ڤێ هەیڤێ دێ پیشانگەهەكا گەشت و گوزاری ل دهۆكێ هێتە ڤەكرن
دیدار، سالار محەمەد دۆسكی:
سەرۆكێ ژوورا بازرگانی و پیشەسازیا دهۆكێ دیار كر، د ڤێ هەیڤێ دا دێ پیشانگەهەكا گەشت و گوزاری هێتە ڤەكرن، ب مەرەما خورتكرنا بزاڤا گەشتیاری ل پارێزگەهێ و هەموو بزاڤ دهێنەكرن سیستەمێ ژوورێ ببیتە ئەلكترونی و زێدەتر مفا ژ دەمی بهێتە وەرگرتن و گۆت: دڤێت پشتبەستنێ ل سەر كەل و پەلێن خوەیێن ناڤخوە بكەین و بازرگانێن مە ئەو شیان هەنە دشێن ڤان كارا بكەن.
شوكری جەمیل نوری، سەرۆكێ ژوورا بازرگانی و پیشەسازی یا دهۆكێ د دیدارەكێ دا ل گەل رۆژناما ئەڤرۆ گۆت: ل رێكەفتی 7/1/2024 جڤاتا نوویا ژوورا بازرگانی و پیشەسازی دەست ب كارێ خوە كریە، هاتنا مە بۆ ڤێ ژوورێ دێ تەمامكرنا كار و ئەركێ هەڤالێن بوری بیت، لێ گومان نینە هەر گرۆپەكی یان جڤاتەكێ پلان و بەرنامێن خوەیێن نوو هەنە و ئەم ژی دێ ل دووڤ وێ پلان و بەرنامێ ئەم ڤەكۆلینێ ل سەر دكەین دێ كاری ل سەر كەین، جڤاتا نوو ژ (11) كەسان پێك دهێت، ئەڤ كەسە هەموو گەنج و لاون و ژ كەسانێن خودان باوەرنامە نە و بازرگان و خودان سەربورن و مە هیڤی هەنە بشێین خزمەتەكێ پێشكێشی تەخا بازرگانا ل پارێزگەها دهۆكێ بكەین.
سەرۆكێ ژوورا بازرگانی و پیشەسازی ئەو ژی گۆت: وەك پلان نوكە كاری ل سەر دكەین سیستەمێ دیجیتال كو زەمان زەمانێ پێشكەفتنێ و زانستی یە و ئێدی نڤیسار ببنە ئەلكترونی و رۆتین كێم بیت، چونكو ل سەر ئاستێ هەموو جیهانێ دەم تشتەكێ گەلەك گرنگە و هەموو بزاڤێن مە ئەون سیستەم ل ژوورا بازرگانی ببیتە ئەلكترونی و هەموو كار ئاسانی بۆ بازرگانێن مە بهێنە خوشكرن. دیسا مە چەند چالاكی ئەنجامداینە و مە پشكداری چەند بزاڤێن ئابووری كریە ل سەر ئاستێ پارێزگەها دهۆكێ، د بەرنامێ مە دایە وەك ژوورا بازرگانی و پیشەسازی كار ل سەر لایەنێ زانستی و ئەكادیمی بكەین كو بازرگانا بینین و بەرنامەكێ جوانێ دارێتی بهێتە دانان بۆ خوشكرن و خۆرتكرنا بزاڤا بازرگانی ل پارێزگەها دهۆك، دیسا مەرەم ژ نێزیكبوونا مە ل گەل بازرگانا گلە و گازندێن وان چنە و ئاستەنگێن د كەڤنە د رێیا بازرگانا دا چنە و چ پلان و بەرنامە هەنە و زێدەتر مە بنیاسن و هەست پێ بكەن ژوورا بازرگانی مالا وانە.
