گەڕا یازدێ یا فلمە فەستیڤالا دهۆك یا نێڤدەولەتی دێ ب فلمێ هیڤی دەستپێکەت
مەسعود عارف، پەیڤدارێ گەرا یازدێ یا فلمە فیستەڤالا دهۆك یا نێڤدەولەتی، د كۆنگرەكێ رۆژنامەڤان دا دیاركر: د ئەڤ سالە دا دێ گرۆپەكی سەماكەرێن هندستانێ كو ژ شەش كەسان پێكدهێت دێ مێهڤانێن فیستەڤالێ بن و دێ ئاهەنگەكا تایبەت ژی د فیستەڤالێ دا گێرن، هەروەسا چار ستێرێن سینەما عەرەبی، كو ئیلهام شاهین و ئیلهام سەفیەدین ژ وەلاتێ مسرێ و كیندا حەنا و ناجی تونە ژ وەلاتێ سوریێ مێهڤانێن فلمە فیستەڤالا دهۆكێ نە، شەوكەت ئەمین كوركی، رێڤەبەرێ هونەری ل گەرا یازدێ یا فلمە فیستەڤالا دهۆك یا نێڤدەولەتی، د كۆنگرەكێ رۆژنامەڤانی دا دیاركر: فلمێ ڤەكرنا فیستەڤالێ دێ فلمەكێ كوردی بیت ب ناڤێ (هیڤی) كو ژ دەرهێنانا ئۆرهان ئینجەیە ژ باكورێ كوردستانێ، هەروەسا 107 فلم ل هەموو پشكێن فیستەڤالێ هاتینە وەرگرتن، ژ وان 55 فلم دێ هەڤڕكیێ ل سەربرنا خەلاتان كەن، هەروەسا ئەندامێن ژۆری ژ 20 كەسان پێك دهێن، كو ژ پێنج پشكێن ژوریێ دێ خەلاتان دەن، ئەو ژی ژۆریا فلمێن جیهانی، ژۆریا فلمێن درێژ یێن كوردی و ژۆریا فلمێن دكیۆمێنتاری، ژۆریا كورتە فلمان، فیدراسیۆنا رەخنەگرێن نێڤدەولەتی یێن سینەمایێ. ناڤهاتی گۆت: پۆستەرێ فلمە فیستەڤالێ ژلایێ یانا دكشینا، كو خەلكا ئۆكرانیایە هاتیە چێكرن، كو دەربڕینێ ژ وەرزشێ و سینەمایێ دكەت، هەروەسا ژینگەها كوردستانێ ژی تێدا هاتیە نیشاندان، ترایلەرێ فیستەڤالێ ژ لایێ مارتینا سەكۆڤا، دەرهێنەرەكا سلۆڤاكیە هاتیە چێكرن، كو زارۆك و وەرزش و سینەما و ژینگەها كوردستانێ پێكڤە هاتینە نیشادان.
