ئاشنا بابان: كاریگه‌ریێن ده‌ره‌كی ل سه‌ر پێكئینانا حوكمه‌تا ئیراقێ یێن هه‌ین
هه‌ولێر، قائید میرۆ
هێشتا شێوازێ پێكئینانا حوكمه‌تا نوو یا ئیراقێ دیار نینه و وه‌ك چاڤدێر دبێژن، ئاسته‌نگێن زۆر ل هه‌مبه‌ر وێ پڕۆسێ یێن هه‌نین، شرۆڤه‌كاره‌كا سیاسی ژی راگه‌هاند، ده‌ستێن ده‌ره‌كی و ئیرانێ و ئه‌مریكا رۆل د پێكئینانا حوكمه‌تا ئیراقێ دا یا هه‌ی و حوكمه‌تا نوو دێ هه‌ر وه‌كو حوكمه‌تێن بۆری بیت ل ئیراقێ.
ئاشنا بابان، شرۆڤه‌كارا سیاسی بۆ رۆژناما (ئه‌ڤرۆ) گۆت” ئاریشه ل هه‌مبه‌ر پڕۆسا پێكئینانا حوكمه‌تا نوو یا ئیراقێ هه‌یه و ڤێ چه‌ندێ ره‌نگڤه‌دان ل جاده‌یا ئیراقێ هه‌یه، بتایبه‌تی ئه‌و لایه‌نێن د هه‌لبژارتنێن ڤێجارێ دا سه‌رنه‌كه‌فتین هه‌لویسته‌كێ نیگه‌تیڤ نیشاندایه و خه‌لكێ ئیراقێ هاندده‌ن بۆ تێكدانا ره‌وشێ ، هه‌تا موقته‌دا سه‌در په‌یامه‌ك هنارتیه بۆ ولاتێن هه‌رێمی و ئیرانێ كو ده‌ست دكاروبارێن ئیراقێ وه‌رنه‌ده‌ن، حوكمه‌تا ڤێجارێ مینا حوكمه‌تێن بۆری یا بێ ئاسته‌نگ نینه، ژ به‌ر كو ئالۆزیێن زۆر دناڤا لایه‌نێن سیاسی و پێك هاتێن ئیراقێ دا یێن هه‌ین، له‌وڕا ل ده‌ستپێكێ پێدڤیه لایه‌نێن ئیراقی بگه‌هنه رێككه‌فتنێ و پاشی ده‌ست ب پڕۆسا پێكئینانا حوكمه‌تێ دبهێته كرن، ئه‌ڤه‌ژی كاره‌كێ ب ساناهی نینه و ده‌م پێدڤیه بۆ رێككه‌فتنا لایه‌نێن سیاسی لدۆر پێكئینانا حوكمه‌تێ”.
گۆت ژی” كاریگه‌ریێن ده‌ره‌كی ژی هه‌نه لسه‌ر لایه‌نێن ئیراقێ بۆ پێكئینانا حوكمه‌تێ، بۆ نموونه موقته‌دا سه‌در دبێژیت، دڤێت سه‌رۆك وه‌زیرێن داهاتی ژ لیستا من بیت، گرۆپێ نووری مالكی ژی دبێژن مالكی دێ بیته سه‌رۆكێ حوكمه‌تا ئیراقێ، بێگومان ئه‌ڤه لبن كاریگه‌ریا لایه‌نێن ده‌رڤه‌یه، ب تایبه‌تی ناهێته ڤه‌شارتن ده‌ستێن ده‌رڤه ب ئاشكرا ل پشت لایه‌نێن شیعی هه‌نه، راسته ئیراقێ سه‌روه‌ریا خوه یا هه‌ی، به‌لێ ده‌ستێوه‌ردان د كاروبارێن ئیراقێ دا یا هه‌ی و ئیران و ئه‌مریكا كاریگه‌ریا مه‌زن لسه‌ر ره‌وشا ئیراقێ یا هه‌ی، هه‌تا ئالۆزیێن د ناڤا جڤاتا نوونه‌رێن ئیراقێ دا ئه‌مریكا یا ل پشت ، چونكه ئه‌مریكا دخوازیت كه‌سه‌كێ د به‌رژه‌وه‌ندیا ئه‌مریكا دا ببیته سه‌رۆك وه‌زیرێن ئیراقێ، ئیرانێ ژی هه‌مان تشت دڤێت”.
ئاشنا بابان ئاماژه‌كر” ره‌وشا ئیراقێ یا جهگیر نینه، نه‌شێم بێژم حوكمه‌تا داهاتی یا ئیراقێ دێ حوكمه‌ته‌كا لاوازبیت، به‌لێ بێگومان هێشتا چو حوكمه‌تێن جهگیر و بهێز ل ئیراقێ نه‌هاتینه پێكئینان، چونكه هێشتا هێزێن چه‌كدار یێن هه‌ین كو وان ده‌ستهه‌لات ب سه‌ر حوكمه‌تێ دا یا هه‌ی، هێز و لایه‌ن هه‌نه كو رۆلێ وان یێ مه‌زنتره ژ حوكمه‌تێ، ئه‌ز باوه‌رم پشتی چه‌ندین سالێن دی پڕۆسا هه‌لبژارتنان یا به‌رده‌وامبیت ئیراق دێ بیته خودان حوكمه‌ته‌كا بهێز و موكم، هێشتا زوویه بێژین دێ ئیراق بیته خودانا حوكمه‌ته‌كا بهێز و حوكمه‌تا داهاتی ژی باشتر نابیت ژ حوكمه‌تێن به‌ری نوكه ل ئیراقێ هاتینه پێكئینان”.