سەرۆكێ ژوورا بازرگانی و پیشەسازی ئەو ژی ئاشكراكر، نێزیكی هەشت هزار ناسناما هەنە و ب ڤێ هژمارێ ئەندامێن ژوورا بازرگانی گەلەكن و دابەشكرینە ل سەر خودانێن (كومپانی، كارگەه، خودانێن پیشانگەها، نڤیسینگەهێن ئەرد و خانیا)، هەموو ئەندامێن ڤێ ژوورێ نە و ئەڤە جهێ وانە و هەمی بزاڤ و كارێن مە ئەون ل پاشەرۆژەكا نێزیك دا بشێن پەیوەندیێن باش ل گەل ڤان تەخێن مە ئاماژە پێكری خورترلێ بكەین، ژ ڤێ رێژا مە ئاماژە پێكری رێژەكا باش یا ئافرەتان هەیە و هەمی بیاڤێن بازرگانی دا دەستێ ئافرەتێ تێدا هەیە.
ناڤبری گۆت: جوگرافی یا باژێرێ دهۆكێ بۆ بزاڤا بازرگانی گەلەك یا گونجایە ل سەر ئاستێ دەڤەرێ و ئیراقێ و دڤێت ئەم بزانین دێ چەوا شێین ڤێ بزاڤێ خورتر لێ كەین، دڤێت گۆرەپانەكا ئالۆگوریا بازرگانی بهێتە دروستكرن و زێدەباری دروستكرنا هندەك ئومبارێن مەزن كو بازرگانێ مە ل دهۆكێ پشتبەستنێ ل سەر وان ئومباران بكەت و دڤێت ئەڤە دناڤبەرا مە و ئیراقێ دا بهێنە دروستكرن و ئەڤە ل هەموو جیهانێ هەنە.
سەرۆكێ ژوورا بازرگانی و پیشەسازی یا دهۆك ئەو ژی گۆت: هەموو رێكارێن خورتكرنا بزاڤا ئابووری ل كوردستانێ ل بەر دەستن، لێ ئاستەنگا ئەڤرۆ د رێیا بازرگانێ مە دا ئەوە بارێ ئابووریێ ل سەر خەلكێ كوردستانێ یە و نەبوونا مووچان و گڤاشتنێن سیاسی ل سەر كوردستانێ و ئەگەر كاودانێن ئابووری و تایبەت دانا مووچان باش بیت مە باوەری ب بازرگانێن خوە هەیە كو پەیوەندیێن باش ل گەل ناڤەراست و باشورێ ئیراقێ و هەتا دەرڤە ژی هەنە دێ خورتر لێ هێت و گەشێ كەت.
سەرۆكێ ژوورا بازرگانی ئەو ژی گۆت: مە ل كوربەندێ ئابووری ژی دا ئاشكراكر بوو كو ئەم پشتەڤانین و داخوازێ ژ حوكمەتا هەرێما كوردستانێ دكەین كار بكەن بۆ پشتەڤانیێ ل وەبەرهێنەرێ ناڤخو ب دانانا كارگەها و زێدەبوونا دەلیڤێن كاری بۆ گەنجان بهێنە خورتكرن و دڤێت باوەری بهێـتە دروستكرن و ژ ڤێ خالێ دەست پێ بكەین، ژێرخانا ئابووری گەشە و ئاڤا بكەین و ئێدی هوسا كار بكەین مە پێدڤی ب كەل و پەلێن دەرڤە نەبیت و هەر چو نەبیت رێژەك بهێتە دەسپێكرن و هەتا 10% ژی بیت و ب تنێ دڤێت پشتبەستنێ ل سەر كەل و پەلێن خوەیێن ناڤخوە بكەین و بازرگانێن مە ئەو شیان هەنە دشێن ڤان كارا بكەن.
سەرۆكێ ژوورا بازرگانی و پیشەسازی یا دهۆك ئەو ژی گۆت: ژ مێژە كارێ ل سەر دروستكرنا كارگەهان دهێتەكرن و ل پارێزگەها دهۆك (كانیا سپی) ل قەزا سێمێلێ كارێ ل سەر دهێتەكرن و جهەكێ تایبەتە بۆ كارگەهێن خوارنێ و ل نێزیك دێ بەرهەمێ وێ دیاربیت.
