ئاریشه‌یێن كه‌رتێ چاندنێ د ناڤبه‌راهه‌رێم و به‌غدا دا هاتنه چاره‌سه‌ركرن
قائید میرۆ:
چه‌ند رۆژه‌كه بهایێ مریشكێن ناڤخوه بلند بوویه و په‌یڤدارێ وه‌زاره‌تا چاندنێ ژی دبێژیت: بلندبوونا بهایێ مریشكان بۆ زێده‌بوونا خواستا بازاڕی ڤه‌دگه‌ڕیت و هه‌ر ده‌مێ خواست ل سه‌ر كێم ببیت بهایێ وان دێ ئه‌رزان بیت.
حسێن حه‌مه‌كه‌ریم، په‌یڤدارێ وه‌زاره‌تا چاندنێ بۆ رۆژنا مائه‌ڤرۆ دیار كر، بلندبوونا بهایێ مریشكان د ناڤا بازاڕێن هه‌رێما كوردستانێ دا گرێدایی زێده‌بوونا خواستا وه‌لاتیانه ل سه‌ر كڕینا به‌رهه‌مێ ناڤخوه‌یی و ئاریشه‌یێن به‌ری نوكه د كه‌رتێ به‌رهه‌مئینانا مریشكان دا هه‌ین هاتینه چاره‌سه‌ركرن، له‌وڕا هه‌ر بلندبوونه‌كا په‌یدا ببیت ڤه‌دگه‌ڕیت سه‌ر خواستا بازاڕی و هه‌ر ده‌مێ خواست ل سه‌ر كێم ببیت، بێگومان بهایێ مریشكان د ناڤا بازاڕی دا دێ ئه‌رزان بیت.
حسێن حه‌مه‌كه‌ریم گۆت: “پشتی كۆمبوونا د ناڤبه‌را هه‌ردو وه‌زیرێن چاندنێ یێن هه‌رێما كوردستانێ و عیراقێ دا ئاسته‌نگێن بۆ جۆتیاران دهاتنه چێكرن ژلایێ حوكمه‌تا فیدڕالڤه هاتینه چاره‌سه‌ركرن و لێك تێگه‌هشتن د ناڤبه‌را چاندنا هه‌رێم و به‌غدا دا هه‌یه، ل دۆر پرسێن گرێدایی كه‌رتێ چاندنێ، هه‌ر به‌رهه‌مه‌كێ هه‌رێما كوردستانێ زێده‌ببیت جۆتیار و بازرگان دشێن بۆ پارێزگه‌هێن ناڤین و باشوورێ عیراقێ ب ڤه‌گوهێزن بێی چو رێگریه‌ك هه‌بیت”.
