ئادار… قورسترین وه‌رزێ ڤیانێ
عارف حیتۆ
[3]
چوار كچكێن مه‌كته‌بلی.. ل ئادارێ
سه‌رێن خوه ب كێلیا شه‌دایێ ڤه‌نان و
ل شكه‌فتا چوارستوین، دلێن خوه رویس كرن..
رویس، وه‌كو تبلا من رویس
نۆلا شعرێن ناڵبه‌ندی رویس
وه‌كو خه‌ونێن سنێله‌كا خه‌ونۆكی سیس
وه‌ك ئنیه‌تێن فه‌قه‌یێ مزگه‌فتا مه‌زن.. مژدار و پیس
وه‌كو هه‌می دیدارێن مشت خۆشی و شه‌هی
لێ میره و زالده‌سته ئیبلیس!
….
چوار كچكێن مه‌كته‌بلی.. ل ئادارێ
بۆ جارا ئێكێ یه عه‌شقێ دنیاسن و
شه‌رم دكه‌ن ته‌وقێ دگه‌ل بكه‌ن
بۆ جارا ئێكێ یه، ل سه‌ر رووباری
خوه ته‌ڕ دكه‌ن و له‌ززه‌تا وان دبیته كادینا خه‌مان
كه‌نینا وان، كه‌شه‌فرێتییا سه‌رده‌مان
ئاسمانێ ساهی شاهده..
كا چه‌ند عه‌ورێن سپی بار دكه‌ن و
چه‌ند عه‌ورێن دی ل جێ وان دادده‌ن
كا چه‌ند تیرۆژك، چڕ دبنه سه‌ر ئه‌نیا وان
چه‌ندێن دی ژ چاڤێن وان ڤه‌دده‌ن..
….
چوار كچكێن مه‌كته‌بلی.. ل ئادارێ
چوار قێژی یێن تیژ ژێ په‌شین
چوار مرادێن ده‌ورێ به‌رێ
ب ئه‌زمانێ هشكڤه بێ ڕێ
بوونه دارده‌ستێن كه‌سه‌رێ
كۆما سالێن به‌نده‌مانیێ، ژ دیدارێن پاشئێخستی
ڤه‌ڕستن و ب ژڤانه‌كێ دیڤه ڕستن
چوار خه‌ون كرنه كه‌ون
پیرهه‌ڤی یێن كێلبه‌قیچ و پرچ گژاڤژ
ل دۆر قڕژین، هه‌كو ژ كانیا گوندی زای خوین
چوار پۆرێن هاتینه ئاڤێ، د خوینا كانیێ گه‌ڤزین.
….
چوار كچكێن مه‌كته‌بلی.. ل ئادارێ
چاڤێن خوه ب ئاسمانێ شین ڤه‌نان و
ل ده‌لانپه‌ر، دناڤ مژێ دا به‌رزه بوون
وه‌ك مه‌ره‌زێ ژ تیارییان هاتییه دزین، به‌رزه بوون
وه‌ك خه‌نجه‌رێن ژ شكاكان هاتین كڕین، به‌رزه بوون
وه‌ك رجا یێن ئێخسیر ژ سه‌ركه‌فتییان دكه‌ن
ل بن پۆستالان به‌رزه بوون
به‌رزه بوون ژی، د ده‌ستێن كچكان دا به‌رزه بوو
ئه‌ز ئه‌وم یێ… من چوار كچك ئه‌ڤاندین و
ژ چوار وه‌لاتان ڕه‌ڤاندین
و ژ ترسا ئاهۆرایێ نه‌دیتی دا.. هه‌می هیڤی،
ل بن كه‌ڤران ته‌پساندین و ب دیتنێ ڤه حه‌پساندین
هه‌كو شیار بوویم؛ من خوه دیت یێ د حه‌پسێ دا!
چوار زێره‌ڤان.. ل هنداڤی من ئزرائیلن
ژبه‌ر چوار كچكێن من ڤێیاندین د ركه‌هێ دا.
*
وێ گه‌ڤزا كه‌سك وه‌كو گیای ل به‌ر لێڤێن رووبارێ مار، گلیزانكێن بای ڤه‌دكرن، بایه‌كێ سار ل سه‌ر خه‌ونێ دكره غار، كو بگه‌هیته وێ رێژگه‌ها سپه‌هی و كوبار، لێ ئه‌جنه ب پلانه‌كا تاری و مژدار، ژ پێلێن ئاڤێ نه‌كه‌فتن خوار. هه‌ر كچكه‌كا ژڤاندار و مایه ل به‌ندا دلدارێ خوه، كراسه‌كێ هیڤیخوازیێ كره به‌رخوه، داكو هه‌كو هێدی و ل سه‌ر خوه، ب ڕێڤه دچن ل سه‌ر خه‌مێن خوه، ب گه‌شبینی هێڤ بكه‌نه چاڤێن بۆری و سه‌رده‌مێن خوه. لێ سه‌رده‌می، خه‌مێن ساربووی دباراندنه سه‌ر به‌رسفك و ده‌رازینكێن حولی و هونی، قوربانییان دكره كه‌نی، من نه‌دزانی كا ب من دكه‌نن یان ب به‌ختێ به‌رزه دكه‌نن، یان ژی تێر هێز و ڤه‌ژه‌نن؟! هه‌رچه‌وا بیت، ئه‌و د خۆدیكێ دا ره‌به‌نن، ره‌به‌نن چونكو ره‌به‌نن!.. و ره‌به‌نن.
ئه‌و نه ئه‌و بوون، لێ ل ئادارێ ئه‌و ئه‌ون!
