گۆلان ڤه‌ژاندنا هه‌ستا نه‌ته‌واتیێ بوو
غیاس خالد زێبارى
شۆڕشا گولانێ ئه‌و شۆڕشا كوردستانى بوو ئه‌وا بوویه جهێ حێبه‌تیا دۆست و دوژمنان، چونكى پشتى پیلانه‌كا مه‌زن یا نیڤده‌وله‌تى دژى بزاڤا رزگاریخوازیا كوردستانى و شۆڕشا مه‌زنا ئیلۆنێ ب سه‌رپه‌رشتیا پارتى دیموكراتى كوردستان و رێبه‌ریا نه‌مر مه‌لا مسته‌فایێ بارزانى هاته به‌رپاكرن، چونكى وان شییا پشتى نه‌ه سالێن شۆڕشا ئیلۆنێ (1961 ـــ 1970) سه‌ركه‌فتنێن مه‌زن تۆمار بكه‌ن بۆ بده‌ستڤه‌ئینانا ماف و ئارمانجێن خه‌لكێ كوردستانێ، یا ژ هه‌میان مه‌زنتر و پڕ ده‌ستكه‌فتتر رێكه‌فتنا دیرۆكیا 11 ئادارا سالا 1970 یێ بوو، كودانپێده‌كا فه‌رمى بوو ب مافێن خه‌لكێ كوردستانێ ل باشوور.
ژبه‌ر ڤان سه‌ركه‌فتنان دوژمنێن كوردستانێ بتایبه‌ت رژێما وى سه‌رده‌مى یا ئیراقێ هزره‌كا مه‌زن ل پارتى و شۆرشا ئیلۆنێ كر، له‌وما په‌نا بره به‌ر رێكه‌فتنه‌كا نیڤده‌وله‌تى ل گه‌ل رژێما شاهنشاهیا ئیرانێ و ب چاڤدێریا هنده‌ك وه‌لاتێن هه‌رێمى ل 5 ێ ئادارا 1975 ئه‌و رێكه‌فتنا خیانه‌تكارى ل جه‌زائیر هاته واژووكرن. ژبه‌ر هێز و مه‌زناهیا وێ رێكه‌فتنێ به‌رامبه‌ر پارتى و بزاڤا رزگاریخوازیا كوردستانى رژێما ئیراقێ و هه‌ڤسۆزێن وان د وێ باوه‌ریێ دابوون كۆ بۆ هه‌تا هه‌تا چریسكا شۆرشا كوردستانى هاته ڤه‌مراندن و چ دۆز بناڤێ دۆزا كوردان نه‌مان، لێ هێز و ئیرادا خه‌لكێ شۆرشگێرێن كورد ب سه‌رپه‌رشتیا رێبه‌رێ گه‌لێ كورد نه‌مر مسته‌فا بارزانى و پارتى دیموكراتى كوردستان هه‌مى بۆچوونێن وان به‌روڤاژى كرن و پشتى خوه رێكخستنه‌ڤێ ژلایێ رێكخستنێ و له‌شكرى و سیاسى ل 26 ێ گولانا سالا 1976 ب شێوازه‌كێ رێكخستیتر و سه‌رده‌مانه‌تر شۆرشێ ده‌سپێكره‌ڤه و ل ده‌مه‌كێ زوو داستان و سه‌ركه‌فتنێن مه‌زن تۆماركرن و ژلایێ رێكخستنێ ژى چالاكیێن پارتایه‌تى گه‌هشتنه د ناڤ جه‌رگێ دوژمنى. شۆرشا گولانێ نه تنێ شۆڕشه‌كا چه‌كدارى بوو، به‌لكى شۆرشه‌كا په‌روه‌رده‌یى و پێگه‌هاندنێ بوو ژلایێ نشتیمان په‌روه‌ریێ و نه‌ته‌وایه‌تیێ و گیانێ شۆڕشگێریێ وخۆڕاگریێ، كو بوونه هێڤێنێ سه‌ركه‌فتنێ ب سه‌رپه‌رشتیا سه‌رۆك مه‌سعورد بارزانى و رێنمایى یێن بارزانیێ نه‌مر.
راسته شۆڕشا گولانێ وه‌كى شۆڕشه‌كا چه‌كدارى پشتى سه‌رهه‌لدانا پیرۆزا سالا 1991 بداوى هات، لێ هه‌ست و هزر و ره‌وشت و كوردایه‌تیا شۆڕشا گولانێ هه‌تا ئه‌ڤرۆ یا به‌رده‌وامه، چونكى شۆڕشا گولانێ خۆڕاگرى و رێكخستن و په‌روه‌رده‌یى و داكۆكیكرن بوو لسه‌ر ماف و ئارمانجێن خه‌لكێ كوردستانێ ب هه‌مى پێكهات ڤه و ئه‌ڤرۆ ژى پارتى دیموكراتى كوردستان ب رێبه‌ریا سه‌رۆك بارزانى لسه‌ر هه‌مان پڕه‌نسیپ داكۆكیكارا ماف و ئارمانج و داخوازیێن خه‌لكێ كوردستانێ یه، له‌وما ب پشتراستى دبێژین خه‌تیرا شۆڕشا گولانێ هه‌را گه‌ش و برسقى یه.
