ئاستێ دادڤانێن كورد پێشكەڤتیە و پاشەرۆژەكا گەش هەیە
د دیدارەكا تایبەت دا زەید سامر دادڤانێ نێڤدوەلەتی یێ یارییا فوتبۆلێ د خولا ستێرێن ئیراقێ دا دیار كر، ئەو یێ هاتییە داخوازن كرن بۆ ڤاڤارتنێن ئۆلمپیادا و پەسنا دادڤانێن كوردستانی دكەت و دخوازیت بەردەوامبن ل سەر ئاستێ خوە.
زێدەتر ناڤهاتی بۆ رۆژنامەیا ئەڤرۆ گۆت: ل سالا 2008ێ هاتبوومە دەستنیشانكرن د پرۆژەیێ دادڤانێن پاشەرۆژێ ل كێشوەرێ ئاسیا ئەوا ل وەلاتێ قەتەر هاتبوو ئەنجامدان، د هەموو تاقیكرنێن خوە دا یێن تیۆری و پراكتیكی ب سەركەڤتم، دووڤە بۆ سێ سالان پشكداری ئەزموونەكا تایبەت یا درێژ بووم ل وەلاتێن قەتەر، مالیزیا، مالدیڤ و چاپانێ، پشتی تاقیكرنێن دووماهیێ ژی ژلایێ فدراسیۆنا فوتبۆلا ئاسیا بۆ ئەزموونەكا نوو یا ئۆرۆپا هاتمە ژێگرتن ل 2014ێ بۆ وەلاتێ ئنگلتەرا، ل 2017ێ بفەرمی شارا دادڤانێ پیشەكار ل ئاسیا هاتە دەستنیشانكرن، داخوازكرنا من بۆ ئۆلمپیادا كەیفخوەشكریمە ئەوچەندە ژی هات پشتی شیام ب سەرفەرازی یاریێن كۆپا ئاسیا یا لاوان بڕێڤەببەم.
ژلایەكێ دووڤە زەید سامر پەسنا دادڤانێن هەرێما كوردستانێ دكەت و گۆت: هەرچەندە هژمارا وان یا كێمە لێ رۆلەكێ گەلەك باش هەیە و ئاستێ دادڤانێن كورد پێشكەڤتییە و یێن گەنج پاشەرۆژەكا گەش ل پێشییا وانە، ژبەركو تایبەتمەندی و شیانێن دادڤانیێ هەنە نموونە ئەدهەم و توانا، هیڤییا من ئەوە بەردەوامبن ژبۆ خزمەتا وەرزشا كوردستانێ و ئیراقێ.
ل دۆر سیستەمێ ڤارێ ناڤهاتی گۆت: ئاستێ گشتی یێ دادڤانان بەر ب پێشڤە دچیت ب هاریكارییا سیستەمێ ڤار كو گەلەك شاشیێن دناڤ یاریگەهێ دا بەرچاڤكرینە و بڕیار ل دووڤ ڕێنمایان داینە، ڕاستە گیرۆبوون د هندەك بڕیاران داهەیە ئەڤە ژی ژبەركو ئەو شارەزاهییا كێم یا هندەك دادڤانان و هندەك جاران ئاریشەیێن تەكنیكی هەنە، نە بدەستێ مەنە، بۆ وەرزێ بهێت من باوەری هەیە دێ باشتر بیت و دادڤانێن مە هەموو بەر ئاست بلندیێ دچن.
