(ئادار) مفا وهرگرتن و سهربور
رهمهزان نسڕددین كێڤلى
ئێك ژ بیرهاتنێن ههردهم زیندى د دیرۆكا مللهتێ كورد دا، ئهوه دبێژن ئادار ههیڤا كوردانه بێى كو پرسیار بهێتهكرن ئهرێ ئادار بوویه ههیڤا مفاوهرگرتن و سهربۆران بۆ مللهتێ كورد؟ ئهرێ مه كوردان چهند شیایه ئادارێ بكهینه دهسپێكهكا نوو بو ژیانهكا نوو و پشتگوهـ هاڤێتنا ئهوان كهلتوور و دیاردهیێن كهڤن یێن كاریگهریێن خراب ل سهر مللهتێ مه دروست دكهن.
پتریا مللهتێن پێشكهفتى یێن جیهانى دیرۆكى دكهنه تۆمارا نڤێسینا بۆیهر و روودانێن گرنگ بۆ هندێ بهردهوام ژلایێ سیاسى و كهلتوورى ڤه، خواندنا ئهوان بۆیهران بكهن و بزانن ل كیژان خال و د چ بابهت و رێكهفتن گوهۆرین د خالێن وان یێن لاواز و خالێن بهێز دا دروست بووینه دیسا، بۆ دارێشتنا پلانێن دۆمدرێژ یێن ستراتیژى مفایى ژ سهربۆرێن خوه یێن كهڤن ببینن، بهلێ زۆر ب داخڤه ل پتریا ههلكهفتێن مه ب چهند ئاهنگان پێشهوازیێ ل ئادارێ دكهین و ئهڤ پێشهوازیكرنه چ فهرمى بیت یان ل سهر ئاستێ تاكهكهسان بیت.
مه نهشیایه رهخنهیا خوه بگرین و چ نهبیت ل دوازده ههیڤێن سالێ ههیڤهك بۆ پرسیاركرنێ بیت ل گهل ناخێ خوه كو بیردانكا مه بۆ دیرۆكێ بزڤرینیت ئهرێ ئهو قووناغا ئهم نوكه تێدا مه چهند شیایه بكهینه د خزمهتا كێشا خودا چ وهكو مرۆڤ یان وهكو مللهت.
ههتا كو ئهم رهخنهیا خوه نهگرین، دهستێ مه نهكهڤیته سهر برینێن مه ب زهحمهته ئهم دانپێدانێ ب شكهستن و سهركهفتنێن خوه بكهین، ل ڤێره د شكهستنا دا ئهم ئێكودو سووجدار دكهین ب خیانهتێ بێى كو ئهم دوژمنێ خوه بنیاسین و گهلهك جاران ئهم دبینه كرێگرتى بۆ پرۆژێن ههرێمایهتى ل دهڤهرێ ههر ژ سهردهمێ كهڤن و حهتا نوكه، د سهركهفتنا دا ژى ئهم ههموو خودانین بێى كو ئهم بزانین دێ چاوا ئهڤان سهركهفتان پارێزین.
ئهركێ ههر تاكهكێ د ناڤ جڤاكى دا ئهوه پێداچوونا خوه و دیرۆكا خوه بكهت، تهنها تهماشهكهر نهبیت بۆ بۆیهران و ئهركێ كهسانێن رهوشهنبیر و ئهكادیمى ژى ئهوه خواندنهكا جودا بۆ ئهڤان بیرهوهریان بكهن و نابیت وهكو مرۆڤێن ساده هزربكهن بۆ هندێ بهرههمێ وان یێ هزرى ببیته ژێرخانهك بۆ زهنگین كرنا ههموو بیاڤێن ژیانا وى خهلكێ ئهو دگهل دژین و دوور نینه هندهك تهخ ئهوان هزران قهبوول نهكهن بهلێ یا گرنگه ئهو هزر بهێنه گۆتن و ببنه پرۆژه و مرۆڤ خودان ههلویست بیت ل سهر وى پرۆژێ مرۆڤى باوهرى پێ ههیى و یێ ئاماده بیت قوربانیێ پێناڤ بدهت بۆ هندێ دهرئهنجامێن وێ د خزمهتا مرۆڤایهتیێ دا بن.
گرنگ نینه ئهم نیشا بهرهبابێن داهاتى بدهین كو فلان سالێ خیانهت ل مه هاته كرن لێ گرنگه ئهو بخو دوژمنێن خوه بنیاسن چ ل ناڤخوه یان ژ دهرڤه تاكو دوبارهبوونا ئهوێ خیانهتێ نهبیته كارهسات بۆ جڤاكێ وی سهردهمى دیسا دڤێت مه ئامادهكاریێن خوه ههبن كو دگهل گورانكاریێن جیهانێ ب رێڤه بچین نهكو تازه هزر ل پرۆژێن خهلكى بكهین بهلكو ئهم ژى خودان پرۆژه بین.
ل قووناغێن پشتى سهرهلدانا پیرۆز مللهتێ كورد بهردهوام ئادار وهكو ههیڤهك بۆ خۆشى و نهخۆشیێن خو پێناسهكریه، بهلێ مه نهشیایه بكهینه ههیڤا بریارا كوردان كو بهر ب ئاراستهكا باشتر و و خالێن دیرۆكی یێن گهنى یێن ب سهرێ مه هاتین ب هاڤێژینه د مهزبهلا مێژویێ دا و دهست ب ژیانهك نوو بكهین، حوكمهتا ههرێمێ گهلهك گرنگى دایه ئهڤێ چهندێ، بهلێ میكانزمێن جێبهجێكرنا وێ ل ئاستێ پێدڤی نهبوویه و بهردهوام كۆسپ و ئاستهنگێن مهزن ههمبهرى حوكمهتێ ههبووینه تایبهت ژلایێ سیاسى ڤه.
لهورا ژمه دهێته خواستن ئهم ئادارێ بكهینه ههیڤا پێداچوون و ریفۆرما سیاسى و جڤاكى و رهوشهنبیرى بۆ هندێ د ئایندهیى دا ئارمانجێن ئادارێ بۆمه رۆنتر بن.
