ئازادكرنا ڤەكۆلەرا ئیسرائیلی ژ ئالیێ بەغدایێ ڤە، هیچ گرنگییەك نینە و نابیتە ئەگەرێ نەهێلانا مەترسیێ ل سەر ئیراقێ
ئەندامەكێ لژنەیا ئاسایش و بەرگریێ ل جڤاتا نوونەرێن ئیراقێ د نڤیسینەكێدا مەترسیێن ل سەر ئیراقێ ئاشكرا دكەت و رۆهن دكەت كا بۆچی ئیراق كەفتییە ژێر گەفێن هێرشا ئیسرائیلێ.
ئەحمەد قەرەنی، ئەندامێ لژنەیا ئاسایش و بەرگریێ ل جڤاتا نوونەرێن ئیراقێ ژ فراكسیۆنا پارتی د نڤیسینەكێدا دبێژیت» چەندین سالە ئەوێن د خەما ڤی وەلاتیدا و خەون ب دەستڤەئینانا دەولەتەكا دیموكراسییا خودان پێگەهەكێ نێڤدەولەتیێ رێزلێگرتی دبینن، داخواز دكەن ئیراق تێكهەلی ململانێیێن هەرێمی نەهێتە كرن و نەبیت قوربانا بەرژەوەندیێن ڤی جیرانی و یێ دی، بەلێ مخابن میلیشیا، ژ پێخەمەت گەرەنتیكرنا بەرژەوەندیێن خوە، هەر چ ژ دەستێ وان هاتی خەمساری نەكر، كێمەكا دەستهەلاتدار ل ئیراقێ، میلیشیا وەك چەكەك بۆ دەهان جۆرێن شەڕی بكارئینان، ب رێیا میلیشا شەڕ دژی پێكهاتەیێن ناڤخوەییا ئیراقێ كر، كورد و كریستیان و عەرەبێن سوننە و گەنجێن شۆڕشگێرێن تشرینێ و هەتاكو پشكەكا عەرەبێن شیعی ژی ل شەڕێ میلیشیا د پاراستی نەبوون. هەروەسا ئەو میلیشیا تێكهەلی ململانێیێن هەرێمی هاتنە كرن و برنە سووریێ وشەڕ پێ كر!! ل ناڤخوەیا ئیراقێ هاتنە بكارئینان بۆ مووشەكهاڤێتن و درۆنهەلدان بۆ ناڤخوەیا ئیراقێ و بۆ جهێن دی ژی، ژ وان ژی ئیسرائیل. چەندین جۆرێن قاچاخچییەتا نەقانوونی پێ هاتە كرن و پەترۆلا قەدەغەكرییا وەلاتان ب ناڤێ پەترۆلا ئیراقێ فرۆت ! ل گەل دەهان كارێن خرابكاری یێن دی».
گوت ژی، نوكە ئێدی نێزكە سەرئەنجامێ وان كاران دەردكەڤیت، هێدی هێدی كارڤەدان رۆهنتر دیار دبن، ب ڤی جۆری:
-ئەمریكا هێزێن خوە ژ ئیراقێ دێ ڤەكێشیت و مەیدانا ئیراقێ ب تمامی دێ چۆل كەت و سەرنجا خوە یا سەربازی دێ ئێخیتە سەر هەولێرێ و هەرێما كوردستانێ.
– كۆنگرێسێ ئەمریكی ئەو فەرمانا سەرپشككرنا سەرۆكێ ئەمریكا كو ل سالا 2002 بۆ راگەهاندنا شەڕی ل ئیراقێ دەركری، هەلوەشاند تاكو ئێدی ئەمریكا تێكهەلی شەڕێ ئیراقێ نەبیت.
-ئەمریكا گلۆپا كەسك بۆ ئیسرائیلێ هەلكریە، ئێدی ل شوونا وێ چەندێ ئەمریكا هێرشێ بكەتە سەر میلیشیا، مگرتی هەیە ئیسرائیل هێرشە بكەت و بەرەیەكێ شەڕی ل ئیراقێ ڤەكەت.
-ئیسرائیلێ ب چەندین قووناغان شەڕ دژی گرۆپێن نەیارێن خوە كر، قووناغا ئێكێ ل غەزە، پاشی ل بەرامبەر حزبوللا یا لوبنانی، پاشی رژێما بەشار ئەسەد هاتە ژناڤبرن، پاشی حوسیێن یەمەنێ، ئێدی هەموو مگرتی دبێژنە مە دۆرا ئیراقێیە !
ناڤبری ئاماژە ب وێ چەندێ ژی كریە» مخابن ل بەرانبەر زێدەبوونا وان گەفان، حوكمەتا فیدرالییا ئیراقێ پێنگاڤێن كریاری ناهاڤێژیت بۆ رزگاركرنا ئیراقێ ژ وێ مەترسییا روو ب روو بووی، چونكە هەكە پێنگاڤێن كریاری ب هاڤێژیت، پێدڤیە داخوازیێن ئەمریكا بجهبینیت كو داخوازكریە میلیشیا بهێنە هەلوەشاندن، لەوما بێی بجهئینانا وێ داخوازییا ئەمریكا، هەر كارەكێ دی بهێتە كرن، هەتاكو ب ئازادكرنا خانما ڤەكۆلەرا ئیسرائیلی ژی، هیچ گرنگییەك نینە و نابیتە ئەگەرێ نەهێلانا مەترسیێ ل سەر ئیراقێ».
ل دووماهیێ ژی دبێژیت» پێدڤییە حوكمەتا فیدرالی وێ چەندێ بزانیت كو ئیراق ل بن گەفێن هێرشا ئیسرائیلێ دایە، هەكە پێنگاڤێن ب لەز نەهاڤێژیت بۆ دوورئێخستنا وێ مەترسیێ، دڤێت ب كێمی هەلسەنگاندنێ بۆ وێ چەندێ بكەت ئایا هەكە ئیسرائیلێ هێرش كر، دێ ئیراق شێت چ كەت؟ ئایا ب چەند وان درۆن و مووشەكێن نەقانوونی یێن میلیشیا ئەوێن ل ڤێرێ و وێراهە بۆ هێرشكرنێ ل سەر ڤی و یێ دی بكاردئینن، دێ شێن روو ب روویێ دەولەتەكا ب هێز وەكو ئیسرائیلێ بن؟ ئایا هەكە شەڕەكێ ب وی شێوەی روو بدەت، دێ شەڕێ هەموو ئیراقییان بیت یان تنێ شەڕێ كێمەكا د ناڤ پێكهاتەیێ عەرەبێن شیعە ل ئیراقێ دژی ئیسرائیلێ؟ چونكە هیچ پێكهاتەیەكا دی و هەتاكو پشكەكا پێكهاتەیێ عەرەبێن شیعی ژی ل گەل وان جۆرە شەڕان نینن كو ئەنجام هەر ژ دەستپێكێ یێ دیارە».
