ئاریان ئیبراهیم: دڤێت قوتابی ژلایێ ده‌روونیڤه بهێته هشیار كرن
هه‌ولێر، قائید میرۆ:
ئه‌ڤرۆ ده‌ستپێكا سالا نوویا خواندنێ یه ل سه‌رانسه‌ری هه‌رێما كوردستانێ شاره‌زایه‌كێ كه‌رتێ په‌روه‌ردێ ژی دبێژیت: ژلایێ ده‌روونیڤه پێدڤیه قوتابی بهێته به‌رهه‌ڤ كرن و نابیت زێده‌ی سنورێ خوه رێنمایێن ساخله‌میێ بهێنه بجهئینان، به‌رۆڤاژی دێ بیته ئه‌گه‌رێ به‌لاڤبوونا ترسێ بۆ قوتابی و دێ كاریگه‌ریێن خراب ل سه‌ر ده‌روونێ قوتابی هه‌بن.
ئاریان ئیبراهیم، شاره‌زایێ كه‌رتێ په‌روه‌ردێ بۆ ئه‌ڤرۆ دیار كر پێدڤیه ژلایێ ده‌روونیڤه قوتابی بۆ ده‌ستپێكرنا سالا نوویا خواندنێ بهێته به‌رهه‌ڤ كرن، چونكی مه‌رجه قوتابی ب ده‌روونه‌كێ ساخله‌م و بێ ئاریشه بچیته قوتابخانێ و هه‌ر ئاریشه‌كا ده‌روونی یان گرێیه‌كا ده‌روونی په‌یدا ببیت ئه‌ڤه بێگومان دێ كاریگه‌ریێن زۆر خراب ل سه‌ر ده‌روونێ قوتابی په‌یدا كه‌ن و زیانێن مه‌زن دێ هه‌بن ل سه‌ر ژیانا ئه‌ڤی قوتابی ل قوتابخانێ و گۆت: (ئه‌ڤ ساله بڕیارا وه‌زاره‌تا په‌روه‌ردێ ئه‌وه ژبلی ده‌ستپێكرنا ده‌وامێ قوتابی دشێت ب رێیا سیسته‌مێ ئونلاین و ئه‌لكترۆنی ژی درێژیێ بده‌ته خواندنێ، مخابن بڕیارا په‌روه‌ردێ د جهێ خوه‌دا نینه، چونكی دڤێت ئێك سیسته‌م بهێته په‌یڕه‌و كرن و نابیت تێكه‌لیه‌ك هه‌بیت د سیسته‌مێ خواندنێ دا، یان دڤێت خواندن هه‌موو ب سیسته‌مێ ئونلاین ب ڕێڤه بچیت یان ژی هه‌موو قوتابی ده‌وامێ بكه‌ن و تنێ سیسته‌مێ به‌رێ یێ ناڤا پۆلێ بهێته بجهئینان).
شاره‌زایێ كه‌رتێ په‌روه‌ردێ دا زانین كو فره سیسته‌می د خواندنێ دا دێ زۆر ئاریشا بۆ كه‌رتێ په‌روه‌ردێ و ده‌روونێ قوتابی په‌یدا كه‌ت، هه‌تا ژلایێ ئه‌زموونانڤه دێ ئاریشه په‌یدا بن بۆ كه‌رتێ په‌روه‌ردێ و قوتابی، سالا بۆری ژی هه‌مان ئاریشه په‌یداب وون و تێكه‌لی و پێكه‌لی هه‌بوو د ته‌مام كرنا پرۆگرامێن قوتابخانێ دا و گۆت: (نابیت ئه‌زموونا دو سالێن بۆری بهێته ژبیر كرن و مفا ژێ نه‌هێته وه‌رگرتن، پڕۆسا خواندنێ پێدڤی ب سه‌قایه‌كێ گونجایی هه‌یه و هه‌رده‌مێ ئالۆزی و ئاریشه‌ك په‌یدا ببیت سیسته‌مێ خواندنێ وه‌ك خوه ناهێته بجهئینان ل چو وه‌لاته‌كێ جیهانێ، ژبه‌ركو دێ مه‌ژیێ قوتابی زێده‌تر مه‌شغوولی ئاریشه‌یان بیت نه‌ك وانه‌یێن رۆژانه).
