کورد ل هەموو جیهانێ پشتەڤانیێ ل بەرخوەدانا هەر دو تاخێن کوردان دکەن
ئێرشێن چەکدارێن جۆلانی ل سەر هەر دو تاخێن کوردان ل حەلەبێ بەردەوامن و کورد ل هەموو جیهانێ پشتەڤانیا خوە بۆ بەرخوەدانا هەر دو تاخێن حەلەبێ دیار دکەن و داخواز ژ جڤاکێ نێڤدەولەتی دکەن رێ ل ئێرشێن چەکدارێن توندرەو بگرن.
چەند رۆژن چەکدارێن سەر ب جۆلانی ب هەموو شیانێن خوە ئێرشێ هەر دو تاخێن کوردان یێن ب ناڤێ ئەشرەفیە و شیخ مەقسود ل حەلەبێ دکەن و هێزێن ئاسایشا ناڤخوە ژی ب چەکێ سڤک بەرسڤا ئێرشان ددەن، لێ ژ بەر کو کۆمێن چەکدار ب چەکێ گران ئێرش دکەن هەتا نها گەلەک وەلاتیێن سڤیل ژی بووینە قوربانی و هەروەسا ئێرشی نەخوەشخانەیا ل تاخێن کوردان ژی هاتیە کرن و ئەو یەک بوویە ئەگەرێ روودانا کارەساتێن مرۆڤی.
د ڤێ دەربارێ دا دەم پارتی د داخویانیەکێ دا دیار کر، یا نها ل حەلەبێ ل دژی کوردان دهێتە کرن کۆمکوژیە و مخابن جیهان ل هەمبەر زۆلم و زۆرداریا دەستهەلاتا شامێ بێدەنگە، شام ب پشتەڤانیا تورکیا دڤێت کوردان ژ تاخێن وان دەرخینیت، کورد ژی ل هەمبەر زۆرداریێ خوەراگرن و مخابن هەتا نها گەلەک وەلاتیێن سڤیل شەهید کەفتینە و گەلەک ژی بریندارن، چەکدارێن سەر ب تورکیا ب هەموو چەکێ گران ئێرش دکەن و هەتا ئێرشی نەخوەشخانێ ژی دکەن، ئەو یەک تاوانەکا مەزنە و دڤێت جڤاکێ نێڤدەولەتی ل هەمبەر تاوانێن دەرحق گەلێ کورد ل حەلەبێ دهێتە کرن بێدەنگ نەمینیت.
دەم پارتی ئەو یەک ژی دیار کریە یا نها ل حەلەبێ ب پشتەڤانیا تورکیا دهێتە کرن دێ بیتە ئەگەرێ ژناڤچوونا قووناغا ئاشتیێ و دڤێت تورکیا دەست ژ دوژمناتیا کوردان بەردەت و رێگریێ ل شەڕێ نها ل حەلەبێ بکەت.
ل ئالیێ دی ل هەر چار پارچەیێن کوردستانێ و ل گەلەک وەلاتێن جیهانێ ژی کوردان ب رەنگێن جودا جودا پشتەڤانیا خوە بۆ بەرخوەدانا کوردان ل هەر دو تاخێن کوردی ل حەلەبێ دیار کرن و داخواز ژ ئەمریکا، ئێکەتیا ئورۆپا و نەتەوەیێن ئێکگرتی ژی کرن کو ل هەمبەر کوشتنا وەلاتیێن سڤیل یێن کورد ل حەلەبێ بێدەنگ نەمینن و شەڕی بدەنە راگرتن.
چاڤدێرێن سیاسی ژی دیار دکەن، هەلوەستێ ئەمریکا و وەلاتێن ئێکەتیا ئورۆپا ل هەمبەر ئێرشێن ل سەر هەر دو تاخێن کوردی وەسا کریە چەکدارێن جۆلانی زێدەتر رژد بن و ئێرشێن خوە دژوار بکەن، کوردان د شەرێ ل دژی داعشێ دا گەلەک قوربانی داینە و دڤێت ئەمریکا و هەڤپەیمانیا نێڤدەولەتی یا شەڕێ ل دژی داعشێ رێگریێ ل ئێرشێن چەکدارێن توندرەو ل سەر گەلێ کورد بکەن، چونکی یا نها ل حەلەبێ روو ددەت تاوانەکا مەزنە.
