ئارمانج دوسكی: كۆمێنتارێ وه‌رزشی دڤێت د ده‌مێ یاریان دا بێ لایه‌ن بیت
ئه‌ڤرۆ،
د دیداره‌كێ دا ئارمانج دوسكی ئێك ژ كۆمێنتارێن گه‌نج ل ده‌ڤه‌را به‌هدینان و پارێزگه‌ها دهۆكێ دیاركر كۆمێنتارێ وه‌رزشی دڤێت بێ لایه‌ن بیت د ده‌مێ یاریان دا و بۆ مۆندیالا بهێت به‌رهه‌ڤیان دكه‌ن.
زێده‌تر ناڤهاتی گۆت: كارێ كۆمێنتاریێ ب سانه‌هی نینه ژبه‌ركو چه‌ند خالێن گرنگ دڤێن ژ وانا ده‌نگ، شیان و شاره‌زاهی و زێده پێزانینێن وه‌رزشی بیت تایبه‌ت ئه‌و یاریا كۆمێنتاریێ بۆ دكه‌ت، یا جهێ دلخوه‌شیێ كو كۆمێنتاریا مه ب كوردی هه‌رزو جهێ خوه دناڤ دلێن بینه‌ری دا كریه و تایبه‌تمه‌ندیا خوه هه‌یه و چه‌ندین كۆمێنتارێن خودان شیان ل ده‌ڤه‌را به‌هدینان هه‌نه ژوانا سه‌له‌ح سالح ، ڤه‌هێل كه‌له‌ش و شوره‌ش سالح، ئه‌ڤه ژی پێنگاڤه‌كا باشه بۆ پێشخستنا كۆمێنتاریا كوردی و گه‌هشتینه ئاسته‌كێ باش.
هه‌روه‌سا ئارمانج دوسكی دیاركر بۆ جارا ئێكێ كۆمێنتاری كری ل مۆندیالا 2014 و خوه‌شترین كۆمێنتاریا وی د خولا كوردستانێ دا بوو دناڤبه‌را دهۆك و سیروانی نوو هاتیه كرن و گۆت: بۆ من یاریێن ده‌رڤه‌یێ پارێزگه‌هێ بزه‌حمه‌ترن ژ ناڤ باژێری دا ژبه‌ركو من پێزانینێن باش ل سه‌ر یانێن پارێزگه‌هێ زێده‌تر ژ یێن ده‌رڤه هه‌نه و ئاریشا مه‌زن یا مه كۆمێنتاران ده‌مێ بۆ ده‌زگه‌هه‌كێ راگه‌هاندنێ كارێ كۆمێنتاریێ دكه‌ین پاداشتا وان یا كێمه و نه‌شێن بكه‌ینه داهاته‌ك بۆ خوه و هیڤی دكه‌ین ژ یانێن وه‌رزشی تایبه‌ت یێن پارێزگه‌ها دهۆكێ هاریكاربن ل گه‌ل كۆمێنتاران و جهێن تایبه‌ت بۆ دابینبكه‌ن.
