ئاشتی هیدایەت: پەیاما هونەری گەشبینیە و گەهاندنا وان گۆتنایە یێن د ناخێ من دا نەهاتینە گۆتن
ئەڤرۆ
زنـار تـۆڤی:
مۆزیكژەن و سترانبێژ ئاشتی هیدایەت، كو ژەنیارێ ئامیرێ عۆدێ یە، د دیدارەكێ دا بۆ رۆژناما ئەڤرۆ دبێژیت: من گەلەك كار و هزرێن هونەری هەنە، بەلێ بۆ من ئەو دەلیڤە چێنەبوویە وان كاران ئەنجام بدەم، هەروەسا نەبوونا وێ دەلیڤێ ژی ڤەدگەریت بۆ هندێ، كو كارێن هونەری ب تایبەتی د بیاڤێ مۆزیك و سترانێ دا بۆ هونەرمەندی د گرێداینە ب لایەنێ دارایی ڤە، بۆ بەرهەمئینان و پێشكێشكرنا بەرهەمێن هونەری و د نوكە دا من ئەو پشتەڤانی نینە، كو ئەز كارێن هونەری بەرهەم بینم.
ناڤهاتی ئەو چەند ژی گۆت: هونەر پەیاما ئازار و گەشبینیێ و گەهاندنا وان گۆتنانە یێن دناخێ من دا نەهاتینە گۆتن، هەروەسا ئامیرێ عۆدێ ژی هەستێ بەردەوامیێ و دیتنێ بۆ ئارمانجێن بەردەوام یێن دوور مەودا د بەخشیتە ژیانا من، دیسان دەمێ مرۆڤ دگەهیتە ئاستەكێ باش و خوە نیاسینێ و ئەو بیاڤێ كو مرۆڤ هەست پێ دكەت دشێت د وی بیاڤی دا سەركەفتنێ بینیت و دناڤا جڤاكی دا دهێتە نیاسین و مرۆڤ دشێت خزمەتا حڤاكێ خوە بكەت، لەوما من ئامیرێ عۆدێ هەلبژارت و ئەز ل گەل مەزن بوویمە، هندی ئەز بشێم ب رێیا ئامیرێ عۆدێ و سترانان دێ خزمەتا هونەرێ كوردی یێ رەسەن كەم.
ئاشتی هێشتا دبێژیت: ل سالا 1987 ێ، ئەو ژ دایكبوویە و ئامیرێ عۆدێ دژەنیت، ئاوازدانەر و سترانبێژە، باوەرناما دبلۆمێ د بیاڤێ (مۆزیكێ) دا ل سالا 2002 ێ ب دەستڤە ئینایە و دەست ب كارێ هونەری كریە، هەروەسا وی رۆلەكێ پشكدار و كاریگەر د دامەزراندنا چەندین گرۆپ و سەنتەرێن هونەری دا هەبوویە، ل سالا 2000 ێ، وی دەست ب گۆتنا سترانان كریە، هەتا نوكە چەندین ستران و كلیپ تۆمار كرینە، بەلێ هێشتا وی چو ئەلبۆم چێنەكرینە، بۆ ئەڤ سالە ژی وی لبەرە هندەك كارێن دیتر یێن هونەری تۆمار بكەت و ل دووڤ گۆتنا وی د نوكە دا چێكرنا كلیپان ژ چێكرنا ئەلبۆمان باشترە.
