ژ ئەگەرێ بوردومانێ زیانێن مەزن گەهشتینە خانیێن گوندێن نهێلێ
ئامێدیێ، مەحمود نهێلی
ژ ئەنجامێ بوردۆمان و توپبارانكرنا چیایێ مەتینا كو دكەڤیتە هنداڤی دەڤەرا نهێلێ ل سنورێ ناوچەدار یا دێرەلۆكێ و چەندین گوندان ب خوە دگریت، وەك ئاكنجیێن ڤان گوندان ددەنە دیاركرن كو پرانیا خانیێن وان خراب بووینە و دەرز كەفتینێ، ئەڤە زێدەباری سۆتنا رەز و باغێن وەلاتیان و دارستان و ژینگەها دەڤەرێ ژ ناڤ چوویە.
ل دووڤ گۆتنێن ئاكنجیێن دەڤەرێ ئەڤە هەیاما هەشت سالایە بوردۆمانا فرۆكێن لەشكەرێ توركیا بۆ سەر دەڤەرێ دژوار بوویە و ب تایبەتی ژی د ڤان شەش سالێن داویێ دا كو رۆژانە پتر ژ 10 جاران گوندەوارێن دەڤەرا ئامێدیێ ب تایبەتی ژی ل دەڤەرا نهێلێ دهێنە بوردۆمانكرن و ب شەڤ و رۆژ شەر یێ بەردەوامە.
هەڤال بركاهینی ئاكنجیێ گوندێ بلاڤە ل سنورێ دەڤەرا نهێلێ بۆ رۆژناما ئەڤرۆ دیاركر، ئەڤە هەیاما چەند سالایە بەردەوام دەوروبەرێن گوندێ وان دهێتە بوردۆمانكرن و گۆت: ژ ئەنجامێ ڤێ بوردۆمانێ زیان گەهشتینە خانی و رەز وبیستانێن وانا و ئاشكرا كر، رۆژ هەیە پتر ژ 10 جاران ژی چیایێ هنداڤی گوهەرز و بلاڤە دهێتە بوردومانكرن و نوكە وەك بەرنامەیەكی رۆژانە دهێتە بوردۆمانكرن و و هندەك موشەك هند دمەزنن ژ بەر دەنگێ وان خانیێن مە د هەژیێن .
تەكەز كر، ڤێ بوردۆمانێ ئەنجامێن خراب ل پاش خوە هێلاینە و زیانێن زۆر ژی گەهاندینە خەلكێ دەڤەرێ و گۆت: ژبلی سۆتنا رەز و باغێن وەلاتیان و پیسكرنا ژینگەهێ، ژ بەر دەنگێ بوردۆمانێ هژمارەكا زۆرا خانیێن گوندێ وان دەرز كەفتینێ و بەر ب هەرفینێ نە.
وەلاتیەكی دی یێ گوندێ بلاڤە بۆ رۆژناما ئەڤرۆ دیار كر، رۆژ نینە و شەڤ نینە هەكە دەنگێ شەری و بوردۆمانێ نەهێتە گوندێ وان و گۆت: ژ ئەنجامێ ڤێ بوردۆمانێ دەرزێن مەزن كەفتینە خانیێ وان و بەشەك ژی لێ هەرفتیە و بەرف ژ ناڤچوونێ یە.
ناڤهاتی دیاركر، گەلەك جاران ئەو یێ ل سەر خوارنێ و ژ بەر دەنگێ وان موشەكێن ب وی چیایێ هنداڤی مالا وان دكەڤن و پرتێن چیمەنتوی و سەبێ دكەڤنە ناڤ خورانا وانا.
ناڤهاتی هیڤی ژی خواستن كو رادەیەك بۆ ڤان بوردۆمانان بهێتە دانان بو وێ یەكێ ئەو ژی بشێن ب ئارامی ل سەر گوندێن خوە ژیانا خوە دەرباز بكەن خوە نوكە ئەو نەشێن 100 میتران ل گوندی دوور بكەڤن.
وەلاتیەكی دی یێ ناوچەداریا دێرەلۆك ل گوندێ گوهەرز بۆ رۆژناما ئەڤرۆ دیاركر، ژ ئەنجامێ توپباران و بوردۆمانێن سوپایێ توركیا بو سەر دەڤەرا وانا زیانێن زۆر گەهشتینە رەز و باغێن وەلاتیان و گۆت: بەری چەند رۆژان چەند توپ دەوروبەرێن گوندێ وانا داینە و بووینە ئەگەرێ سۆتنا رەز و باغێن وەلاتیان .
هەروەسا وەلاتیەكی بەرێ گارێ دیار كر، ئەڤ سالە فرۆكێن توركیا چەندین جاران دەڤەرا وان بوردۆمانكریە و بارا پترێ ژ دەڤەرا وان ژی هاتیە سۆتن و گۆت: ڤێ بوردومانێ زیان گەهاندینە راز و باغێن وان و زێدەباری خرابكرنا چەندین خانیێن وەلاتیان.
ناڤهاتی داخواز كر، رادەیەك بۆ ڤێ بوردۆمانێ بهێتە دانا بۆ وێ یەكێ ئەو ژی بشێن قەستا گوندێن خوە بكەن وتایبەتی ژی نوكە وەرزێ دەرامەتی یە.
