ئارمانج ژ چارەسەریا خەمۆکیێ زێدەکرنا هەستێن ئەرێنییە
زاخۆ، دلۆڤان هالۆ:
دەروونناسەکێ د دیدارەکێ دا بۆ ڕۆژنامەیا ئەڤرۆ دیار کر کو ئارمانج ژ چارەسەریا خەمۆکیێ کێمکرنا حالەتێن دەروونی یێن خرابە و زێدەکرنا هەستێن ئەرێنییە ب ڕێکا گۆهۆڕینا ڕەفتاران.
دەروونناس پەروین کەدخودا دیار کریە د دەمەکی دا کو کاریگەریا چارەسەریا خەمۆکیێ هاتیە سەلماندن، لێ تایبەتمەندیێن چاوانی و دەمێ ڕوودانا ڤان گوهۆڕینان نەهاتیە پشتڕاست کرن کا ئەرێ گوهۆڕینا ڕەفتار و هزر و بیران دێ بیتە ئەگەرێ باشتربوونا هەست و سۆزان یان نە؟.
پەروینێ ئاماژە ب وێ چەندێ ژی کر کو تێگەهشتن ل چاوانیا ساخ بوونا وان کەسێن نەخوەشیا خەمۆکیێ هەی ڕۆلەکێ گرنگ هەیە بۆ باشتربوون و کاریگەریا چارەسەرکرنا وێ نەخوەشیێ، گوهۆڕینا هەست و سۆز و هزر و بیران گەلەك جاران د درێژەپێدانا وەرگرتنا چارەسەریێ دا پێکڤە پەیدا دبن و گۆت؛ د دەمەکێ دا باشتربوونا ڕەفتاران وەکو زێدەبوونا پەیوەندیێن جڤاکی و هەبوونا چالاکییان پشتی هینگێ دیار دبن.
دەروونناسێ دیار کر ژی هەستێ نەخۆشیا خەمۆکیێ و شێوەیێ هزرێن نەرێنی گەلەك جاران ل دەمێ چارەسەرکرنا خەمۆکیێ بەرەڤ کێم بوونێ دچن، ژبەر هندێ ل دەمێ نەخۆشی کێمتر هزرێن نەرێنی ل دەف هەبن دێ هەست ب چارەسەرکرن و باشتربوونێ کەت و گۆت؛ خالەکا دی ژی هەیە کو گەلەك جاران نەخوەش بەری کو دەست ب چالاکی و تێکەل بوونا لگەل خەلکی بکەت دێ هەست ب باشتربوونێ کەت.
پەروینێ ئەو چەندە ژی دیار کر گۆهۆڕینا ڕەفتاران وەکو زێدەبوونا تێکەلیا جڤاکی یان بەشداریکرن د چالاکیێن هەمەجۆر دا پشتی دەستکەفتێن هەست و سۆزان پەیدا دبن و گۆت؛ ئەڤە ژی وێ چەندێ نیشان ددەت کو دبیت نەخوەش ل دەستپێکێ هەست ب ئارامی و چارەسەریا هەست و سۆزان بکەت ژبەری کو دووبارە دەست ب ژیانا خوە یا ئاسایی بکەت و بەژداریێ د چالاکیێن نوودا بکەت”.
