ئاریشەیا خانیێن زێدەگاڤی ل دەڤەرا ئامێدیێ دێ هێتە چارەسەركرن
ئەڤرۆ
ئامێدیێ، مەحمود نهێلی:
ب سەرپەرشتیا وارشین سەلمان، دەڤــــەردارێ ئامێدیێ و ب بەرهەڤبوونا رێڤەبەرێن ناوچەداریێن سەرسنكێ و بامەرنێ و سەرۆكێن باژێرڤانیێن ئامێدیێ و سەرسنكێ و قەدشێ و بامەرنێ و رێڤەبەرێن گەنجینا ئامێدیێ و چاندنا ئامێدیێ و تێبینەریا تۆماركرنا خانی و بەران ل ئامێدیێ كۆمبوونەك ل دۆر چاوانیا چارەسەركرنا بابەتێ تۆماركرنا خانیێن هاتینە ئاڤاكرن ل سەر ئەردێ باژێرڤانیێ وەك زێدەگاڤی ل دووڤ یاسایا هژمارە 3 یا سالا 2019 ل سنوورێ دەڤەرداریا ئامێدیێ هاتە ئەنجامدان.
وارشین سەلمان، دەڤەردارێ ئامێدیێ بۆ رۆژناما ئەڤرۆ دیار كر، وان د كۆمبوونێ دا ل گەل لایەنێن پەیوەندیدارێن ناوچەداریێن ناڤهاتی بەحس ل چاوانی و رێكار و چارەسەركرنا بابەتێ تۆماركرنا خانیێن زێدەگاڤی ل وان ناوچان كر، ئەوێن بەری نوكە ژ لایێ وەلاتیان ڤە هاتینە ئاڤاكرن و گۆت: «ئەم بەردەوام بزاڤان دكەین بۆ چارەسەركرنا ڤێ ئاریشێ د دەمەكێ نێزیك دا».
