ئازاد محه‌مه‌د: پاشئێخستنا سێ یاریێن خولێ چو كارتیكرنێ ل چالاكیان ناكه‌ت
ئه‌ڤرۆ،
د داخویانیه‌كێدا ئه‌ندامێ ئێكه‌تیا ته‌پا پێی یا هه‌رێما كوردستانێ دیاركر بڕیارا پاشئێخستنا سێ یاریێن مایی ژ چارچووڤێ هه‌ڤڕكیێن گه‌ڕا هه‌شتێ بۆ یانێن پلا نایاب ژ نه چاری بوو تایبه‌ت پشتی پێشهاتێن ڤێ دووماهیێ ل باژێرێ‌َ سلێمانیێ په‌یدابووین.
زێده‌تر ئازاد محه‌مه‌د بۆ رۆژناما ئه‌ڤرۆ گوت: هه‌رچه‌نده بڕیاربوو ل ئه‌ینیا بوری هه‌ڤڕكیێن گه‌ڕا هه‌شتێ یا خولا پلا نایاب ب دووماهی هاتبان لێ ژبه‌ر ئه‌وان كاودانێن ل باژێرێ سلێمانیێ هاتینه پێش و ژبۆ سه‌لامه‌تیا شاندێن یانێن وه‌رزشی و لدووڤ داخازیا هنده‌ك یانا ب فه‌رمی سێ یاریێن خولێ هاتبوونه پاشئێخستن ئه‌وژی، دهۆك- نه‌وروز، سه‌ید سادق- برایه‌تی، چه‌مچه‌مال ل گه‌ل پێشمه‌رگا هه‌ولێرێ، لێ بۆ حه‌فتیا بهێت دێ یاری به‌رده‌وامبن و لیستا یاریێن گه‌ڕا نه‌هێ هاتینه به‌لاڤكرن كو چارشه‌مبی و پێنچ شه‌مبیا بهێت هێنه ئه‌نجامدان و ئه‌و سێ یاریێن مایی ژ گه‌ڕا هه‌شتێ ده‌مه‌كێ دی بۆ هێته ده‌ستنیشانكرن.
ژلایه‌كێ دووڤه ناڤهاتی ئه‌وچه‌نده ژی دیاركر ژڤانێ یاریێن خولا پلا ئێك یا ته‌پا پێی و پلا نایاب بۆ فۆتسالا كچان دێ لدووڤ ده‌مێ خوه یێ ده‌ستنیشانكرێ هێنه كرن بتنێ پێشبینی دهێته كرن كو وه‌رزێ نوو یا خولا پلا دو ژ ده‌هێ هه‌یڤێ بۆ پێنجێ هه‌یڤا كانوونا ئێكێ یا سالا 2022 پێشڤه بهێت ئه‌وژی ژبه‌ر به‌رنامه‌كێ رێكخستی یه.
