ئازادکرنا کەرکووکێ یان سلێمانیێ؟!
کامی کمال
ھەر چەندە ل بەر (ناپاکی) خیانەتێن 16 ئۆکتۆبەرێ دا ڕوودانێن ئازاربەخش و نەخوەش د لاپەرێن دیرۆکا کوردان دا ھاتنە تۆمارکرن و لایێ مەعنەوی و ماددیێ خەلکێ کوردستانێ ڕاستی ھەڕفتنەکا مەزن بوو، لێ د ڕاستی دا ب تنێ پرسگرێکا کوردستانێ بۆ ڕاگەھاندنا دەوڵەتا سەربخوە دانپێدانا نیڤدەوڵەتی نەبوو، بەلکی پرسگرێکا سەرەکی کو ب ڕاستی گرێیەکا مەزنە بۆ نوکە و پاشەڕۆژا دەوڵەتا کوردستانی (ئەگەر ھاتە ڕاگەھاندن) ئەوە کو سلێمانیێ و گەرمیان و ھەمی ئەو دەڤەرێن ب ناڤ ل ژێر دەسەلاتا یەکێتیێ دا، د جەوھەر دا ل ژێر دەسەلاتا ئێرانێ دا بوون و ب چ ئاوایەکێ یەکێتی نەدشیا ھەتا ڕێڤەبەرێ ناحیەکێ ژی بگوھۆڕیت، ھەکە ژ لایێ ئیرانێ ڤە پشتگیریا ڕێڤەبەرێ ناحیێ ھاتبا کرن و ھەر بڕیار و ھەلویستەکێ حوکمەتا ھەرێما کورستانێ ل سلێمانی ب ناڕاستەخوە ب دەستتێوەردان دھاتە ھەژمارتن ژ لایێ دەسەلاتا ئیرانی ڤە ل سلێمانیێ!، واتە ئەگەر خوە نەخاپینین و ل گەل ھەڤدو دڕاستگۆ بین نیڤەکا کوردستانا باشۆر ھێشتا یا داگیرکریە ژ لایێ وەلاتێ ئیرانێ ڤە و دەھان بنکەو بارەگایێن ئیتیلاعاتا ئیرانێ ژی ل سلێمانیێ ب ئەکتیڤی کار دکەن، لەوما بەری کو کوردستان دەوڵەتا کوردستانی ڕابگەھینیت پێدڤیە ئەڤان دەڤەران ب ھەر ئاوایەکێ بیت بینیتە ژێر دەسەلاتا حوکمەتا ھەرێما کوردستانێ ڤە، پشتی کو ل 16 ئۆکتۆبەرێ پشکەکا سەرکردەیێن (یەکێتی نیشتیمانی کوردستان) کەرکووک ڕادەستێ دوژمنێن ئازادی و سەرخەبوونا کوردستانێ کری، ھاتە سەلماندن کو ئەو سەرکردە ب چ ئاوایەکێ سەر ب کوردایەتیێ ڤە نینن، بەلکی یێن ئاراستەکری (مەئمور)ێن وەلاتەکێ داگیرکەرن و بۆ سەرکەفتنا نەخشە و پلانێن داگیرکەر و دوژمنێن کوردان ڕۆلەکێ مەزن و ئێکلاکەرەڤە یا ھەی، پێدڤی ناکەت نڤیسەر و رەوشەنبیر و حزبێن دیتر یێن کوردستانێ خوە بخاپینن و ئەڤان ڕاستیێن مە بەحس لێ کری ڕەد بکەنەڤە، ڕەدکرنا ڤان ڕاستیان پشتگیریەکا مەزنە بۆ خیانەتکاران و کاریگەریەکا خراب دئێخیتە سەر پاشەڕۆژا کوردستانێ، کورد ب تنێ پێنگاڤەک مابوو بگەھنە مەزنترین ئارمانجا خوە کو ئەو ژی دەولەتا کوردستانی بوو، لێ دەسەلاتدارێن سلێمانیێ یێن یەکێتیێ ب ئاشکەرایی مل ب ملێ دوژمنێن سەرسەختێن کوردستانێ مەزنترین قوربانی دا ب تنێ کو ئەو ئارمانجا کوردان نەھێتە دی و ژناڤ بچیت!، ئەڤ ڕاستیە ژ لایێ سەرکردەیێن کوردپەروەرێن یەکێتیێ ژی ھەم کۆسرەت ڕسوول و ھەم نەجمەدین کەریم و ھەم مەلا بەختیار ژی ھاتنە پشتڕاست کرن.