ناڤبری ئەو ژی ئاشكراكر، نوكە ژ كارێن دەستپێكی ئەوە دروستكرنا پەیوەندیانە ل گەل هەموو ژوورێن بازرگانی ل سەرانسەری ئیراقێ و وەلاتێن دەردور و هەتا وەلاتێن زلهێز ژی و هەتا ل گەل جیهانا عەرەبی و سەرانسەری جیهانێ و هەموو كار و بزاڤێن مە ئەون بزاڤەكا دی یا مەزنتر ل دهۆكێ بهێتەكرن كو خزمەتا خەلك و باژێرێ مە بهێتەكرن و دیسا یێ بزاڤا دكەین نێزیكترین دەم پێشوازی یا هندەك شاندا بكەین و رێیا بۆ خۆش بكەین بهێنە باژێرێ مە هندەك كارێن وبەرهێنانێ بكەن و بەرۆڤاژی رێكخستنا هندەك شاندا ل دهۆكێ بۆ دەرڤە و ئینانا هزر و شارەزیا دەرڤە بۆ ناف كوردستانێ و تایبەت باژێرێ دهۆكێ، هەموو بزاڤێن مە ئەون بزاڤا ئابووری تێكەلی زانستی و ئەكادمی بكەین و كەسانێن خودان سەربور و هەلگرێن زانستی تێكەلی بزاڤا بازرگانی بكەین و ل گەل روونە خوار و رێكارێن زانستی بهێنە رۆنكرن بۆ خوشكرنا بزاڤا ئابووری دا بازرگانێ مە بشێت كاراتر كار بكەت و زێدەتر باوەری بۆ بهێتە دروستكرن.
سەرۆكێ ژوورا بازرگانی و پیشەسازی یا دهۆك ئەو ژی گۆت: هەمی بزاڤ و كارێن مە ئەون ل گەل زانكۆیێن باژێری هندەك ڤەكۆلینا بكەین و هندەك داتا بۆ مە بهێنە دیاركرن كو كار ل سەر بكەین و پلان و بەرنامەی بۆ دانین و دێ شێین چەوا خەلكی هاندەین ل جهێ كاركەرێ بیانی كاربكەت و مە كاركەرەكێ زۆر یێ بیانی ل كوردستانێ هەیە و دێ بۆچی جهێ كاركەرەكێ نافخوە گریت، بەلكو باشترە كارەكێ مە یێ ناڤخوە كاربكەت و ب ڤی رەنگی دێ بازارێ مە باشتر و خوشتر لێ هێت.
سەرۆكێ ژوورا بازرگانی و پیشەسازی ئەو ژی دیار كر، د ڤی ماوێ كێم دا مە چالاكیەك ل گەل رێڤەبەریا گەشت و گوزارێ‌َ ئەنجامدا ب وێ مەرەمێ بزاڤا ڤی كەرتی بهێتە خورتكرن و پێكڤە كار بكەین بۆ خورتكرنا بزاڤا كەرتێ گەشتیاری و ئینانا گەشتیارێن بیانی بۆ پارێزگەها دهۆك و ئەڤە جارا ئێكێ بوو ئەڤ كارە بهێتەكرن و ئەگەر بزاڤا گەشتیاری خورت بوو، دێ هەموو تەخ و چین قازانجێ كەن، دڤێت ڤەژینەك بۆ رەوشا گەشتیاری بهێتەكرن و زێدەتر گرنگی پێ بهێتەدان چونكە دەڤەرا مە گەلەك یا هاریكارە بۆ ڤێ بزاڤێ، د بەرنامێ مە دایە كار ل سەر گەشەكرنا گەشت و گوزارا ساخلەمی بكەین و پارێزگەها دهۆكێ گەشتەكا باش ژ روویێ ساخلەمیێ ڤە بخوە ڤە دیتی یە و كار دكەین رێكەفتی 28/2/2024 پیشانگەها نیڤ دەولەتی ل دهۆك بهێتەڤەكرن و ئەڤە بۆ پێشخستنا كەرتێ گەشت و گوزارێ یە.
ل دووماهیێ سەرۆكێ ژوورا بازرگانی و پیشەسازی یا دهۆك گۆت: داخوازێ ژ بازرگانێن دهۆكێ دكەم سەرەدانا ژوورا بازرگانی بكەن بۆ گەهاندە گلە و گازندە و پێشنیارێن خوە و ئەم ل ڤێرەینە بۆ خزمەتكرنا بازرگانێن خوە و هەموو بزاڤ و رێكارێن مە ل گەل بازرگانێن مە ئەون بشێن بزاڤا ئابووری ل باژێرێ خوە خورترلێ بكەین.
