ئاريشێن يه‌كێن ئاكنجيبوونێ چاره دبن
ئەڤرۆ نیوز:
ئەندامەکێ لژنا دەستپاکیێ ل پەرلەمانێ کوردستانێ بۆ ئەڤرۆ دیار کر کو بڕیارە حەفتیا بھێت، لژنا دەستپاکیێ ل پەرلەمانی د گەل نوونەرێ حوکمەتا ھەرێمێ ب مەرەما چارەکرنا ئاریشێن ئاکنجیبوونێ کۆم ببیت و گۆت: “ھژمارەکا کۆمپانیێن د بیاڤێ پرۆژێن ئاکنجیبوونێ دا کارکری، دەست د گەندەلیا وان پرۆژان دا ھەیە”.
خەلەف ئەحمەد، ئەندامێ لژنا دەستپاکیێ ل پەرلەمانێ کوردستانێ ڕاگەھاند، لژنا وان دەربارەی ئاریشێن ئاکنیبوونێ ل ھەرێما کوردستانێ کۆمبوویە و گۆت: “بڕیاربوو عوسمان شوانی، سەرۆکێ وێ لژنا حوکمەتا ھەرێما کوردستانێ پێکئینای بۆ چارەکرنا ئاریشێن ئاکنجیبوونێ د وێ کۆمبوونێ دا بەرھەڤ ببا، لێ ژ بەر چەند رێیێن قانوونی نەشیا بەرھەڤی وێ روونشتنێ بیت، لەو لژنا دەستپاکیێ گازیکریە و بڕیارە حەفتیا بھێت بھێتە پەرلەمانی دێ د گەل کۆم بین”.
ئاماژە ب وێ چەندێ ژی کر، ئەگەرێ گازیکرنا سەرۆکێ لژنا حوکمەتێ بۆ چارەکرنا ئاریشێن ئاکنجیبوونێ ل ھەرێما کوردستانێ بۆ پەرلەمانی، ئەوە: کو د ئاریشێن ئاکنجیبوونێ دا گەندەلیێن مەزن ھەنە و گۆت: “ھژمارەکا وان کۆمپانیێن د بیاڤێ پرۆژێن ئاکنجیبوونێ دا کارکری، دەست د گەندەلیێ دا ھەیە”.
وی ئەندامێ لژنا دەستپاکیێ ل پەرلەمانێ کوردستانێ خویا ژی کر، گەلەک خەلک ھەیە کو پارە ژێ ھاتینە وەرگرتن، لێ پرۆژێن وان یێن ئاکنجیبوونێ ھەتا نوکە نەھاتینە تمامکرن یان ھاتینە ب جە ھێلان و گۆت: “دانوستاندنێ ل سەر ڤان ئاریشان و چەندین ئاریشێن دی د گەل سەرۆکێ لژنا حوکمەتێ و لایەنێن پەیوەندیدار دێ کەین ھەتا دگەھینە ئەنجامەکێ باش کو د بەرژەوەندا وەلاتیان دا بیت و مافێ وان بەرزەنەبیت”.
