ئازاد ئه‌حمه‌د: پێكهاتیێ تیمێ به‌ره ب قۆناغێن دووماهیێ یه
ئه‌ڤرۆ،
د داخویانیه‌كێدا سه‌رپه‌رشتێ تیما ته‌پا پێی یا یانا دهۆكێ بۆ رۆژناما ئه‌ڤرۆ دیاركر كو پێكهاتیێ تیما ئه‌وا به‌رهه‌ڤیا دكه‌ت بۆ وه‌رزێ نوو یێ خولا پلا ئێكا ئیراقێ و به‌ره ب قۆناغێن دووماهیێ چوویه و د ڤێ حه‌فتیێ دا دو یاریا ل هه‌ولێرا پایته‌خت ئه‌نجامده‌ن.
زێده‌تر ئازاد ئه‌حمه‌د گوت: پشتی بۆ ماوێ دو حه‌فتیان تیما مه یا ته‌پا پێی ب سه‌رپه‌رشتیا راهێنه‌ر عادل ناسر به‌رهه‌ڤیێن خوه بۆ وه‌رزێ نوو كرین و تاقیكرنا بۆ چه‌ندین یاریزانا كرینه ژبۆ باشترین شێوه یێ وه‌رزێ نوو تا راده‌یه‌كێ به‌رچاڤ پێكهاتیێ تیمێ به‌ره ب قۆناغا دووماهیێ چوویه و دبیت بتنێ یاریزانه‌كێ (ئیرتیكاز) خوه‌جهـ ل سه‌ر تیمێ زێده‌كه‌ین، گه‌شبینم دێ وه‌كو تیمه‌كا هه‌ڤڕك پشكداری خولا پلا ئێك بین و ب ئارمانجا ده‌ربازبوون بۆ پلا نایاب هێنه دناڤ خولێ دا، هه‌رچه‌نده ده‌ستپێكێ مه راگه‌هاند بوو چه‌ند یاریزانێن پیشه‌كار ژی ل سه‌ر تیمێ زێده‌كه‌ین لێ وه‌كو دیاركر ئه‌وێن هاتین لدووڤ ئاست و شیانان نه‌بوون و كادرێ راهێنانێ رازی نه‌بوو هه‌ردیسان ژبه‌ركو ل وه‌رزێ بوری ئه‌م كه‌فتبووینه ئاریشێن پیشه‌كاران كو چو مفا ژێ نه هاتبوو وه‌رگرتن بۆ وه‌رزێ ئه‌ڤ ساله دێ ب هه‌ستیاری دووڤچوونێ كه‌ین هه‌رده‌مێ راهێنه‌ر ژ پیشه‌كاره‌كی رازی بیت دێ دانكوستاندنێ ل گه‌ل كه‌ین و گرێبه‌ستا وی ئیمزاكه‌ین.
ژلایه‌كێ دیڤه ناڤهاتی دیاركر دڤێ حه‌فتیێ دا دێ ل هه‌ولێرا پایته‌خت دو یاریێن هه‌ڤالینی ئه‌نجامده‌ن ل گه‌ل هه‌ر ئێك یانا هه‌ولێر رۆژا سێ شه‌مبی و پێشمه‌رگا هه‌ولێرێ رۆژا پێنچ شه‌مبی و بۆ حه‌فتیا بهێت دێ به‌رده‌وامیێ ده‌ینه راهێنان و یاریێن هه‌ڤالینی هه‌تا ب گه‌هنه ئاستێ پێدڤی و گوت: ژبه‌ر كاودانێن دارایی د لاوازن و رێكێ ناده‌ن كه‌مپێ ده‌رڤه‌یی كوردستانێ هاتیه هه‌لوه‌شاندن لێ دێ هه‌موو بزاڤا كه‌ین هه‌ر تشته‌كێ پێدڤی لدووڤ شیانا بۆ تیما خوه به‌رهه‌ڤبكه‌ین.