ئاریان ئیبراهیم ئه‌و چه‌نده ژی گۆت: (نابیت بابه‌تێ خوه پارێزیێ بهێته پشتگوه هاڤێتن، به‌لێ د هه‌مان ده‌مدا نابیت بابه‌تێ خوه پارێزیێ هند بهێته مه‌زن كرن ژلایێ ده‌روونیڤه ترسێ بۆ قوتابی و سه‌میانێن قوتابی په‌یدا بكه‌ت، ئه‌ز ل گه‌ل بجهئینانا رێنمایێن ساخله‌می دناڤا قوتابخانێ و پێدڤیه مامۆستا ڤاكسینێ دانن، به‌لێ مه‌زن كرنا بابه‌تێ كۆرۆنایێ زێده‌ی سنورێ خوه نه‌ك چو مفایه‌ك نابیت، به‌رۆڤاژی ژلایێ ده‌روونیڤه دێ كاریگه‌ری ل سه‌ر قوتابی هه‌بیت، كۆرونا ب دووماهی نه‌هاتیه و ل هه‌موو جیهانێ هه‌یه، به‌لێ سه‌ره‌ده‌ری كرن ل گه‌ل قوتابیان بۆ خوه پارێزیێ نابیت ژ سنوری ده‌ركه‌ڤیت و ل جهێ خوه پارێزیێ ده‌روونێ قوتابی بهێته تێكدان، چونكه هه‌رده‌مێ مه‌ترسی ل سه‌ر قوتابی هه‌بیت هینگێ قوتابی كه‌سه‌كێ ئاسایی نابیت بۆ وه‌رگرتنا وانه‌یێن قوتابخانێ و به‌رده‌وام دێ دو دلی بۆ قوتابی په‌یدابیت).
شاره‌زایێ كه‌رتێ په‌روه‌ردێ دیار كر كو ئه‌ركێ ڤه‌كۆله‌رێن جڤاكیه دناڤا قوتابخانێ دا ب رۆلێ خوه رابن و رێنمایێن دروست بده‌نه قوتابی، هه‌تا كه‌س و كارێن قوتابی بهێنه پشتڕاست كرن، كو راسته ڤایرۆسێ كۆرۆنایێ هه‌یه و دڤێت خوه پاراستن هه‌بیت به‌ری هه‌ر تشته‌كی، به‌لێ دیسان پێدڤیه قوتابی بهێنه پشتڕاست كرن كو ژیان یا به‌رده‌وامه و بلا ترس نه‌بیت ژ كۆرۆنایێ و گۆت: (هه‌تا ئه‌ز باوه‌رم باشتر بوو وه‌كی عێراقێ خواندن هاتبا پاشخستن بۆ پشتی هه‌لبژارتنان، چونكی ده‌مێ دبێژن عێراق دێ پشتی هه‌لبژارتنان ده‌وامێ ل قوتابخانان ده‌ستپێ كه‌ت ئه‌ڤه بێگومان ترس په‌یدا دبیت بۆ قوتابی و خێزانێ، ژبه‌ركو هزر دكه‌ن كۆرۆنا مه‌ترسیه له‌وڕا عێراق د ده‌مێ خوه دا ده‌رگه‌هێن قوتابخانان نا ڤه‌كه‌ت، هه‌روه‌سا تیمێن ساخله‌می ل قوتابخانان بگه‌ڕن بۆ دانا رێنمایێن ساخله‌می و هشیار كرنا قوتابی و ره‌ڤاندنا ترسا وان ژ كۆرۆنایێ).
