ئاریشەیێن ل رەمـەزانێ په‌یدادبن دێ چاوا چارەسەرکـەی؟
رۆژیگر تووشی هنده‌ك ئاریشه‌یێن سڤك دبن و دبنه ئه‌گه‌رێ هنده‌ك نه‌خوشیان ژ ئه‌نجامێ كێمبوونا خوارنێ و ڤه‌خوارنێ، ژ گرنگترین وان ئاریشه‌یان ژی:
1- ئێشانا سه‌ری: سه‌رئێشان په‌یدادبیت ژ ئه‌نجامێ كێمبوونا رێژا شه‌كرێ دخوینێ دا ژ ئه‌گه‌رێ راوه‌ستیانێ ژ خوارنا كه‌رسته‌یێن شرین ئه‌وێن دبنه هانده‌ر بۆ به‌رهه‌مئینانا هێزێ یان ژ ئه‌نجامێ راوه‌ستیانێ ژ كارئینانا جگاره‌یان ل ده‌ڤ جگاركێشان یان نه‌ڤه‌خوارنا چایێ و ڤه‌هوێ كو كه‌رستێ كافایین دناڤدا هه‌یه و كارتێكرنێ ل كوئه‌ندامێ ده‌ماران دكه‌ت. چاره‌سه‌ری ژی ئه‌وه كو بێهنڤه‌دان هه‌بیت و گه‌له‌ك له‌شێ خۆ نه‌وه‌ستینن و گه‌له‌ك نه‌چنه ل به‌ر روناهی و دناڤ قه‌ره‌بالغێ دا، ل گه‌ل ڤێ چه‌ندێ ژی باشتره رۆژیگر ته‌ڤاڤیا له‌شێ خۆ ژ تشتێن شرین دماوه‌یێن فتارێ و پاشیڤێ دا وه‌ربگریت.
2- عێلنجی: عێلنجی په‌یدادبن ژ ئه‌نجامێ هاتنه‌خوارا فشارا سروشتی دناڤ رووڤیكان دا، ئه‌وژی ل ده‌مێ مرۆڤ به‌رئاتافی بێهنه‌كا نه‌خوش یان دیمه‌نه‌كێ نه‌جوان دبیت، یان ژ ئه‌نجامێ ئێشانه‌كا دژوار یان وه‌ستیانێ د ماوێ رۆژیگرتنێ دا دبیت، بۆ چاره‌سه‌ریێ نوشدار شیره‌تان ل مه دكه‌ن هه‌ناسه‌یا خۆ هێدی و كوور ب هلكێشین، ب مه‌رجه‌كی كو هلكێشانا بێهنێ ب رێیا دفنێ بیت و به‌ردان ب رێیا ده‌ڤی بیت، و گه‌له‌ك جاران ڤێ كریارێ دوباره بكه‌ن دماوێ رۆژیگرتنێ دا و باشتره سه‌رێ مرۆڤی یێ چه‌ماندی بیت داكو دلرابوون په‌یدانه‌بیت، هه‌روه‌سان شیره‌تان دكه‌ن كو پشتی فتارێ ده‌رزیكێن ( بی 6) بهێنه دانان.
3- گێژبوون: گه‌له‌ك جاران رۆژیگر تووشی گیژبوونا ژ نشكان ڤه دبیت، ب تایبه‌ت هه‌كه ب له‌ز راببیت، بۆ چاره‌سه‌ریێ دشیاندایه رۆژیگر هێدیانه راببیت و گه‌له‌ك ئاڤێ ڤه‌خوت داكو كارێ خولا خویناوی دروست ببیت و بشێت خوینێ پالده‌ت بۆ مێشكی.
4- تێكچوونا دیتنێ: ئه‌وژی پێكهاتیه ژ ته‌نگه‌زاریێن دیتنێ و شێلیبوونا چازان و پشتی رۆژیگر فتارێ دكه‌ت د پتریا جاران دا ئه‌ڤ چه‌نده نامینیت.
5- هشكبوون: ژ ئه‌نجامێ كێمبوونا رێژا ئاڤێ هشكبوون په‌یدادبیت، ئه‌وژی ل ده‌مێ مرۆڤ گه‌له‌ك ل به‌ر تاڤێ ب راوه‌ستیت و ژ نیشانێن وێژی هشكبوونا ده‌ڤی و مرۆڤ حه‌ز دكه‌ت دلێ خۆ راكه‌ت و لێدانێن دلی زێده دهێنه لێدان و زه‌ڤله‌كێن له‌شی دئێشن. بۆ چاره‌سه‌ریێ ژی پێدڤیه ئاڤ و شله‌مه‌نیێن كه‌ل گه‌له‌ك بهێنه ڤه‌خوارن و خوارنێن ترش و تیژ نه‌هێنه خوارن.
