ئاراز سالح: هنگاڤتن و نه‌بوونا یاریزانان ئه‌گه‌رێ خوه‌ڤه‌كێشانێ بوو
ئه‌ڤرۆ،
راهێنه‌رێ تیما فوتسالا كچێن یانا گاره دیاركر ژبه‌ر هه‌بوونا هنگاڤتن و نه‌ساخییا دناڤ پێكهاتیێ تیما وان دا به‌ری ده‌ستپێكرنا یاریێن گه‌ڕا سێیێ یا خولا پلا نایابا كوردستانێ ل گه‌ل یانا ئافره‌تێن دهۆكێ نه‌چاربوون یاریێ نه‌كه‌ن و ڕه‌دكر ئه‌وان خوه ژ خولێ ڤه‌كێشا بیت.
زێده‌تر ئاراز سالح د داخویانیه‌كێدا بۆ رۆژناما ئه‌ڤرۆ گوت: هه‌رچه‌نده ئه‌م به‌رده‌وام راهێنانێن خوه ئه‌نجامده‌ین ژبۆ یاریێن خولا فوتسالا كوردستانێ لێ ژ نشكه‌كێ ڤه به‌ری یاریێ ب دو رۆژان سێ یاریزانێن مه تووشی هنگاڤتنێ بوون و چار یێن دی نه‌ساخ بووینه و یاریزانه‌ك ژی ده‌ست ژ یاریێ به‌ردا، سه‌رباری مه داخاز ژ ئێكه‌تیا ته‌پا پێی یا كوردستانێ كر دو یاریزانا ل سه‌ر تیما خوه زێده‌كه‌ین لێ به‌رهه‌ڤ نه‌بوون، له‌ورا نه چاربووین خوه ژ یاریا ل گه‌ل ئافره‌تێن دهۆكێ ڤه‌كێشین و ئاماده نینم تیما خوه ب سێ یاریزانا بینمه دناڤ یاریێ دا.
ژلایه‌كێ دووڤه ناڤهاتی ئه‌و ده‌نگۆباسه ڕه‌دكرن كو دێ خوه ژ خولێ ژی ڤه‌كێشن و گۆت: هه‌تا ڤێ چڕكێ ژی مه بڕیارا خوه ڤه‌كێشانێ نه دایه و ئه‌م رژدین بۆ یاریا حه‌فتیا بهێت باشترین شێوه به‌رهه‌ڤبن پشتی ڤه‌گه‌ڕیانا یاریزانێن تووشی نه‌ساخیه‌كێ بووین و زێده‌كرنا دو یاریزانێن دی لسه‌ر پێكهاتیێ تیمێ ژبۆ بهێزكرنا رێزێن وێ، لێ یا گرنگ دڤێت جهێن په‌یوه‌ندیدار و به‌رپرسێن وه‌رزشی خوه ل كچێن پارێزگه‌هێ ب گشتی و یانا گاره ب تایبه‌تی بكه‌نه خودان و پشته‌ڤانبن ژبۆ زێده‌تكر پشخستنا وه‌رزشا كچان ل پارێزگه‌ها دهۆكێ.
