ھونەرمەند نامق دەروێش ٦٤ سالان دەست ژ ھونەرێ شێوەکاریێ بەرنەدابوو !
سەلاح جەمیل سندی
ھونەرمەند نامق دەروێش، ناڤێ وی یێ تەمام (نامق دەروێش محەمەد)ە، ل سالا ١٩٤٧ ێ ژ مالباتەکا بەرنیاس ل باژێرێ زاخۆ ھاتبوو سەردونیایێ. ھونەرمەندی خواندنا خوە یا سەرەتایی و ناڤەندی ل باژێرێ زاخۆ ب دووماھی ئینابوو و ل سالا ١٩٦٧ ـ ١٩٦٨ خواندنا خوە یا ئامادەیی ژی ھەر ل باژێرێ زاخۆ ب دووماھی ئینابوو.
ھونەرمەند نامق ھەر ژ زارۆکینیا خوە حەز ل ھونەرێ شێوەکاری و وێنەکێشانێ دکر، ژبەرکو دژیێ ١٣ سالیێ دا، و ل سالا ١٩٦٠ێ ب دروستی دەست ب ھونەرێ شێوەکاریێ کربوو و دبیتە ھۆگر و دلخوازێ ڤی جۆرە ھونەری.
نامق دەروێش دژیانا خوە یا ھونەری دا ھەر ل سالا ١٩٦٥ ێ و تا نھۆ ب تابلۆ یێن خوە یێن جوان و رەنگین پشکداری دڤەکرنا چەندین پێشانگەھێن تایبەت و ھەڤپشک دا وەک وێنەکێش ل باژێرێ زاخۆ و باژێرێن دی یێن کوردستانێ و ئیراقێ دا کربوو و ئەنجامێن باش ب دەست خوەڤە ئینابوون.
نامق ھونەرمەندەکێ شێوەکار و وێنەکێشەکێ خۆرستییێ داھێنەربوو، تابلۆ و دیمەنێن وی زۆر ب بەرزی و مەبەست و ناڤەرۆکەکا کویر ھەبوون، زۆر جاران بووینە جھێ سەرسامی و مەندەھۆشییا بینەرێن تابلۆیێن وی، ژبەرکو پرانییا تابلۆ و دیمەنێن وی دەربرینێ ژ ناخێ پاکێ وی و خەیالا بەرفرھییا وی و سرۆشتێ جوانێ کوردستانێ دکر و زۆر جاران ژی ب تابلۆ یێن خوە ھەستا خوە یا نیشتیمانپەروەری و ئەو نەھەمەتیێن ب سەر مللەتێ کوردا ھاتین دەربریبوون.
ھونەرمەند نامق ل سالا ١٩٦٩ێ، ژ ئالیێ حوکمەتا ئیراقێ ڤە ھاتبووگرتن و ئەشکەنجەیەکا مەزن لێ ھاتبووکرن و ل سالا ١٩٧٠ێ ب ھەلکەفتا بەیانناما یازدەی ئادارێ ھاتبووئازادکرن.
ھەروەسان ژی وێنە و تابلۆیێن ھونەرمەندی ھەموو ب شێوەیەکێ جوان و رێک و پێک و ئاسان، کو ھەمی کەسەک لێ تێبگەھت ھاتبوونەدارێژتن.
نامق ل سالا ١٩٨٨ێ دبیتە ئێک ژ ئەندامێن (کۆمەلا شێوەکارێن عیراقێ ) و ل سالا ١٩٩٦ێ، ژی دبیتە ژئێک ئەندامێن کارایێن سەندیکا ھونەرمەندێن کوردستانێ / لقێ دھۆکێ.
دیسان ژی وێنە و تابلۆ یێن ناڤبری ژبەر ئەو رەنگێن گەش و جوان و ئەو ڕامان و مەبەست و ناڤەرۆکێن کویر، ئەوێن کو د تابلۆ و وێنێن خوەدا بکارئینابوون، زۆر جاران ب گەرمی ژئالیێ شێوەکار و ھەوادارێن ھونەرێ وی پیرۆزباھی و دەستخۆشی و ئافەرین لێ دھاتەکرن و چەندین جاران ژی ژئالیێ سازیێن حکۆمی و حزبیڤە باوەرنامێن سووپاسداریێ پێدھاتبوونە بەخشین.
بەلێ بمخابنیڤە ھونەرمەندێ شێوەکار ( نامق دەروێش ) دژیێ ٧٧سالیێ دا، ل رۆژا ( ٢٣/٣/٢٠٢٤)ێ ب نەخۆشییەکا گران ل باژێرێ زاخۆ کۆچا دوماھیێ کر، ھەر ل گۆڕستانەکا باژێرێ زاخۆ ب ئاخێ ھاتبووسپارتن.
