ئازارێن ژ دەستدانێ
فەهیما ئیبراهیم
بەرێ وی ل ئاسمانان بوو و دەستێ خوە دانا سەر پرچا وی و گۆت:
– ئەم د بەرزەبوونێدا دبەرزەنە، دناڤبەرا هەستێن خوە و تەحلاتیا كەتواریدا پتر بەرزەدبن، دناڤبەرا ژیانێ و مرنێدا، دناڤبەرا راستیێ و نەوەیێدا. خوەزی مافێ ڤەگەراندنا دەمی هەبا، ب تنێ دا چەند كێلیكێن ب سالان دهێنە هژمارتن دگەل وێ ڤەگەرینم.
خوناڤێ بەلگێن دارا شۆڕكرینە، بایەكێ تەزی ل دۆر من دزڤڕت، لەرزین ب سەر جەستەیێ من دا دهێتەخوار، ئەڤە دەمەكە ل سەر ڤێ كورسیكێ یێ روینشتیمە، حەزدكەم بچم، لێ مەرەقێ وەل من كرییە پتر گوهدانا ڤی كەسێ ل ئالیێ دی روینشی بكەم، ئەڤە دەمەكە یێ ناخێ خوە ژ ئازاران ڤالا دكەت، هزردكم برینەكا كویر د ناخێ ویدا دەربوویە.
من بهیست دەمێ دگۆت:
– هزردكەم تارییا شەڤا من یا جیاوازە، ئەو نە ئاشۆپەك بوو، نە درەوەك بوو، ئەو راستیەك بوو هەڤال، من ئەو ب چاڤێن دلێ خوە ددیت، نوزانم هێشتا بێ وێ من ژیانەك مایە؟ نوزانم چەوا وەكهەڤیێ دناڤبەرا ئاشۆپ و كەتواری دا بكەم، چ تشت مینا جاران ڤەناگەڕن، جاران پێدڤییە ژبیركرنێ بكاربینی بۆ لادانا هندەك ئازاران و ئەز نە یێ شارەزامە د ڤێ چەندێدا. ژ دەستدانا هندەك كەسان، ژ دەستدانا گیانییە. هەستێن من مینا بیابانەكا هشك و بێ رح لێهاتینە. خالا لاوازییا من ژ دەستدانا وێ بوو، گەلەك جاران ڤێ پرسیارێ ژ خوە دكەم، ئەڤ هێزە ژ كیڤە هاتییە كو بشێم بێ وێ بەردەوامیێ ب دەمە ژیانێ. ب كەنییەكا چێكری بۆ هەر كەسی دگڕنژم، جاران ژی پرسیاردكەم چەوا! ئانكو دگەل خوە دبێژم من ئەڤ هێزە ژ كیڤە پەیداكرییە دا بێی وێ بەردەوام بم. د دەمەكیدا وێ هێزا ژیانێ بم دبەخشی.
ڕوژ زیز ببوو، جاران تیرۆژكێن خوە بەرددان و جاران ژی خوە ل پشت هەوران غەوارەدكر، بایێ تەزی لەرزك دئێخستە جەستەیێ من، حەزا من بۆ گوهداریكرنێ رێ ل من دگرتن، من مەرەق دكر داویا سەرهاتییا وی بزانم. نزانم ئەو هەستە چاوا بۆ من چێبوو كو گوهێن خوە بۆ بهیستنا گۆتنێن وی پتر بەل كەم. من بهیست دگۆت:
– رۆژانە ل شینوارێن خوە و وێ دگەرم، سەیرە خوە هاڤی دبینم، هزردكەم ئەڤ رێیە هەردەم پرسیارا وێ ژ من دكەن، گۆمانا دبەم هەروەكو ئەڤە نە ئەو جهن یێن مە رۆژانە پیاسە لێ دكرن، یێ بوویمە ئێخسیرێ بیرهاتنان، بیرەوەریێن من و وێ، من ئازار ددەن، ژ دەستدانا وێ، ژ دەستدانا هیڤیێن من بوو، چەند هەول بدەم باوەریێ بۆ خوە چێكەم كو هێشتا ژیان بەردەوامە، لێ چوونا وێ یا ژ نیشكەكێڤە باوەریا من سەرژنووڤە شكاند.
