ئاسته‌نگ د رێكا بجهئینانا ماسته‌ر پلانا شنگال دا هه‌نه
ئه‌ڤرۆ، دووڤچوون:
قایمقامێ قه‌زا شنگال دیار كر، ئیدارا شنگال دگه‌ل حكومه‌تا هه‌رێما كوردستانێ و نه‌ته‌وه‌یێن ئیكگرتی و رێكخراوان ماسته‌ر پلانه‌كا باش بۆ ئاڤه‌دانیا شنگال دانابوون، لێ په‌كه‌كێ و حه‌شدا شه‌عبی رێگریێ دكه‌ن و ناهێلن بكه‌ڤیته د وارێ بجهئینانێ دا و گۆت: زێده‌گاڤێ ل سه‌ر گوره‌كێ ب كۆم ل شنگال هاته كرن كو گۆره‌كێ ب كۆم هاتییه تێكدان، ژلایێ حكومه‌تا عێراقی ڤه ب نڤیساره‌كا فه‌رمێ مه ئیدارا پارێزگه‌ها مووسل ئاگه‌هدار كریه.
مه‌حما خه‌لیل، قایمقامێ قه‌زا شنگال راگه‌هاند: “ئیدارا شنگال به‌رنامه و ماسته‌ر پلانه‌كا باش بۆ ئاڤه‌دانیا شنگال دانابوو، لێ هه‌تا نها به‌رنامه و ماسته‌رپلانا ئاڤه‌دانیا شنگال نه‌چوویه د وارێ بجهئینانێ دا، ژبه‌ر كو ل شنگال چو قانوون نینن، به‌لكو په‌كه‌كێ و حه‌شدا شه‌عبی ده‌ستێ خۆ داناینه سه‌ر شنگال و ئاسته‌نگ بۆ زڤرینا قانوونێ ل شنگال دروست دكه‌ت، چونكو د به‌رژوه‌ندیا وان دایه ئاوارێن شنگال نه‌زڤرنه سه‌ر جهێن خۆ و په‌كه‌كه و حه‌شدا شه‌عبی ناهێلن شنگال بهێته ئاڤه‌دانكرن، دا كو شنگال هه‌ر بن ده‌ستێ وان دا بمینیت، له‌ورا ژی ئاسته‌نگان بۆ ئاڤه‌دانیا شنگال دروست دكه‌ن”.
ئاشكه‌را كر: “نوكه په‌كه‌كه و حه‌شدا شه‌عبی یێ هه‌موو هه‌ولا دده‌ن بۆ لاوازكرنا ده‌نگێن خه‌لكێ شنگال، له‌ورا ژی خه‌لكێ شنگال پێدڤییه نه‌هێنه خاپاندن، دا كو مافێن وان بهێنه ب ده‌ستڤه‌ئینان ل حكومه‌تا عیراقێ”.
خویاژی كر، “زێده‌گاڤێ ل سه‌ر گوره‌كێ ب كۆم ل شنگال هاته كرن كو گۆره‌كێ ب كۆم هاتییه تێكدان، ژلایێ حكومه‌تا عێراقی ڤه ب نڤیساره‌كا فه‌رمێ مه ئیدارا پارێزگه‌ها مووسل ئاگه‌هدار كریه ئه‌و كه‌سێن ده‌ست تێكدانا گۆرێن ب كۆمدا ل شنگال هه‌ین، پێدڤیه بهێنه سزادان و نابیت گۆرێن بكۆم بهێنه تێكدان”.
قایمقامێ قه‌زا شنگال، ئاشكه‌را كر كو: “دناڤ سه‌نته‌رێ شنگالێدا گۆره‌كێ بكۆم هاتیه تێكدان، ئه‌ڤ كارا ژلایێ هێزین عێراقی ڤه هاتییه كرن، ئه‌م دێ پتر دووڤچوونێ ل سه‌ر كه‌ین و گۆت: ل قه‌زا شنگال پتر 80 گۆرێن ب كۆم هاتینه دیتن كو ساله 2014ێ ژلایێ تیرۆرستێن داعش ڤه خه‌لكێ شنگال تێدا هاتینه گوله‌بارانكرن و چه‌ند گورێن ب كۆم یێن هاتینه ڤه‌كرن و ناسنامێن 104 رۆفاتێن ناڤ گۆرێن ب كۆم دا ئاشكرا بووینه و هێشتا ناسنامێن گه‌له‌ك قوربانیان ئاشكرا نه‌بووینه”.
