ئاران عومه‌ر: هیڤیا من ئه‌وه بشێم پتر هێزا خوه دیار بكه‌م
دهۆك، شاكر ئه‌تروشی:
ئاران عومه‌ر عه‌لی، وێنه‌گرێ كه‌نالێ دهۆك تیڤی، د دیداره‌كێ دا بۆ رۆژناما ئه‌ڤرۆ گۆت: ئه‌ز ژدایكبوویێ سالا 1996 مه، ده‌رچۆیێ پشكا شانۆیێ مه ل په‌یمانگه‌ها هونه‌رێن جوان ل دهۆكێ، ده‌ستپێكا من یا وێنه‌گرتنێ بۆ به‌ری چه‌ندین سالان دزڤریت، كو بابێ من ئه‌ڤ به‌هره‌یه ل ده‌ف من دیت، له‌ورا ل هه‌موو ده‌ركه‌قتن و ئاهه‌نگێن خێزانی من كامیره دبر و وێنه بۆ ئه‌ندامێن مالێ دگرتن، ل گه‌ل مه‌زنبوونا من حه‌زا من ژی بۆ وێنه‌گرتنێ مه‌زنتر لێ هات، دووڤدا من گه‌له‌ك وێنه و پارچه ڤیدیۆ بۆ هه‌ڤالێن خوه دگرتن، پاشان ل 2016 ده‌لیڤا كاركرنێ ل دهۆك تیڤی بۆ من چێبوو ئه‌ز بۆمه وێنه‌گرێ ستۆدیۆیێ، لڤی كه‌نالی پتر ده‌لیڤه بۆ من چێبوو كو ئه‌ز شیانێن خوه به‌رفره‌هتر لێ بكه‌م چنكو دهۆك تیڤی قوتابخانه‌یه، هه‌روه‌سا هه‌موو هه‌ڤال د هه‌ڤكار بوون ل گه‌ل من، ل 2018 ده‌لیڤه‌كا دی هات و ئه‌ز چوومه كه‌نالێ وار ل وێرێ ژی ئه‌ز وێنه‌گرێ ستۆدیۆیێ بووم، ئانكو د ده‌مه‌كی دا من ل دو كه‌نالان پێكڤه كاردكر، لێ پشتی كه‌نالێ وار گوهۆرین ب سه‌ردا هاتین ئه‌ز ل وێرێ نه‌مام و نوكه به‌س ل دهۆك تیڤی به‌رده‌وامیێ ب كارێ خوه دده‌م.
ئارانی گۆت: ل ده‌ستپێكا كارێ من هه‌موو ئه‌ندامێن مالێ ب تایبه‌ت ژی بابێ من گه‌له‌ك پشته‌ڤانێن من بوون، چونكو بابێ من ب خوه ژی گه‌له‌كا خزمه‌تا راگه‌هاندنێ كریه و بۆ ده‌مێ چه‌ندین سالان ل دهۆك تیڤی كاركریه، له‌ورا ڤیانا من ژی بۆ كارێ من گه‌له‌كه و من چو ئاسته‌نگ نه دیتینه، چنكو ده‌مێ مرۆڤ كارێ خوه ب ڤیانه‌كا مه‌زن ئه‌نجام دده‌ت دێ ب ساناهی گه‌هیته ئارمانجا خوه، بۆ زانین هه‌تا نوكه من پازده كلیپ و چه‌ندین به‌رنامه وێنه‌كرینه، هه‌روه‌سا ئه‌ز ئه‌كته‌ره‌كێ باشم و ده‌مێ قوتابی ل په‌یمانگه‌هێ من پشكداری د گه‌له‌ك شانۆگه‌ریان دا كریه، هیڤیا من ئه‌وه د پاشه‌رۆژێ دا ئه‌ز خزمه‌ته‌كا راست و دروست بۆ وه‌لاتێ خوه بكه‌م و بگه‌همه جهێن بلندتر دا بشێم پتر هێزا خوه دیار بكه‌ن، و من دڤێت بێژم وێنه‌گرتن هه‌موو تشتان دراوه‌ستینیت دا ئه‌م خۆشیێ پێ ببه‌ین هه‌تا هه‌تایێ.
