ئاسایشا زاخۆ زێرینگره‌ك و خودانێ ده‌رمانخانه‌یه‌كێ ره‌وانه‌ی دادگه‌هێ كرن
زاخۆ، عه‌لی حاجی:
به‌رپرسێ هۆبا ئابووری ل رێڤه‌به‌ریا ئاسایشا زاخۆ بۆ رۆژناما ئه‌ڤرۆ دیار كر، وان د ده‌مێ هه‌یڤه‌كێ دا پێنج كه‌س ره‌وانه‌ی دادگه‌هێ كرینه و پێنج كه‌س ژی ب گوژمێن پاره‌ی سزاداینه.
عه‌قید غازی مه‌سته‌فا، به‌رپرسێ هۆبا ئابووری ل رێڤه‌به‌ریا ئاسایشا زاخۆ گۆت: “پشتی پێزانین گه‌هشتینه به‌ر ده‌ستێ مه كو زێرینگره‌ك ل باژێرێ زاخۆ سه‌خته د عه‌یارا زێری دا كری یه و عه‌یارا وی كێم كری یه، ئێكسه‌ر مه دووڤچوونا بابه‌تی كر و راستیا بابه‌تی دیار بوو، كو ئه‌و كه‌سه ب وی كاری رادبیت، له‌وما كه‌یسا وی زێرینگری بۆ دادگه‌هێ هاته ره‌وانه‌كرن و جهێ وی ژی هاته دائێخستن، دیسا ب رێیا زالگه‌ها شیناڤا ل زاخۆ ئه‌م شیاینه دو كه‌سان ده‌سته‌سه‌ر بكه‌ین، كو 80 كارتۆنێن شیرێ زارۆیان یێ ده‌م ب سه‌رڤه‌چوویی دگه‌ل وان دا بوون، كه‌یسا وان ژی بۆ دادگه‌هێ هاتیه ره‌وانه‌كرن، دیسا ڤه‌كوشتنا گیانه‌وه‌ران ل به‌ر ده‌ریێ دكان و مالان قه‌ده‌غه‌یه، به‌لێ گوشتفرۆشه‌ك ل باژێرێ زاخۆ راببوو ب ڤه‌كوشتنا گیانه‌وه‌ران ل به‌ر ده‌ریێ دكانا خوه، ژ به‌ر هندێ ژی ئه‌و كه‌سه بۆ دادگه‌هێ هاته ره‌وانه‌كرن و دادگه‌هـ دێ كه‌یسا وی ئێكلا كه‌ت”.
ناڤبری گۆتژی: “تیمێن مه شیاینه عمباره‌كا ده‌رمانان یا نه‌یاسایی د ناڤ سه‌نته‌رێ زاخۆ دا ده‌ست ب سه‌ردا بگرن، ژ به‌ركو چه‌ندین ده‌رمانێن ده‌م ب سه‌رڤه‌چوویی و نه‌یاسایی تێدا بوون، خودانێ وی جهی ژی بۆ دادگه‌هێ هاته ره‌وانه‌كرن”.
عه‌قید غازی ل دووماهیێ گۆت: “مه ب ب هه‌ڤكاری دگه‌ل لژنا هه‌ڤپشك یا ده‌ڤه‌رداریا زاخۆ پێنج خودانێن موه‌لیده‌یان هه‌ر ئێك ژ وان ب گوژمێ 500 هزار دیناران سزادان، پشتی وان ڤولتیا كاره‌با موه‌لیده‌یێن خوه كێمكرین”.
