ژ بەر کارێ من یێ هونەری ئەز وەکو ئیلهامبەخشا سالێ هاتمە دەستنیشانکرن
دلۆڤان هالۆ:
دیزاینەرا جلوبەرگێن کوردی لارا دزەیی د دیدارەکێ دا بۆ ڕۆژناما ئەڤرۆ دیارکر کو گۆڤارا گلادیس یا ئەمریکی ئەز وەکو دیزاینەرا جلوبەرگێن کوردی ب ئێك ژ 25 ئیلهام بەخشێن کەسایەتیێن جیهانێ یێن سالا 2025 دەستنیشان کرم، و ئەز بڤێ چەندێ یا کەیف خوەشم، و ئەڤ چەندە ژی ژ بەر وێ چەندێ یە کو ژ بەر کارێ من یێ هونەری کو دیزاینکرنا جلوبەرگێن کوردی و کلاسیکە و تێکەلکرنا وێ لگەل مودێدلا هەڤچەرخ، و گەهاندن و دانە نیاسینا کەلتورێ کوردی ب جیهانێ.
ناڤهاتیێ ئاماژە ب وێ چەندێ ژی کر کو گۆڤارا گلادیس گۆڤارەکا وەرزانە یا ئەمریکی یە، سالانە لیستەکا ناڤێن کەسایەتیێن کاریگەر بەلاڤ دکەت ژ بۆ ڕێزگرتنێ ل خودان کار و هونەرمەند و ئەکتەر و کەسێن دبنە ژێدەرێ ئیلهامێ، بۆ ئەڤ سالە ژی ئەز وەکو نوونەرا کەلتور و هونەرێ کوردی ڤێ گوڤارێ لاپەرێن درێژ و بەرفرەهـ یێن گۆڤارێ بۆ من تەرخان کرینە.
گۆت ژی:»ئەز کچا هونەرمەندێ مەزن یێ کورد هۆمەر دزەیی مە، و ل باژێڕێ ڤیەننا پایتەختێ نەمسا ژ دایکبوویمە و ل ئەمریکا مەزن بوویمە، ئەز هەلگرا باوەرناما بەکالۆریوسێ مە ب بسپۆریا پەیوەندیێن ناڤدەولەتی ل زانکۆیا جۆرج مەیسن، ئەز چەندین زمانان دزانم وەکو زمانێ ئینگلیزی و فارسی و عەرەبی و ئەلمانی».
زێدەتر ژی گۆت:» بۆ دەمێ 25 سالان من ل کەرتێ نەفت و گازێ دا کار کرییە، لێ پشتی هینگێ من بڕیار دا بەرەف ئارەزووا خوە یا ڕاستەقینە بچم و ژیانا خوە بۆ دیزاینکرنا جلوبەرگێن کوردی ب شێوازێ کلاسیك و مۆدێرن تەرخان بکەم، ئەڤ گۆهۆڕینا مەزن ئێکە ژ وان ئەگەرێن کو کارتێکرن ل من کری کو ئەز وەکو کەسایەتیەکا ئیلهام بەخش بهێمە نیاسین».
