ئاریشەیا ئاڤێ ل سنۆرێ دەڤەرداریا بەردەڕەشێ دێ هێتە چارەسەركرن
هەولێر، قائید میرۆ:
رێڤەبەرێ گشتیێ ئاڤا هەرێما كوردستانێ بۆ رۆژناما ئەڤرۆ ئاشكراكر، گرێبەستا ئاڤا بەردەڕەشێ هاتیە ئیمزاكرن و ب ئەنجامدانا ئەڤی پڕۆژەی، ئاریشەیا ئاڤێ ل سەنتەرێ دەڤەرداریێ و سێ ناوچەداری و 70 گوندان دێ هێتە چارەسەركرن.
ئاری ئەحمەد، رێڤەبەرێ گشتیێ ئاڤا هەرێما كوردستانێ بۆ رۆژناما ئەڤرۆ دیاركر، دەست بجهئینانا پڕۆژەی هاتیە كرن و گۆت: «د شیان دایە د ئێك دەمژمێر دا سێ هزار مەترێن سێجا یێن ئاڤێ بۆ بەردەڕەشێ ڤەگوهێزیت، گوژمێ 428 ملیار دیناران ژی بۆ پڕۆژەیێ ئاڤا بەردەڕەشێ هاتیە مەزاختن، ئێكە ژ پڕۆژەیێن ستراتیژی یێن ئاڤێ ل سنۆرێ پارێزگەها دهۆكێ».
ئاری ئەحمەد گۆتژی: «پڕۆژەیێ ئاڤا بەردەڕەشێ دێ ئاڤێ ل زێی مەزن ل گوندێ دالەڕی بۆ سەنتەرێ دەڤەرداریا بەردەڕەشێ و 70 گوندێن دەڤەرێ و سێ ناوچەداریان دابین بكەت، پشتی پڕۆژە ب دوماهی دهێت، ئاریشەیا ئاڤێ ل سنۆرێ بەردەڕەشێ دێ هێتە چارەسەركرن».
