و گۆت (ب شێوەیەكێ گشتی هزرا نەرێنی ژ تڕس و دوودلیێ و نە ئارامیەكا زێدە دروست دبیت د ژیانێ دا، یان ب تایبەت د نۆكەدا ئەگەر گەنجەك نەگەهیتە وێ ئارمانجێ یا بۆ خۆ دانای دێ ئەڤ هزركرنا نەرێنی ل دەڤ پەیدابیت).
دەرونناسی د بەردەوامیا ئاخفتنا خۆدا گۆت: د بەرێ دا ژیانا خەلكی هەموویان یا ئاسای بوو و پێكڤە كاردكر دا بشێن پاریێ ژیانی دابین بكەن، بەلێ د نۆكە دا گەنجێ مە پتر هزرا داهاتۆیێ خۆ دكەت، ژ بەر كۆ چ ژ چارەنڤیسێ خۆ نزانیت، هەر ژبەر هندێ ژی پتر تووشی دوودلیێ و خەمۆكیێ دبیت و گۆت (ب تایبەت د نۆكە دا ژبەر هەبوونا قەیرانا و نەبوونا كاری و دامەزراندنێ وەكریە پتر بێ هیڤیبون ل دەڤ گەنجان دروست ببیت و هزرا نەرێنی ل دەڤ پەیدا ببیت).
شێرزادی ئەو چەندە ژی دا زانین، ل دووڤ وان ڤەكۆلینێن هاتینەكرن دیاربوویە كۆ ب ڕێژەیا 80٪ هزرا نەرێنی كارتێكرنێ ل سەر ساخلەمیا مرۆڤی دكەت، بۆ نموونە دبیتە ئەگەرێ (خەمۆكیێ، قولونێ، ب تنێ بوونێ) و گۆت: دا كو گەنج ژ هزركرنا نەرێنی ڕزگارببیت، پێدڤی یە هەردەم ڤان كارا بكەت (هەردەم سۆپاسیا خۆدایێ مەزن بكەت ژ بۆ هەر خۆشی و نەخۆشیەكێ، كەسایەتیا خۆ بهێزبێخیت و ب دروستی خۆ بنیاسیت، بەردەوام وەرزشێ بكەت، خۆ ژ كەسێن ڕەشبین و نەرێنی دووربكەت).

کۆمێنتا تە