گەنجەكێ دهۆكێ چاوا ژ كرێكاریێ بۆ خودانێ ئۆتیخانێ
هەرهین محەمەد:
ژ بۆ دەربازبوونا ژیانێ و ب دەستڤەئینانا پاریێ رۆژانە، هەردەم گەنجێن مە دو یان سێ كار پێكڤە كرینە. ماموستا هەوار ژی ئێك ژ نموونەێن وان گەنجێن سەركەفتی یە، ژبلی كارێ ماموستایێ بۆ خوە ئوتیخانەك ڤەكریە و لێ كاردكەت و ل دووڤ گۆتنێن وی، ئەو كرێكارێ ئوتیخانێ بۆ و ژ نیشكەكێ ڤە ئەو بۆ خودانێ ئوتیخانێ.
هەوار خەلیل ملحەم، گەنجەكێ باژێرێ دهۆكێ یە و مامۆستایە ل قوتابخانا رامیار و ژبلی كارێ مامۆستایێ ژی خۆدانێ ئوتیخانا لێلاڤە ل تاخێ نزاركێ، زێدەتر بۆ بەرپەرێ گەنجان یێ رۆژناما ئەڤرۆ گۆت: ل دەستپێكا سالا 2013 من و هەڤالەكێ خوە ل جهەكی پێكڤە كارەك دكر و پاشان وی هەڤالی بۆ خوە ئوتیخانەك ڤەكر و پشتی سالەكێ گۆتە من حەزدكەم ل گەل من ل ئوتیخانێ كاربكەی.
زێدەتر گۆت: ئەز ژی رازی بووم و من ل گەل وی كاركر ب دلسوزانە و وی ژی كارێ من دیت كا چەوا من كاردكر و هزرێن هەڤالێ من مەزنتر بوون و وی كارەكێ باشتر بۆ خوە دیت و گۆتە من ب تنێ ئەڤ جهە بۆ تە یێ باشە و دڤێت تو ببیە خودانێ وێ، ل دەستپێكا قەیرانێ بوو ل سالا 2014 و هەڤالێ من ئەز رازیكرم وێ ئوتیخانێ بكرم و ژ بەر كو ئەز مامۆستا بووم و قەیرانا دارایی ژی دەستپێكربوو ئەز نەچار بووم من ترۆمبێلا خۆ فروت و ئوتیخانە من ب 70 وەرەقێن دۆلاری كری و ژ هینگێ هەتا نوكە سوپاس بۆ خۆدێ من بهایێ ئوتیخانێ زێدەتری وێ دەرئێخستیە.
خویاژی كر، ژبەكو نە یا سەرەكی یە مرۆڤ جلكێن خوە ل ئوتیخانێ ئوتی بكەت، ئەڤە بۆ دەمێ سالەكێ یە ل ئوتیخانەیا من بەتەنی ژی لێ دهێنە شویشتن و ب تایبەتی دەمێ وەرز دهێنە گوهەرین خەلك خۆش بەتەنیا دئینن ژ بۆ شویشتنێ و ئەو كەسێن دهێن ژ بۆ ئوتیكرنا جلكان، هەر یێن دەوروبەری منن ل تاخێ نزاركێ و ئێتیتێ و نزاركا كەڤن و یا پارێزەرا دهێن و كێم ژ تاخێ گرێباسێ دهێن و ئەوێن دهێن ژی ژبەر ئەرزانیا بهایە و ئەز گەلەك ئەرزان چێدكەم و بهایێن ئوتیخانا من ژ ئوتیخانێت دهۆكێ هەموویان ئەرزانترە و مەرەما من ژی ژ ئەرزانیا بهایی ئەوە دا خەلكی بكێشمە خۆ، ژ بەر كو ئەز ماموستا مە و ئەز كاودانێن خەلكی باش دزانم و هەموویان ژی ل بەرچاڤ وەردگرم و نوكە ژی هەر ئوتیخانەك ب بهایەكی چێدكەن و هەتا نوكە وان نەگوتیە من، ژ بەر كو تو ئەرزان چێدكەی و تە كارێ مە كێم كریە.
هەواری ئەو چەندە ژی گۆت: كارێ ئوتیخانێ ژی ل گەل بلنبوون و نزمبوونا دولاری یە و هەكە مووچەیان بدەن كارێ مە گەلەك یێ باشە و خەلك خۆش دهێن ژ بۆ ئوتیكرنا جلكێن خۆ و بەری قەیران دەستپێبكەت كارێ، مە گەلەك یێ باش بۆ و بۆ قەیران كار گەلەك لاوازبوو، بەلێ من هەر دەست نەداهێلان و ئوتیخانەیا خۆ من نەدائێخست و ب تنێ كریا ئوتیخانێ دەركەفت. ل ڤێ دووماهیێ پشتی مووچە داین كارێ مە گەلەك باش بوویە و بەری نوكە من و كرێكارەكی پێكڤە كاردكر و پشتی لڤین كەفتیە كاری من كرێكارەكێ دی ژی بۆ خوە زێدەكریە و دەمێ دچمە قوتابخانێ ئەو كاردكەن و دەمێ دەواما من نیڤرۆ بیت ئەز سپێدەهیان ڤە دكەم و دەمێ دچمە قوتابخانێ ئەو دهێن كاردكەن و پتریا ئەو كەسێن دهێن ژ بۆ ئوتیكرن و شویشتنا جلكێن خۆ گەنجن ئەوێن سەر دژیێ 25 سالیێ دا و ژن و دانعەمر گەلەك كێم دهێن ژ بۆ ئوتیكرنا جلكان.
