یاریێن دهۆكێ و زاخۆیێ نە رازیبوون و سكالا ل پشت خوە هێلان
هەردو یانەیێن دهۆك و زاخۆ دەست ڤالان ژ پایتەختێ ئیراقێ بەغدا و نەجەف ڤەگەڕیان پشتی د یاریێن خوە یێن گەڕا هەشتێ ژ هەڤڕكیێن خولا ستێرێن ئیراقێ دگەل هەردو یانەیێن زەورا و شورتە تووشی خوسارەتیێ بوون ئەوا ل ئەینییا بۆری ل یاریگەهێن زەورا و نەجەف هاتینە كرن.
حەیدەر سەباح: دادڤان ئەگەرێ خوسارەتییا دهۆكێ بوو
سەرباری پێشكێشكرنا ئاستێ باش لێ دادڤانێ یاریێ یوسف سەعید نەهێلا تیما دهۆكێ ب ئەنجامەكێ باش ژ یاریێ ب دەركەڤیت، پشتی تیما زەورا شیایی مفایی ژ پەنەلتیەكێ و گڤاشنێن دەرۆنی ل سەر تیمێ وەربگریت و ب سێ گۆلان بێ بەرانبەر سەركەڤیت، ئێك خەلەتیێن كۆژەك یێن دادڤانی د ناڤ یاریگەهێ دا كری هژمارتنا پەنەلتیەكا نە دروست سەرباری ڤەگەڕیان بۆ ڤارێ كری و تێدا دیاربوو خەلەتی ژ دەرڤەیی دەڤەرا پەنەلتیێ هاتیەكرن لێ دادڤانی بەرۆڤاژی پێشبینیان ب پەنەلتی هژمارت و بوو ئەگەرێ گۆلا دویێ، د ماوەیێ هەردو نیڤان دا تیما دهۆكێ ئاستەكێ گەلەك باش نیشان دا و چەندین دەلیڤەیێن مەترسی ژ دەستدابوون هەروەسان گۆلپارێزێ دهۆكێ محەمەد سالح لێدانەكا پەنەلتیێ نە هێلا ببیتە گۆل، ل دووڤ زانیاریان دبیت یانەیا دهۆك سكالایێ ل سەر دادڤانێ یاریێ تۆماربكەت.
حەیدەر سەباح هاریكارێ راهێنەرێ دهۆكێ د پرێسكۆنفرانسەكێ رۆژنامەڤانی دا گۆت: دادڤان ئەگەرێ خوسارەتیێ بوو و یێ سەركەفتی نەبوو د بڕیارێن خوە دا، مە ل جهێ یەدەكان دا دزانی ژ دەرڤەیی دەڤەرا پەنەلتیێ خەلەتی چێبووی لێ دادڤانی بڕیارەكا خەلەت دا، هەردو یاریێن ڤێ دووماهیێ كارتیكرنەكا نێگەتیڤ ل سەر ئاستێ یاریزانان كر، هەرچەندە ئاستێ تیما مە یێ باش بوو و چەند دەلیڤەیێن گۆلكرنێ یاریزانێن مە ژ دەستدان.
زاخۆ نە شیا ژ ئاستەنگا شورتە دەرباز بیت
تیما یانەیا زاخۆ ژی ژ دەرڤەیی یاریگەها خوە بێ خال ڤەگەڕیا پشتی دگەل یانەیا شورتە قارەمانا وەرزێ بۆری ب دو گۆلان بێ بەرانبەر تووشی خوسارەتیێ بوو، سەرباری بزاڤێن یاریزانێن زاخۆ ژبۆ تۆماركرنا گۆلەكێ لێ ئەوا دڤیایی بجهـ نە هات، ل دووڤ دەنگۆباسێن هاتینە بەلاڤكرن كارگێرییا یانەیا زاخۆ دێ سكالایەكێ دژی یانەیا شورتە تۆماركەت ل سەر هەبوونا سەرپێچییا یانەیا شورتە ب زێدەكرنا یاریزانێ چارێ یێ پیشەكار كو ل دووڤ رێزبەندییا نێڤدەولەتی یا هەلبژارتییان ل بن رێزبەندییا 90ێ چار یاریزان بن و دو یاریزان ل سەر رێزبەندییا91ێ دابن، لێ یانەیا شورتە سێ یاریزانێن ل سەر رێزبەندییا 91ێ دا یێن هەین.
نەبیل عەبدولرەزاق: كادرێ راهێنانێ بەرپرسە ژ خوسارەتیێ
د پرێسكۆنفرانسێ رۆژنامەڤانی دا نەبیل عەبدولرەزاق هاریكارێ راهێنەرێ زاخۆ گۆت: هەرچەندە تیما مە باشتر بوو و مەترسی زێدەتر هەبوو د نیڤا ئێكێ دا، خەلەتیەكا تاكە كەسی پەنەلتیەك دژی مە هاتە هژمارتن و بوو گۆل، وەكو كادرێ راهێنانێ ئەم بەرپرسیارین ژ خوسارەتیێ و هیچ یاریزانەك بەرپرسیار نینە، بۆ یارییا بهێت دڤێت كاربكەن ئەوان خەلەتییان چارەسەربكەین و ڤەگەڕینە سەركەفتنان.
