ئاریشەیا وەرگرتنا گەنمێ جۆتیارێن كورد ل نەینەوا هاتە چارەسەركرن
رێڤەبەرێ بازرگانیا دەخلودانێ ل پارێزگەها دهۆكێ دیار كر، ل دووڤ راسپاردەیێن سەرۆكێ حوكمەتا هەرێما كوردستانێ و پارێزگارێ دهۆكێ، وەزارەتا بازرگانی یا هەرێما كوردستانێ ئاریشەیا وەرگرتنا گەنمێ جۆتیارێن دەڤەرێن كوردستانی یێن ب سەر نەینەوا ڤە هاتە چارەسەركر.
نازم مەحمەد عەلی، ریڤەبەرێ بازرگانیا دەخلودانێ ل پارێزگەها دهۆكێ و رێڤەبەرێ سایلۆیا فەیدیێ راگەهاند، پلان هاتیە دانان ئەڤ سالە ب شێوەیەكێ گەلەك رێكخستن دەست ب وەرگرتنا گەنمێ جۆتیارێن پارێزگەها دهۆكێ و ئیدارا سەربەخۆیا زاخۆ بهێتە كرن و چاڤەرێیە ل رۆژا 10/6/2025 دەست ب وەرگرتنا گەنمێ جۆتیارێن پارێزگەها دهۆكێ و زاخۆ بهێتە كرن، ئەڤ سالە پتر ژ 117 هزار تەنێن گەنمی ل هەر چوار سایلۆیێن دهۆكێ دێ هێنە وەرگرتن و دەرگەهێن سایلۆیا شێخان و فەیدیێ و زاخۆ و رۆڤیا بۆ وەرگرتنا گەنمێ جۆتیاران دێ هێتە ڤەكرن.
زێدەتر گۆت: ئەڤ سالە چەندین رێنما بۆ وەرگرتنا بەرهەمێ گەنمێ جۆتیاران هاتنە دەرئێخستن كۆ گەنمێ هاوەردە و كەڤن و بۆیاغكری و دەرمان كریبت ب چ شێوەیەكی نەهێتە وەرگرتن، هەر جۆتیارەكێ پێگیریێ پێ نەكەت، ناڤێ وی ژ پلانا وەرگرتنا گەنمی دێ هێتە دەرئێخستن و بۆ دادگەهێ دێ هێتە رەوانەكرن، ئەم هیڤدارین جۆتیار پێگێر بن و بهایێ گەنمی ژی هاتیە دەست نیشانكرن.
ئاشكرا ژی كر، هێشتا 73 هزار تەنێن گەنمێ ساڵا بۆری د ناڤ سایلۆیێن پارێزگەها دهۆكێ دا ماینە و حوكمەتا ئیراقێ ئەگەر بوویە ئەڤ رێژا گەنمی دناڤ سایلۆیاندا بمینت و گۆت: لیژنەك هاتیە دروستكرن بۆ وەرگرتنا گەنمێ جۆتیاران، هەروەسا لیژنا سكالایان ل هەمی سایلۆیێن دهۆكێ هاتیە دانان، هەر جۆتیارەكێ گۆمان ژ پشكنینا گەنمێ خۆ هەبیت، دێ دوبارە پشكنینا گەنمێ وی هێتە كرن.
