گوندێ زێوە 150 شەهید داینە 47 ژ وان ل هەوا ئەنفالێن رەش بوون
بامەرنێ، سالار محەمەد دۆسكی:
ل هەر دو شۆرەشێن ئیلۆن و گولانێ وەك هەمی گوندێن كوردستانێ گوندێ زێوا شێخ پیرامیس قوربانیێن مەزن داینە، و تایبەت ل هەوا ئەنفالان و ئەڤ گوندە ئێدی بەرنیاس بوویە ب گوندێ شەهیدان.
ئیسماعیل ئەحمەد عەبدولرحیم، پێشمەرگەیێ هەر دو شۆرەشێن ئیلۆن و گولانێ د دیدارەكێ دا بۆ رۆژناما ئەڤرۆ گۆت: ل سالا 1963ێ و ل شۆرەشا ئیلۆنا مەزن ئێكەم شەهیدێ گوندێ زێوێ بناڤێ ( محەمەد عەلی تاها زێوەی) ل سەر بامەرنێ ل گەل (جەمیلێ صورو و ئیسفێ حەیدەری) شەهید بوویە، ئەڤە گوندە بناڤێ گوندێ شەهیدان بەرنیاس بوویە و ئەو كەس دبێژیە ڤی گوندی شەهیدان یێ هەڤالنیا خەلكێ ڤی گوندی كری و ئاگەهی ئێش و ئازار و قوربانی دانا ڤی خەلكی بوویە و ل ئەنفالان سالا 1988 بوویە گوندێ شەهیدان و جیرانێن گوندی زانن كا ڤی گوندی چەند قوربانی دان و شەهیدا داینە سەخمراتی ئازادی و تەناهی یا كوردستانێ.
پێشمەرگەیێ شۆرەشا ئیلۆن و گولانێ هەروەسا گۆت: گوندێ مە ئێك ژ مەزنترین گوندێن كوردستانێ یە یێن قوربانی داین، و ئەڤ قوربانی دانە پشتی گوندێ(گیزێ) ل بەرێ گارەی دهێت، كو ئەوانژی قوربانیێن مەزن داینە و مێژوو شاهدە، و گوندەك ل بەر خابیری هەیە و ئەو گوند یێ برایێن مەسیحی یە و چ كەس ل وی گوندی ژی نەماینە.
هەمان پێشمەرگەی دوپاتكر: ل هەر دو شۆرەشێن ئیلۆن و گولانێ نێزیكی 100 شەهیدان ڤی گوندی داینە و ل هەوا ئەنفالان 46 شەهید داینە، و هەتا شەرێن ناڤخوە ژی پشتی سەرهلدانا پیرۆز ئەڤی گوندی بەهرا شێری هەبوویە، و هەتا ل شەرێ تیرۆرستێن داعش ل سەر مللەتێ كورد سەپاندی گوندێ زێوا شێخ پیراموس سێ شەهید هەبوون .
ئیسماعیل ئەحمەد عەبدولرحیم دیاركر، كو وەك هەمی گوندێن كوردستانێ گوندێ مە گەلەك جاران هاتیە سوتن و هەرفاندن ژلایێ رژێما بەعس ڤە و ئەڤ كارە ناهێتە هەژمارتن و هەر هێزەكا لەشكری یا دوژمنی هاتیە دەڤەرێ قەستا گوندێ مە كریە، چونكە خەباتكەر و خودان شەهید بووینە و بەرەڤانی ژ ئاخا خوە كریە، و ئێكەم گوندێ ل دەڤەرێ هاتیە سوتن گوندێ مەبوو، ل سالا 1963 و 1967 و 1988 هاتیە خرابكرن، بگشتی ل دەڤەرا دۆسكیا چ گوندان وەك گوندێ مە شەهید تێدا نین، و كەسەكێ وەكی گوندێ مە قوربانی نەدایە و گوندێ مە هێلینا پێشمەرگەی و شۆرەشێ بوویە.
پێشمەرگەیێ شۆرەشا ئیلۆن و گولانێ گوت: هاتنا سەركردێ نەتەوا كورد (مەلا مستەفا بارزانی) بۆ دەڤەرێ ل سالا 1961 هاتیە گوندێ زێوا شێخ پیراموس و هاتیە شكەفتا (دو دەر) ل گوندێ كەڤنە وی دەمی ئەم بچووك بووین، و گۆتن هندەك مرۆڤ هاتینە دێ هەوە خون و هەرنە دخانی ڤە، و دەمێ هاتین دەردورێن گوندی گرتن و چەند شەڤ و رۆژان ماینە ل گوندی، و دەمێ چووین شنی دایك و بابێن مە بوومە گۆتن كو ئەڤە بابێ مەزن بارزانی بوو، و پێشمەرگە بوون ل گەل دا و هاتنە دەڤەرا مە و گوندێ مە.
