ئاخینكێن بێدەنگیەكا خەندقی
دلدار محەمەد
ئەز د بەر ترۆمبێلەكێ ڕا بۆریم ژنەكێ تێدا ڕۆندك د باراندن و ئێكی ب تۆرەیی ڤە ستێرن بۆ دەستێن خۆ دكرە تمبلك.
٭٭٭ ٭٭٭
سپێدێ حەتا ئێڤاری بۆ خودانكرنا چار ئێتیمان كارێن گران دكرن، شڤێدی خودانێ شۆلی نامەك بۆ هنارت: خویشكێ سباهی نەهێ دێ هندەكێن چێتر ژ دەرڤە هێن !
٭٭٭ ٭٭٭
هەتا تاری كەفتیە عەردی دگەل هەڤژینێ خۆ ل ناڤ زەڤیێ بوو،
لسەر شیڤێ:
ـ جامێرۆ ئەز ئەڤرۆكە مرم !
ـ كا بەس ببێژە ما تەچ كریە؟!
٭٭٭ ٭٭٭
پشتی بێژەری نۆچەیێ پیرۆزیا هەشتی ئادارێ خواندی، سێ نۆچەیێن ئاگربەربوون و گیان ژ دەستدانێن ژنان گەشتا وی ب دوماهی ئینا.
٭٭٭ ٭٭٭
دو كۆلانان وێڤەیی مالامە، پەنجەرەیەك ل مالەكێ هەبوو كچەكێ هەموو ئێڤاران تێدا تەماشەی دیمەنێ رۆژئاڤابوونێ دكر. ئەڤرۆكە ب تەڤایا دەنگان ل مالێ بریار هاتەدان پەنجەرە بهێتە هەرفاندن و ب زویترین دەم ببیتە دیوار.
٭٭٭ ٭٭٭
دەنگەكێ بۆڕ بلند بوو.. دەنگێ قێریەكێ بلند تر لێ هات، من دەنگێ رادیۆیێ ژ هەردو دەنگان بلندتر لێ كر
و دگۆت: ئەڤ سالە ئامارێن توندوتیژیێ دبلندن.
