ئادار… قورسترین وه‌رزێ ڤیانێ
[2]
ل ئادارێ…
وه‌ك كولیلكان گه‌ش دبمه‌ڤه و
مینا سواره‌كێ ژ ماهینێ كه‌فتی،
رادبمه‌ڤه!..
*
ده‌نگێ سترانه‌كا دێرین
گوڕگوڕا عه‌وران لفكر و ئاواز…
ئه‌یۆنێن گه‌رم د ڕێژیته سه‌ر گه‌ورییا هشك
نێرگز ژ تبلێن من شین بوون و
بلبله‌كێ هێژ بریندار
باغێ سینگێ من كره پشك.
ئاهۆرا داجڕیان قادێ و
مه خوه ب عه‌رشێ مه‌زدای ڤه گرت:
خودێیۆ كانیكا خێرێ
به‌ردلكێن مه هێژ یێ ل بێرێ و
ته دیدار گوڕكرنه ڤێرێ
به‌ره‌كه‌تێ بێخه گه‌نمی و بپارێزه
وێ خه‌ونا كه‌فتی به‌ر كێرێ
جان و جه‌سته باقۆڤه‌نه و ب كوچكی ڤه تلۆڤه‌نه
ئاگره‌كێ ژ چیلكێن خوینێ بوویه ئێتوین
تێن و ڕۆناهیێ دده‌ته شه‌ڤێن تاری و
ئه‌وان شه‌ڤێن هێژ كه‌وچه‌رین.
*
خه‌فۆرێ ڕییا.. ل ئادارێ رادبیت سه‌رپیا، ب خۆناڤا شه‌نگه‌بیا، دهونیت ڕێیا به‌ره‌ف چیا… چیا یێن مژێ دادایه سه‌ر سه‌ری، كه‌ڤی یێن به‌فرێ كرییه په‌ری و ل هاڤینێ دله‌ك یێ ڤێ ژ به‌ری.. هه‌یڤه‌ك ژ ئاخێ زا و شه‌ڤا زولمات دا به‌ر گورزا، ته‌ڤ گومتلێن ل بنارێ.. بوونه میرزا. گوڕییا ده‌ڤێ مارێ حه‌فت سه‌ر، به‌فر حه‌لاند و به‌خچه‌یێ دوور كه‌ملاند.. ده‌رزێن عه‌ردی پڕی ئاڤا كه‌لاندی بوون، ئاڤێ دا سه‌ر ملێ ئاڤێ و رووباره‌ك هار ژێ ئافراند. وی ئه‌لهۆیێ كومت ڕازاندین و توخیبێن سۆر به‌زاندین، چارمێكیا خوه ل سه‌ر ئه‌نیا عه‌ردی ڤه‌دا و ژ هه‌ر ده‌ه وه‌سیه‌تێن مۆسای، وه‌سیه‌ته‌ك خواند. بلبلان ئه‌و ته‌رتیل ئه‌ڤاند… و ئه‌و رێڤینگێن جهوار بووی، هیڤییه‌كا هه‌لاویستی دناڤ فریزێ كه‌سك دا چاند. شڤان په‌روه‌ر؛ لۆلۆیه‌كا كاویس ئاغای ژ بنێ دیرۆكێ ده‌رئانی و دانا سه‌ر سفرا یه‌زدانی، سه‌ماڤانان كر نیشانی و ژبۆ شه‌هیانێ بره بانی.
تو نه تو بووی، لێ ل ئادارێ تو تویی!..
*
ل ئادارێ…
ئه‌ز ب عه‌شقێ گه‌نج دبمه‌ڤه و
وه‌ك صۆفیێ شه‌یدا ب ویصالا دلبه‌رێ
خڕ دبمه‌ڤه!…
*
