یانێن پارێزگه‌هێ دێ بزاڤێن ده‌ستڤه ئینانا ناسناڤێ كوردستانێ كه‌ن
ئه‌ڤرۆ،
چاڤه‌ڕێ یه سوبه‌هی پێنچ شه‌مبی چار یانێن پارێزگه‌ها دهۆكێ پشكداریێ د قاره‌مانیا هه‌رێما كوردستانێ بۆ یاریا كیك بۆكسینگێ دا بكه‌ن ئه‌وا دێ هه‌ڤڕكیێن وێ ل هه‌ولێرا پایته‌خت بۆ ئاستێ پێشكه‌فتی و لاوان هێته ئه‌نجامدان.
ل دۆر ڤێ یه‌كێ مه‌حفوز ئیبراهیم سه‌رۆكێ ئێكه‌تیا كیك بۆكسێنگا پارێزگه‌ها دهۆكێ بۆ رۆژناما ئه‌ڤرۆ گۆت: ژبۆ پشكداریێ د قاره‌مانیا هه‌رێما كوردستانێ یا پێشكه‌فتیان دا بڕیاره سوبه‌هی چار یانێن پارێزگه‌هێ پشكداریێ بكه‌ن ئه‌و ژی دهۆك، زاخۆ، ئامێدیێ و پۆلیته‌كنیك ئه‌وا دێ یاریێن وان ل سه‌ر سیسته‌مێ كه‌ی وان بۆ ماوێ دو رۆژان به‌رده‌وام بیت كو دێ بۆ 10 كێشێن جودا هه‌ر ژ 51كگم هه‌تا +91كگم هه‌ڤڕكیێ ل سه‌ر ناسناڤی هێته كرن.
هه‌روه‌سان ناڤهاتی دیاركر یاریزانێن پارێزگه‌هێ شیانێن باش هه‌نه و تایبه‌ت هنده‌ك یاریزانان كو پشكداری د قاره‌مانیا عه‌ره‌بی و ئیراقی دا بووینه و شاره‌زاهیه‌كا باش وه‌رگرتینه و گه‌شبینن دێ ئاست و ئه‌نجامێن به‌رچاڤ و دلخوه‌شكه‌ر بۆ یانێن خوه و پارێزگه‌هێ ده‌ستڤه ئینن كو ببیته باشترین پالده‌ر بۆ قاره‌مانیێن ئیراقێ و ده‌رڤه و پێشبینی دكه‌م دێ هه‌ڤڕكیه‌كا ب هێز هه‌بیت ژبه‌ركو یاریزانێن یانێن كوردستانێ خودان سه‌ربۆرن و شیانێن باش هه‌نه.
ژلایێ خوه‌ڤه راهێنه‌رێ به‌رنیاس سالح كه‌كۆ ئه‌وچه‌نده دیاركر یانێن دهۆكێ به‌رهه‌ڤیێن باش كرینه و قاره‌مانیا كوردستانێ چو به‌ربژارێن دیار نینن ژبه‌ر هێزا تیمان ب هیڤی نه یانێن مه دێ ناسناڤێ قاره‌مانیێ یان ژی یێن تاكه كه‌سی ده‌ستخوه‌ڤه ئینن.
