ئاسانكاری بۆ هاتنوچوونا وه‌لاتیان د ناڤبه‌را هه‌رێم و ئیرانێ دا دهێنه كرن
هه‌ولێر، قائید میرۆ:
به‌رپرسه‌كێ حوكمه‌تا هه‌رێما كوردستانێ ئاشكرا كر، هه‌موو ئاسانكاری بۆ هاتنوچوونا وه‌لاتیان دگه‌ل وه‌لاتێ ئیرانێ هاتینه كرن و رۆژانه سێ هزار وه‌لاتی هاتنوچوونێ دكه‌ن و دبێژیت: رێكارێن هاتنوچوونێ وه‌ك به‌رێ نه‌ماینه و بووینه ئه‌گه‌رێ گه‌شه‌كرنا كه‌رتێ گه‌شتیاری و بارزگانی.
عه‌بدولا ئاكره‌یی، به‌رپرسێ په‌یوه‌ندیێن هه‌رێم و ئیرانێ بۆ رۆژناما ئه‌ڤرۆ دیار كر، ئاسانكاری بۆ هاتنوچوونا وه‌لاتیان د ناڤبه‌را هه‌رێما كوردستانێ و كۆمارا ئیسلامیا ئیرانێ دا هاتینه كرن و گۆت: “ئه‌ڤه بوویه ئه‌گه‌رێ بلندبوونا رێژا گه‌شتیاری و بازرگانی د ناڤبه‌را هه‌رێم و ئیرانێ دا، رۆژانه سێ هزار كه‌س هاتنوچوونێ دكه‌ن، چونكی مه‌رجێن به‌رێ ل سه‌ر هاتنوچوونێ هه‌ین، نه‌ماینه و هه‌موو ئاسانكاریه‌ك دهێته كرن، مه‌رجێن به‌رێ ژی ئه‌گه‌رێن ڤایرۆسێ كۆرۆنایێ بوون، حوكمه‌ت نه‌چاربوو رێكارێن ساخله‌میێ بۆ پاراستنا ژیانا وه‌لاتیان بجه بینیت”.
عه‌بدولا ئاكره‌یی گۆتژی: “رۆژانه هاتنوچوون بشێوه‌یه‌كێ ئاسایی بڕێڤه دچیت و رێگری نینه بۆ هاتنوچوونا هه‌ر كه‌سه‌كی، زۆربه‌یا گه‌شتیارێن ل ئیرانێ ژی سه‌ره‌دانا هه‌رێما كوردستانێ دكه‌ن ل ده‌ڤه‌رێن رۆژهه‌لاتێ كوردستانێنه و سیاسه‌تا حوكمه‌تا هه‌رێما كوردستانێ ژی ئه‌ڤه‌یه، زێده‌تر گرنگی ب په‌یوه‌ندیێن د ناڤبه‌را هه‌رێما كوردستانێ و هه‌موو وه‌لاتێن جیهانێ دا بهێته‌دان”.
