گوهۆڕین د رێزبەندیا یانەیێن دهۆک، زاخۆ و ئاكرێ‌ دا پەیدابوون

گوهۆڕین د رێزبەندیا یانەیێن دهۆک، زاخۆ و ئاكرێ‌ دا پەیدابوون

24

ژ چارچووڤەیێ‌ یاریێن حەفتیا چارێ‌ یا خولا پلا نایابا كوردستانێ‌ یا تەپا پێی بۆ یانەیێن پلا نایاب هەلوەستێ‌ پرانییا یانەیێن پشكدار د رێزبەندیێ‌ دا هندەك گوهۆڕینێن بەرچاڤ ب سەر دا هاتن، هەرچەندە هێشتا دەستپێكا خولێ‌ یە، ئەوا هەڤڕكیێن ڤێ‌ گەڕێ‌ ل پێنج شەمب و ئەینییا بوری هاتینە كرن.
یانەیێن دهۆك و زاخۆ پاشڤە چوون
تیما تەپا پێی یا یانەیا دهۆك وەكهەڤییا دویێ‌ د خولێ‌ دا تۆمار كر پشتی بەرانبەر خودانێن ئەردی یانەیا سۆران ب دو گۆلان وەكهەڤبووین و ب خالەكێ‌ رازی بووین، ئەلهۆیێن چیا سەرباری گیرووبوونا بەرهەڤییان شیاییە ژ چار یاریێن ئێكێ‌ سەركەفتنەك، دو وەكهەڤی و خوسارەتییەكێ‌ بینت، ب پێنچ خالان رێزا 12ێ‌ دهێت، مەزنترین رێژا گۆلان ل سەر بوویە ب نەهـ گۆلان و پێنچ گۆلا تۆماركرینە، ژلایێ‌ خوە ڤە تیما یانەیا زاخۆ ژی ب خالەكێ‌ ژ هەولێرا پایتەخت ڤەگەڕیا پشتی بێی گۆل دگەل یانەیا شەقلاوە وەكهەڤبوویی، كوڕێن خابووری رێزا شەشێ‌ دهێت ژ سەركەفتەك و سێ‌ وەكهەڤی شەش خال كۆمكرینە و چو خوسارەتی نەداینە.
ئاكرێ‌ بەردەوامە ل سەر ئەنجامێن باش
تیما یانەیا ئاكرێ‌ بەردەوامی دا ئەنجامێن خوە یێن باش پشتی سەركەفتنا دویێ‌ ل دووڤ ئێك د خولێ‌ دا ئینایی، ئەڤ جارە ژی دگەل مێڤانا خوە یانەیا هەولێر ب گۆلەكێ‌ سەركەفتی، تیما پایتەختێ‌ نەورۆزێ‌ بڤێ‌ سەركەفتێ‌ ژ رێزا نەهـ پێشڤە هاتە رێزا سێیێ‌ ب حەفت خالان ژ دو سەركەفتن، ئێك وەكهەڤی و خوسارەتیەكێ‌، ل دووڤ داخویانیێن بەری نوكە بۆ رۆژنامەیا ئەڤرۆ بەرپرسێن یانەیا ئاكرێ‌ رژدی ل سەر پشكدارییەكا بهێز و هەڤڕكی بۆ رێزبەندییا پێشیێ‌ كرینە.
هندرین هاتە سەرێ‌ لیستێ‌
هەلوەستێ‌ گشتی یێ‌ رێزبەندییا خولێ‌ پشتی ب دووماهی هاتنا گەڕا چارێ‌ بڤی رەنگی یە، هندرین ب هەشت خالان سەرێ‌ لیستێ‌ دهێت، شێروانە و ئاكرێ‌ ب حەفت خالان رێزێن دویێ‌ و سێیێ‌ دهێن، دەربەندیخان، پێشمەرگەیا هەولێر، زاخۆ و برایەتی هەر ئێك ب شەش خالان رێزێن چار بۆ حەفتێ‌ دهێن، دیسان هەر ئێك ژ شەقلاوە، چوارقۆرنە، سیرۆانی نوو، سۆران و دهۆك ب پێنچ خالان رێزێن هەشتێ‌ هەتا 12ێ‌ دهێن، رانیە و هەولێر ب چار خالان رێزێن 13 و 14ێ‌ ل دووڤ ئێكن، سەیدسادق ب سێ‌ خالان رێزا 15ێ‌ و ئارارات ب دو خالان رێزا 16ێ‌ و دووماهیێ‌ دهێت.

کۆمێنتا تە