ئازاد محه‌مه‌د: د خولا كوردستانێ دا حه‌فتیه‌كا سه‌ركه‌فتی بوو
ئه‌ڤرۆ، قه‌یس وه‌یس
فۆتۆ: لاوك سلڤن
د داخویانیه‌كێ دا ئه‌ندامێ ئێكه‌تیا ته‌پا پێی یا كوردستانێ دیاركر ب ئه‌نجامدانا شه‌ش یاریان ژ ده‌ستپێكا وه‌رزێ نوو یا خولا پلا نایابا كوردستانێ ب سه‌ركه‌فتیانه بێ ئاریشه بڕێڤه چوو و ئاستێن جودا هاتینه دیاركرن.
زێده‌تر ناڤهاتی بۆ رۆژناما ئه‌ڤرۆ گۆت: ب خوه‌شحالی ڤه ل پرانیا باژێرێن هه‌رێما كوردستانێ وه‌رزێ نوو یێ خولا پلا نایابا كوردستانێ بێ ئاریشه بڕێڤه‌چوون بتنێ سه‌رجه‌مێ شه‌ش یاریان دا دو خه‌له‌تیێن بچووك هه‌بوون ئه‌و ژی دێ ژلایێ لژنا دادڤانان سه‌رده‌ریێ ل گه‌ل دادڤانێن هه‌ردو یاریان هێنه كرن، لێ ب گشتی پێخووشحالین ده‌ستپێكا وه‌رزێ نوو یا سه‌ركه‌فتی بوو ژ لایێ رێكخستنی و ئاستێ تیمان كو ل دووڤ راپۆرتێن سه‌رپه‌رشتیان پرانیا وان دیاربوو كو ئاسته‌كێ جوان و هه‌ڤڕكی د هاته پێشكێشكرن.
ژلایه‌كێ دووڤه ئازاد محه‌مه‌د ئه‌وچه‌نده ژی دیاركر كو رۆلێ سه‌رپه‌رشتیار و دادڤانێن پارێزگه‌ها دهۆكێ ب ڕێڤه‌برنا یاریان دا ب باشی هاتیه هه‌لسه‌نگاندن و شیان ب سه‌ركه‌فتیانه كارێ خوه بكه‌ن و گۆت: هیڤییا من ئه‌وه هه‌موو دادڤان و سه‌رپه‌رشتێن یاریان ل پارێزگه‌ها دهۆكێ به‌رده‌وام ب ده‌نه ئاست و شیانێن خوه و ل دووڤ رێنما و یاسا كاربكه‌ن پێخه‌مه‌ت بلندكرنا ئاست و شیانێن پارێزگه‌هێ.
