گرێ یێن په‌ریزادێ ل ناڤ ئافره‌تان پترن
بەرپەرێ ساخلەمیێ:
د. ئحسان سالح، تایبه‌تمه‌ندێ نشته‌رگه‌ریێن گشتی ل ئاكرێ بۆ ئه‌ڤرۆ دده‌ته دیاركرن كو ئه‌ڤ گرێ یێن دناڤ په‌ریزادێ دا چێدبن، تایبه‌تی ل ده‌ف كه‌سێن مه‌زنن، به‌لێ ل ده‌ف ژنان چار جاران پترن ژ زه‌لامان، ئه‌م وه‌كو نۆشدار دووڤچوونا وان گرێیان دكه‌ین، چونكی دبیت نه‌خۆشیا په‌نجه‌شێرێ بیت، هه‌ر 100 كه‌سان دبیت 4 ژوان ببیته نه‌خۆشیا په‌نجه‌شیرێ، زوربه‌یا جاران نه‌خۆش نزانیت.
سه‌باره‌ت ئه‌گه‌رێن په‌یدابوونا ڤان گرێیان دكتوری گۆت: گه‌له‌ك ئه‌گه‌رێن هه‌ی بۆ په‌یدابوونا ڤان گرێیان وه‌كی (جگاره كێشان، بۆماوه‌ی، نه‌بوونا ماددێ ئایودین) كارتێكرنێن خوه یێن هه‌ین ل سه‌ر په‌یدابوونا ڤان گرێیان، ئه‌ڤ گرێیه ژی دناڤ ئافره‌تان دا پترن ل ناڤ زه‌لامان دا، ئه‌وژی ژبه‌ر كارتێكرنا دوگیانیێ و هورمونێ(ئستروجین)، به‌لێ ده‌ف زه‌لامان ئه‌ڤ گرێیه كێمتر به‌لێ دژوارترن.
ئاماژه دا وێ چه‌ندێ ژی كو ئه‌ڤ گرێیه ژی ل ده‌ف كه‌سه‌كی بۆ كه‌سه‌كێ دی جوداهی یا هه‌ی ل ده‌ف هنده‌ك كه‌سان یا مه‌زنه و هنده‌كان یا ره‌قه، و ئه‌گه‌ر ده‌نگێ وی تێكچوو یان بێهنته‌نگی بۆ چێبوو یان خوارن ب زوری چو خوارێ دگه‌وریێ دا ئه‌م نشته‌رگه‌ریێ بۆ دكه‌ین و وێ گرێ یێ رادكه‌ین، چونكی ئه‌ڤێ پتر گومانا هه‌ی ببیته نه‌خوشیا په‌نجه‌شێرێ، له‌وا باشتره نشته‌رگه‌ری بۆ بهێته‌كرن، به‌لێ به‌روڤاژی ڤێ چه‌ندێ نه‌خۆشێ ئه‌ڤ نیشانه ل ده‌ف نه‌بن پێدڤی ب نشته‌رگه‌ریێ نابیت تایبه‌تی ئه‌گه‌ر گرێ ل 1سم یان 1.5سم كێمتربوو و تیشكا سونه‌رێ یا باش بیت و هه‌ر شه‌ش مه‌هان جاره‌كێ پشكنینا خوه بكه‌ت چ ئاریشه نابن.
گۆت ژی: نابیت نه‌خوش ئه‌ڤێ چه‌ندێ پشت گوهڤه بهاڤێژیت و ب تشته‌كێ سڤك وه‌ربگریت، چونكی ئه‌ڤ چه‌نده دبیت كارتێكرنێ لێ بكه‌ت ل پاشه‌روژێ دا و ببیته نه‌خوشیا په‌نجه‌شێرێ، ل دووڤدا ئه‌گه‌ر به‌لاڤ بیت دێ كارتێكرنێ ل جهێن دی كه‌ت و بۆ نوشداران ژی وی ده‌می چاره‌سه‌ری دێ زه‌حمه‌تر بیت و دێ پتر كارتێكرنا خوه ل سه‌ر وی هه‌بیت.
ل دووماهیێ ژی گۆت: كو ل هنده‌ك ده‌ڤه‌ران ئه‌ڤ گرێیه زورتره ل هنده‌ك ده‌ڤه‌رێن دی تایبه‌ت ده‌ڤه‌رێن وه‌كی ئامێدیێ ده‌ڤه‌ره‌كا بلنده و ئایودین یێ كێمه دناڤ خوارنا وان دا، داخوازا من ژ خه‌لكی ئه‌وه ده‌مێ كه‌سه‌كی هه‌ستپێكر گرێیه‌ك یا ل ده‌ف دروست بووی، پێدڤیه دووفچوونا خوه بكه‌ت و پشكنینێن خوه بكه‌ت و بزانیت داكو زووتر چاره‌سه‌ریا خوه بكه‌ت به‌ری مه‌ترسیا وێ زێده‌تربیت.
