ئازاد محەمەد بوو نوونەرێ پارێزگەھێ د ئێکەتیا تەپاپیێ دا
ئەڤرۆ،
دوھی د کۆنگرەیێ رۆژنامەڤانی دا سەرۆکێ ئێکەتیا تەپاپیێ یا کوردستانێ سەفین کانەبی دەستکارکێشانا خوە و ھەر چار ئەندامێن ئێکەتیێ راگەھاند کو پێکھاتی بوون ژ سەلام حسێن، قاسم سالح، سیروان نەجمەدین و دلشاد سالح و لدیڤ بڕیارا وەزارەتا رەوشەنبیری و لاوان ھەر ئێک ژ تارق عەبدولرەحمان وەکو سەرۆک و عەبدولقادر حسێن، ئازاد محەمەد سەعید، وەکو ئەندام بۆ جھێ وان ھاتینە دەستنیشانکرن.
ئازاد محەمەد سەعید کوڕێ باژێرێ ئاکرێ یە و کەسەکێ شارەزا د بوراێ وەرزشێ دایە وەکو نوونەرێ پارێزگەھێ ھاتیە دەستنیشانکرن ژبۆ پرکرنا پۆستێ ئەندامەتیێ ل جھێ نوونەرێ بەرێ یێ پارێزگەھێ قاسم سالحی ڤە ژبۆ برێڤەبرنا کاروچالاکیێن ئێکەتیێ پشتی رێڤەبەریا وەرزشی ل پارێزگەھێ و نوونەراتیا دھۆک یا لژنا ئۆلۆمپی یا کوردستانێ و ئێکەتیا تەپاپیێ تایێ دھۆکێ پەسەندکرین.
ژلایەکێ دیڤە سەرباری ئەوان دەنگۆباسێن ھاتینە بەلاڤکرن کو عەبدوللا جەلالەدین سکرتێرێ یانا ئافرەتێن دھۆکێ بەربژێرێ پارێزگەھێ ھاتبوو دەستنیشانکرن لێ لدیڤ داخویانیا وی بۆ رۆژناما ئەڤرۆ دیارکر کو داخوازا لێبورینێ کریە ژبەر چەند ئەگەرێن تایبەت ب وی ڤە گرێدایی و گوت: سۆپاسیا رێڤەبەریا گشتی یا وەرزشی ل ھەرێما کوردستانێ و نوونەراتیا لژنا ئولۆمپی کو ئەز ژ ھەژی ڤێ پۆستێ کریمە لێ کاودان ھاریکار نینن بۆ ب رێڤەبرنا ڤی کاری و ب ھیڤیا وێ یەکێ دێ ل جھەکێ دی کارەکێ باشتر بۆ خزمەتا وەرزشا کوردستانێ و پارێزگەھا دھۆکێ کەم.
بۆ زانین ئێکەتیا تەپاپیێ یا کوردستانێ ل سالا ٢٠٠٥ێ ھاتیە دامەزراندن و سەفین کانەبی ھەر ژ دەستپێکا وێ سەرۆکاتیا وێ دکر.