هەمان پێشمەرگە خوەیاكر: خودێ ژێ رازی (مەلا مستەفا بارزانی) مرۆڤەكێ گەلەكێ دلوڤان و دادپەروەر بوو، و دەمێ بوویمە پێشمەرگە ل شۆرەشا ئیلۆنێ و ل هێزا هەلگور ل (قەسر ماكوسێ) ، دەمێ (شێخ ئەحمەد) چوویە بەر دلوڤانیا خودێ مە رێك گرت وەك پێشمەرگە و بابێ مەزن بارزانی هاتە بارزان تازی دانان، و دەمێ زڤرینێ بەرامبەر مە راوستیا و گۆت هەوە خێرە هوون ل ڤێرێ ؟، من نەزانی بارزانی یە و من گۆتێ قوربان ئەم چاڤەرێی هاتنا بارزانیێ مەزنین، گۆت هەرەن بابو و دووڤدا زڤری و هەڤالان گۆت ئەو بارزانی بوو، و چوومە دەستی و دا دەستێ وی ماچی كەم وی دەستێ خوە كێشا و نەهێلا دەستێ وی ماچی كەم، پاشی دەست هاڤێتە بەریكا خوە و (10) دینار ئینانە دەر و گۆت بخوە بدەنە ب گوشت، دەمێ من ژێ وەرگرتین و گۆت هەرنە بارەگایێ خوە.
ئیسماعیل زێوەی هەروەسا گۆت: نوكە ژی هەر چ مال دناڤا گوندێ زێوێ دا نین پێشمەرگەك یان دو پێشمەرگە تێدا نەبن، و هەرمی دبەرهەڤن بەرەڤانیێ ژ كورد و كوردستانێ بكەن، و هەمی لدیف رێباز و خەباتەكا پاقژ دچن و ئەم نەپەشێمانین و ئەم لێ ڤەژی نابین.
محەمەد ئەبو زێد محەمەد هەلبژێرێ گوندێ زێوا شێخ پیرامیس، بۆ رۆژناما ئەڤرۆ گۆت: ژین و ژیارا خەلكێ گوندێ زێوێ زێدەتر ل سەر مووچەی یە و پتریا خەلكێ گوندی پێشمەرگەنە و هەر 15 رۆژا ل دەوامێ و 15 رۆژا ل مالێن خوە نە و ئەڤە ژی ڤەدگەریت بۆ مێژوویا گوندێ زێوێ ل هەر دو شۆرەشێن ئیلۆن و گولانێ و رێژەكا هەرە مەزنا ڤی خەلكی پێشمەرگە بووینە، و هەتا ل هەوا ئەنفالان 47 كەس ژ خەلكێ ڤی گوندی بەر هەوا ئەنفالان كەفتن و ژبلی شەهیدێن سەنگەری كو بگشتی نێزیكی 150 شەهیدان ڤی گوندی هەتا نوكە داینە لەوما ژی ئەڤ گوندە هاتیە نیاسین ب گوندێ شەهیدان.
موختارێ گوندێ زێوێ ل دور رەوشا خزمەت گوزاری یا ل گوندی ژی گۆت: نێزیكی 250 خێزانا ل گوندێ مە دژین و هەر هەمی خەلكێ گوندی نە و گوندێ مە دكەڤیتە سەر ب ناحیا بامەرنێ ڤە ل قەزا ئامێدیێ، چ فەرمانگەهێن حوكمی ل گوندێ زێوێ نین و قوتابخانەكا سەرەتایی مە ل گوندی هەیە و پێدڤی ب نووژەنكرنێ یە و نێزیكی 300 قوتابیان تێدا خوینن و قوتابیێن ناڤنجی و ئامادەیی و زانكۆیێ دچنە شرتێ و بامەرنێ و دهۆكێ بەردەوامیێ دەنە خواندنا خوە و رۆژانە هاتن و چوونێ دكەن، مەداخاز كریە قوتابخانەكا ئامادەیی ل گوندێ مە بهێتە دروستكرن و ئاماژە پێ هاتیەكرن كو بریار ل سەر ڤەكرنا قوتابخانێ هاتیە و هەتا نوكە چ دیارنەبوویە و هەمان دەم مامۆستا ژی رۆژانە هاتن و چوونێ دكەن و هندەك ژی ل خەلكێ گوندی بخونە.
هەلبژێرێ گوندێ ناڤبری زێدەتر رەوشا گوندێ شەهیدان دیاركر كو رەوشا ئاڤێ نە ل ئاستێ پێدڤی یە و تایبەت ل وەرزێ هاڤینێ گەلەك ئاڤا كێمە و دیسا كارەب ژی یا كێمە و پێدڤی یە رەوشا وێ باشتر لێ بهێت و زێدەتر ژێدەرێ ئاڤا ڤەخوارنێ بیرن و دو بیر ل گوندی هەنە و رۆژێ 40 خولەكان ئاڤ دهێت و وەرزێ هاڤینێ 30 خولەكان ئاڤ دهێت بگشتی رەوشا ئاڤێ نەیا باشە و ئەڤ ئاڤە تێرا خەلكی ناكەت، هەمان دەم جادێن گوندی نە ل ئاستێ پێدڤی نە و گرنگە پێداچوون ل رەوشا كولان و جادێن گوندی دا بهێتەكرن.
هەلبژێرێ گوندی ئەو ژی نەڤەشارت و گۆت: ژین و ژیارا خەلكێ گوندی ل سەر چاندنا گەنمی وبیستانا و خودانكرنا تەرش و كەوالی یە و لایێ باكورێ گوندی چیایە و خەلكێ مە نەشێت ژ بەر فرۆك و شەرێن پەكەكێ و توركیا سەرەدانێ بكەت و لەوما چوونا چیایی هاتیە قەدەغەكرن، لەوما داخاز ژ حوكمەتێ دكەین ل گورەی قوربانی دان و ماندیبوونا گوندێ مە زێدەتر خەزمەت تێدا بهێنەكرن و مال نینە ل گوندێ زێوێ قوربانی نەدای.
