گـەشبینم تورکیا دێ بیتە خـوەدان دستوورەکـێ نوو و دیمـوکـرات

گـەشبینم تورکیا دێ بیتە خـوەدان دستوورەکـێ نوو و دیمـوکـرات

3

سەرۆکێ پەرلەمانێ تورکیا دیار دکەت هەلوەستێ هەموو فراکسیۆنێن ناڤ پەرلەمانی سەبارەت ب دستوورەکێ نوو بۆ تورکیا جهێ دلخوەشیێ یە، ئەو باوەر دکەت دێ تورکیا بیتە خوەدانا ئێک ژ دستوورێن دیموکراتی ل جیهانێ و ئەو یەک دێ بیتە ئەگەرێ چارەسەرکرنا پرانیا ئاریشێن نها یێن تورکیا.

نومان کورتولمیش سه‌رۆکێ په‌رله‌مانێ تورکیا راگه‌هاند کو ئه‌و ژ هه‌لوەستێ پارتێن سیاسی ل په‌رله‌مانێ تورکیا رازیه‌ و گۆت: (ئه‌م ژ دل دخوازین د‌ستووره‌کێ نوو بنڤیسین، ژ به‌ر کو پێدڤیا تورکیا ب د‌ستووره‌کێ سه‌رده‌میانه‌ هه‌یه‌ و ئه‌م دشێین ل په‌رله‌مانی پێکڤه‌ د‌ستوورێ نوو ئامادە بکەین. د ڤێ مژارێ دا هه‌ڤدیتنێن مه‌ ل گەل پارتێن سیاسی ب رەنگەکێ باش بەردەوام دکەن و د ده‌مه‌کێ گونجای دا جارەکا دی ئەم دێ ل گەل هەموو هێزێن سیاسی ل تورکیا کۆمبین، چونکی بابەتێ دستووری گەلەک گرنگە و مە دڤێت هەموو هێزێن سیاسی و رێکخستنێن جڤاکێ سڤیل ل تورکیا د ئامادەکرنا دستوورەکێ نوو دا پشکدار بن، چونکی دستوور یێ هەموو گەلێ تورکیا یە، مە دڤێت دستوورێ نوو ببیتە ژێدەرێ چارەسەرکرنا هەموو پرسێن نها یێن تورکیا).
سەرۆکێ پەرلەمانێ تورکیا هه‌روه‌سا راگه‌هاند ژی کو د هه‌ڤدیتنا ل گەل پارتێن سیاسی دا هاته‌ دیتن کو هه‌موو ئالی دخوازن د‌ستوورێ نها بهێته‌ گوهۆرین، چونکی دستوورێ نها یێ تورکیا نەشێت ببیتە بەرسڤا داخوازیێن خەلکی، گەلەک ئاریشێن نها یێن تورکیا ژی هەنە هەتا دستوورێ نها نەهێتە گوهۆڕین ئەو ژی چارەسەر نابن، ژ بەر ڤێ یەکێ ژی ئەز جارەکا دی دبێژم، کو نها پتر ژ هەر دەمەکێ پێدڤیا تورکیا ب دستوورەکێ نوو و دیموکراتی هەیە و گۆت: (ئه‌ز گه‌شبینم کو دێ هەموو پارت و ئالیێن سیاسی د ئامادەکرنا دستوورەکێ نوو دا هاریکاریا مە کەن، مە نەڤێت چو ئالیەک خوە پاشڤە ڤەکێشیت، چونکی دستوور بۆ هەموو هێزێن سیاسی یە، بۆ هەموو وەلاتیانە، ژ بەر ڤێ یەکێ ژی مە پێ باشە هەموو ئالیێن سیاسی و رێکخستنێن جڤاکێ سڤیل نێرینێن خوە سەبارەت ب دستوورەکێ نوو بۆ تورکیا ئاشکرا بکەن).
سەرۆکێ پەرلەمانێ تورکیا ئەو یەک ژی دیار کر، نابیت هندەک هێزێن سیاسی وەسا هزر بکەن دڤێت دستوور ل گۆر بەرژەوەندیێن وان بیت، چونکی بابەتێ دستووری بۆ هەموو تورکیا یە و دڤێت هەموو ئالی ل گۆر بەرژەوەندیێن گشتی یێن وەلاتی هزر بکەن.
ل ئالیێ دی هه‌تا نها ژی چو بەرپرسەکێ تورکیا سەبارەت ب چاوانیا ئامادەکرنا دستوورێ نوو یێ تورکیا نێرینا خوە دیار نەکرینە، هەتا نها ئاشکرا نەبوویە کا دێ دستوورێ نوو یێ تورکیا ل سەر چ بنەمایەکێ هێتە نڤیسین، هەروەسا پارت و ئالیێن سیاسی یێن کوردی ژی دیار دکەن، دڤێت هەبوونا گەلێ کورد ل تورکیا د دستوورێ نوو دا بهێتە قەبوول کرن و مافێن کوردان ژی بهێتە گەرەنتیکرن، هەکە ئەو یەک نەهێتە کرن ئەو پشکداریێ د ئامادەکرنا دستوورەکێ نوو بۆ تورکیا دا ناکەن.

کۆمێنتا تە