ئاریشا كاره‌با ده‌ڤه‌را شێلادزێ دهێته چاره‌سه‌ركرن
ئامێدیێ، مه‌حمود نهێلی:
ده‌ست ب پرۆژێ راكێشانا هێله‌كا 33 كه‌یڤی ل دێره‌لۆكێ بو شێلادزێ و دانانا وێستگه‌هه‌كا گه‌ڕۆك ل شێلادزێ هاته كرن و گوژمێ پێدڤی بۆ هاتیه ته‌رخانكرن و رێڤه‌به‌رێ به‌لاڤكرنا كاره‌با ئامێدیێ ژی دبێژیت: ب تمامبوونا ڤی پرۆژه‌ی ئاریشا كاره‌با شێلادزێ دێ هێته چاره‌سه‌ركرن.
ئه‌ندازیار ئارام جلال، رێڤه‌به‌رێ به‌لاڤكرنا كاره‌با ئامێدیێ بۆ رۆژناما ئه‌ڤرۆ دیار كر، ب مه‌ره‌ما چاره‌سه‌ركرنا ئاریشا كاره‌با شێلادزێ ده‌ست ب پرۆژێ راكێشانا هێلا 33 كه‌ی ڤی ژ وێستگه‌ها دێره‌لۆكێ یا 132 كه‌یڤی بۆ وێستگه‌ها شێلادزێ یا گه‌ڕۆك هاتیه كرن و گۆت: “گوژمێ 540 ملیۆن دیناران بۆ ئه‌نجامدانا ڤی پرۆژه‌ی ژلایێ وه‌زاره‌تا كاره‌بێ ڤه هاتینه ته‌رخانكرن”.
ناڤهاتی ئاشكرا ژی كر، نوكه ده‌ست ب كارێ پرۆژه‌ی هاتیه كرن كو ژلایێ كۆمپانیا ئه‌دما دهێته بجهـئینان و گۆت: “وێسته‌گه‌ها مبایل دێ هێته دانان، داكو بارێ ل سه‌ر وێستگه‌ها شێلادزێ بهێته سڤككرن، ژ پێخه‌مه‌ت چاره‌سه‌ركرنا ئاریشا كاره‌با ناوچه‌داریا شێلادزێ”.