– رۆژ یا كارێ غەوارەبوونێ دكەت تیرۆژكێن وێ ژ زەراتییێ بەرەڤ سۆربوونێ ڤە دچن، مینا پەلەكا ئاگری خویا دكەت، چ نە مایە دێ ئاڤا بت، حەزدكەم بەری تاریاتی باژێری داگیركەت، بەرەڤ مال ڤە بچم، لێ مەرەقا گوهداریكرنێ ئەز كوشتم. دیارە من خوە ب هەڤخەمێن وی دزانی، من هەست ب ئازارێن وی دكر. وی دگۆت:
– دوماهیك جار ل سەر گۆڕێ وێ من سۆزدا ئێدێ بەرەڤ ژیانێ ڤە بچم، نوزانم چما هەردەم حەزدكەم ژ راستیەكا تال ب رەڤم، حەزدكەم فێری شارەزاهیێن ژبیركرنێ ببم، حەزدكەم هشێن خوە ژ هەموو هزرێن نەرێنێ ڤالاكەم، حەزدكەم هەموو بیرهاتنێن وێ یێن من ژ ژیانێ ڤەدەر دكەن د قولاچەكا دلێ خوەدا ڤەشێرم، لێ ژ ترسا هەستكرن ب خیانەتێ نەوێرم، هەست پێ دكەم هەر چركەیەك بێی هزرێن وێ خیانەتێ ل وێ دكەم. دوبارە ڤەدگرم بۆ خالا دەستپێكێ، ڤەدگەڕمە مێژوویا ژ دەستدانا وێ، هەر وەكو ئەو مێژویە د بیردانكا مندا ئاسێ بوویە و نا دەركەڤت. دەمێ تاریاتیا شەڤێ بەرەڤ منڤە دهێت، ب بێنفرەهی هزرێن وێ دكەم، هەموو هزر د جێوازن، ئەڤە دەمەكێ درێژە كاودان ژیانا من ل پەی خوە برێڤە دبن، من دەست ژ هەر تشتەكی بەردایە، من هێلایە وەك وێ دڤێت بكەت، جاران مینا بارۆڤەكا بهێز من ل دۆرخوە دزڤڕینت و جاران ژی ب دلرەقییا خوە من پارچە پارچە دكەت، خوە ڤەدەر دبینم ل جهەكی نە جهێ من. ل داوی ژی هەست ب بەرزەبوونێ دكەم، دزانم د ناڤ بیرهاتنێن وێ دا یێ بەرزەمە.
رۆژ ئاڤابوو، كتوماتێن ستێران ل پشت عەورێن رەش خویا دبوون، بێدەنگییێ جهـ داگیركر، من مەرەقا دیتنا وی كەسی كر یێ ئەڤە پتری دانەكێ رۆژێیە ب بێدەنگێ گوهدارییا وی دكەت، سەرنجا من راكێشا. رابوومە سەر خوە و ل پشت وێ تراشا بوویە رێگر دناڤبەرا من و وان دا زڤڕیم، تشتێ من دیتی گەلەك یێ سەیر بوو! دناڤ وەلاتەكێ پتری نۆت ملیۆن كەسان لێ دئاكنجی، ڤی مرۆڤی چ كەس نە دیتن دەردێ دلێ خوە بۆ ڤەكەت، ئەڤە پتری دانەكێ رۆژێیە یێ ب كەلێجانەكا مەزن ئازارێن خوە بۆ سەیێ خوە دبێژت، و سە ژی ب دلەكێ بەرفرهـ یێ گوهدارییا وی دكەت.
ب تنێ من ئەو پارچا رەشبین ددیت، نهو بۆ من ئاشكرا بوو خەمێن من بەرامبەر یێن ڤی گەلەك د سڤكن، چ نەبت دووركەتنا من دەمەكە و دێ بۆرت، ڤالاهیێن گیانی ب دووركەتنا وان ب چ پر نابن، نهو ژی ل بەندا هەڤدیتنەكێ مە دوبارە ژیانێ بۆ جەستەیێ من ڤەگەڕینت.
