گونه‌هه‌كا مه‌زنه چیرۆكا سترانێ بهێته گوهۆڕین
هه‌رهین:
تەها هێتوتی، سترانبیژێ كوچكۆدیوانان د دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ دبێژیت: ب پشتراستی نوزانم من چه‌ند ستران ژبه‌رن، به‌لێ ل یوتوبیێ من یێ تایبه‌ت من نێزیكی شێست و سێ ستران به‌لاڤكرینه، به‌لێ یا باشتر ئه‌وه مرۆڤ سترانێت خوه بنڤیسیت، چونكو مرۆڤ ژبیردكه‌ت و گرنگه هه‌ر هه‌یام هه‌یام مرۆڤ هه‌موو سترانان بێژیت دا كو ژبیر نه‌كه‌ین و هه‌موو ده‌مان بزاڤێ دكه‌م من شێوازه‌كێ جوداتر یی گوتنا سترانێ هه‌بیت و دبنیات دا ستران مرۆڤان یا چێكری و من دڤێت دسترانێ دا هنده‌ك تشت یێ من بیت و ۆ من بیته ناسناڤ و هه‌كه ئه‌ز بوومه كوپیا هنده‌ك ستران بێژن دبیت یا جوان نه‌بیت و من شیان هه‌نه و هه‌كه ئه‌ز تشته‌كی جوداتر بكه‌م دێ پتر ره‌نگڤه‌دانا خوه هه‌بیت.
هێشتا گۆت: سێ جورێن سترانێ لنك من هه‌نه و دشێم بێژم دكوردستانی نه و نه‌شێم د چیروك و سه‌لیقێ ب گوهورم بۆنمونه سترانا (گه‌نج خه‌لیل و لاوكێ مه‌تینی ) ول كیژ یا رچه‌یا كوردستانێ بیت و كی بێژیت نه‌شێت ب گوهوریت و هه‌روه‌كو خوه و هنده‌ك سترانێن دی هه‌نه وه‌كو چیروك گه‌له‌ك یا خوه‌شه، به‌لێ ڤه‌هاندنا وێ یا ب دلێ من نینه و ئه‌ز چیرۆكا سترانێ ناگوهورم گونه‌هه‌كا مه‌زنه و پتر راستڤه‌كرنێ سترانێ دا دكه‌م و دگۆتنا سترانی دا هه‌تا نوكه په‌شێمان نه‌بوویمه و به‌ررۆڤاژی من مفا ژێ دیتیه و ل هه‌رچار پارچێن كوردستانێ من دنیاسن و رێز ل من دهێته‌گرتن و یا ژ هه‌موویێ گرنگتر ئه‌ز یێ خزمه‌تا هونه‌رو چاندا كوردی و ملله‌تێ خوه دكه‌م.
زێده‌ترژی گۆت: ئه‌ز حه‌ز ژ ده‌نگێ خوه دكه‌م و گوهداریا ده‌نگێ خوه ژی دكه‌م و گه‌له‌ك یا پێدڤیه مرۆڤ گوهداریا ده‌نگێ خوه بكه‌ت ژبه‌ركو هه‌رخه‌له‌تیه‌كا مرۆڤ بكه‌ت دێ ئێكسه‌ر زانیت و دوباره ناكه‌ت و باشترین راهێنانه مرۆڤ گوهداریا ده‌نگێ خوه بكه‌ت گۆت: گه‌له‌ك ل دووڤ سترانان دچم و گوهداریا سترانبێژێن كه‌ڤن دكه‌م و بتنێ سترانبێژه‌كی نا وه‌رگرم ژ بۆ زانینا دروست یا چیرۆكێ و هه‌كه مرۆڤ سترانێ ژ كه‌سه‌كی وه‌رگریت دبیت ئه‌و سترانه یا تژی نه‌بیت ژلایێ چیرۆك و په‌یڤا و هه‌كه ژ بۆ زانینا ئێك سترانی مرۆڤی گوهداریا گه‌له‌ك سترانبیچژان كر ل دووماهیی دێ سترانه‌كا دروست ژێ ده‌ركه‌ڤیت.