د ڕاستی دا نە مالباتا برایم ئەحمەد و نە مالباتا تالەبانی و نە چ سەرکردەیێن دیتر یێن سلێمانیێ ئەو شیان نەبوون ھەستا کوردایەتیێ و ڤیانا سەرکردە و بزاڤێن شۆڕشگێری و خەموخۆرێن کوردستانێ لاواز بکەن، لێ ئەو کاریگەری یێن کەلتۆری یێن نێگەتیڤ کو ل ھەستا نەتەوەیی و کوردایەتیێ ل سلێمانیێ چێبووی، ھەمی ژ ئەنجامێن پلان و بەرنامەیێن ئیرانێ نە، نەک ژیری و زیرەکی یا ڤان کەسان، ئەڤ کەسە ب تنێ کرێ گرتی و کارکەرێن تەھرانێ نە، ب مخابنیڤە ئیرانێ ل وان دەڤەرێن کوردستانێ گەلەک ژ ئەنجامێن خوە یێن پێکای، تا ڕادەیەکێ کو خەلکێن وان دەڤەران د بەرھەڤ بن قوربانیێ بۆ وەلاتفرۆشەکا مینا ئالا تالەبانیێ و لاھۆرەکێ بدەن کو زۆر ب ئاشکەرا شانازیێ ب عیراقچیەتیێ و نووری مالکی مەزنە دووژمنێ کوردان دکەن. ل سەردەمێ ژێردەستیا بەعسیان ڤە جاش و ولاتفرۆشان پێگەھەکێ نەفرەتی و خراب د ناڤ دەروونێ خەلکێ کوردستانێ دا ھەبوو، لێ ب شارەزایی و زیرەکیا ئیرانێ ل وان دەڤەرێن کونترۆل کری ئەو نەفرەت و خرابی ھاتە گۆھارتن بۆ ڤیانێ و باش دیتنێ!، ل شوونا وێ چەندێ سەرکردەیێن دلسوز و کوردپەروەر نەفرەتی و خراب ھاتنە چاندن!. ئەڤ چەندەژی ب ڕاستی کارەساتەکا مەزنە و ئەرکەکێ دژوار و ب زەحمەتە ھەتا کو دەسەلاتا کوردستانێ بشێت دوبارە کوردایەتیێ ل شوونا دوژمن دۆستیێ بچینیتەڤە. ژ بۆ چارەسەریا ڤان کێشەیێن مەزن پێدڤیە د پاشەرۆژێ دا کورد مفایەکا دروست و باش ژ دەلیڤەیان وەربگرن، مینا دیار گۆھارتنێن سەربازی یێن مەزن دێ ل دەڤەرێ چێبن، پترین بۆچوون بۆ وێ چەندێ دچن کو ب دربا سەربازی دەڤەرێن ھاتیە داگیرکرن ژ لایێ عیراقێ ڤە بھێنە ئازادکرن، پشتڕاستم بێ دربا سەربازی ئەو کەسێن ناپاک کو بۆینە پۆلیسێن ئیرانێ ناھێنە ژناڤبرن، و ھەتا ئەو پۆلیسێن ناپاکیێ ل سەر رێکێ نەھێنە لادان مەحالە حوکمەتا ھەرێمێ بشێت ئەو کەلتۆرێ مەترسیدار کو دووژمنان چاندی ژناڤببەت.
