ئاریشەیا 20 سالان یا پەیوەندی و ئەنترنێتێ ل باتیفا هاتە چارەسەركرن
زاخۆ، دلۆڤان هالۆ:
حكومەتا هەرێما كوردستانێ ب ڕێیا چەندین كۆمپانیان ئاریشا پتری بیست سالان یا پەیوەندی و ئەنترنێتێ ل قەزا باتیفا چارەسەر كر و هێلا پەیوەندی و ئەنترنێتێ گەهاندە ١٣ گۆندێن سنووری یێن قەزا باتیفا، ب دانانا بۆرجان و گەهاندنا هێلێن پەیوەندی و ئەنترنێتێ ئێدی خەلك دشێت ب ساناهی پەیوەندیێ ب خێزان و دوست و هەڤالێن خوە بكەن، و دێ بیته ئەگەرێ وێ چەندێ ژی كو زێدەتر گەشتیار قەستا ڤان جهان بكەن.
تاهر ئەحمەد، ئێكە ژ خەلكێ گۆندێ بانكێ بۆ ڕۆژناما ئەڤرۆ دیار كر كو د نوكە دا هێلا پەیوەندی و ئەنترنێتێ یا هاتیە گۆندێ مە و خەلك قەستا ڤێرێ دكەن، بۆ گەشتیاران ژی دێ یا باش بیت چونكی ژبەری نوكە ل دەمێ كو وەرزێ هاڤینێ گەشتیار بۆ جارا ئێكێ دهاتنە ڤێرێ هاتنا خوە نە دكرنە دوو جار چونكی هێلێن پەیوەندی و ئەنترنێتێ ل ڤێرێ نەبوون.
شیمال فەریق، ئێكە ژ خەلكێ گۆندێ منینێ دبێژیت:»ئەم سۆپاسیا حكۆمەتێ دكەین كو ئەڤ ئاریشەیا چەندین سالان ل گۆندێ مە چارەسەركری و هێلا پەیوەندی و ئەنترنێتێ گەهاندیە گۆندێ مە، بتنێ یا مە دڤێت ئەوە كو ڕێكا گۆندێ مە و یا گۆندێن دی بهێتە چێكرن، چونكی ڕێك هەمێ ئاخە و ل وەرزێ هاڤینێ ژبەر هاتنا كۆستەرێن گەشتیاران ڕێك دبنە قەرەبالغ.
فەرهاد مەحموود، هەرێمدارێ قەزا باتیفا گۆت:»پێشتر ئاریشەیا هێلا پەیوەندی و ئەنترنێتێ ل بەهرا پتر یا گۆندێن دەڤەرا مە هەبوون، لێ خۆشبەختانە د نوكە دا ئەو ئاریشە هاتە چارەسەركرن و هێلێن پەیوەندی و ئەنترنێتێ گەهشتینە وان گۆندان و خەلك دشێن پەیوەندیێ ب ئێك و دوو بكەن و مفایی ژ ئەنترنێتێ ژی وەرگرن».
