ئاشنا عه‌بدولا: سبه‌ی لیژنه په‌روه‌ردێ لدۆر وه‌رگرتنا قوتابیێن 12ی ئاماده‌یی دێ كۆمبیت
كریا خواندنێ دێ ئه‌ڤساله‌ژی هێته كێمكرن
هێشتا پلانا وه‌رگرتنا قوتابیان ل زانكۆ په‌یمانگه‌هان نه‌هاتیه ئاشكراكرن لیژنا په‌روه‌رده و خواندنا بلندژی سبه‌ی رۆژا سێ شه‌مبی لدۆر وه‌رگرتنا قوتابیان دێ كۆمبیت ئه‌ندامه‌كا لیژنێ ژی ئاشكراكر، ئه‌ڤساله دێ كریا خواندنێ ل زانكۆ په‌یمانگه‌هێن حوكمه‌تێ هێته كێمكرن و دبێژیت، سیسته‌مێ وه‌رگرتنا قوتابیان پێدڤی ب پێداچوونێ هه‌یه و دڤێت هنده‌ك حه‌زێن قوتابی ژی بۆ خواندنێ به‌رچاف بهێنه وه‌رگرتن.
ئاشنا عه‌بدلا، ئه‌نداما لیژنا په‌روه‌رده و خواندنا بلند بۆ رۆژناما ئه‌ڤرۆ دیاركر” بڕیاره سبه‌ی رۆژا سێ شه‌مبی لیژنا په‌روه‌ردێ و خواندنا بلند لپه‌رله‌مانێ كوردستانێ دێ كۆمبیت و بابه‌تێ كۆمبوونێ ژی پرسا وه‌رگرتنا قوتابیێن ده‌رچوویێن 12ی ئاماده‌یه ل زانكۆ په‌یمانگه‌هێن هه‌رێما كوردستانێ، لیژنه دێ سه‌ره‌دانا وه‌زاره‌تا خواندنا بلند و ڤه‌كۆلینێن زانستی ژی بكه‌ت، هه‌تا ئاگه‌هداربین و بزانین ئه‌ڤساله پلانا وه‌زاره‌تێ چاوا هاتیه به‌رهه‌ڤكرن بۆ وه‌رگرتنا قوتابیان، چونكه خویایه سالانه هژمارا قوتابیێن ده‌رچوویێن پۆلا 12ی ئاماده‌یی زێده دبیت، چونكه سالا بۆری ژی مه تێبینی لسه‌ر وه‌رگرتنا قوتابیان هه‌بوویه و ئه‌ڤساله ژی دڤێت وه‌زاره‌ت پلانا خۆ ئاشكرابكه‌ت، هه‌تا بزانین چه‌ند هزار قوتابی دێ هێنه وه‌رگرتن ل زانكۆ په‌یمانگه‌هان، هه‌روه‌سا شێوازێ وه‌رگرتنێ دێ چاوابیت، ژبه‌ركو تاقیكرنێن خۆلا دویێ نه‌هاتینه ئه‌نجامدان و بڕیاره ده‌ستپێكا هه‌یڤا ئیلوونا داهاتی ئه‌وژی بڕێڤه‌بچن و پشتی ده‌ركه‌فتنا ئه‌نجامان دێ وه‌زاره‌ت شێوازی وه‌رگرتنا قوتابیان دیار كه‌ت، ئه‌مژی وه‌ك لیژنه دێ دوفچوونێ بۆ ده‌رچوونا قوتابیان كه‌ین و چاوانیا سیسته‌مێ وه‌رگرتنێ ژی دێ هێته ئاشكراكر.
ئه‌ڤێ ئه‌نداما لیژنا په‌روه‌ردێ و خواندنا بلند ئاماژه‌كر” بتایبه‌تی هژماره‌كا زۆرا قوتابیان دو سالێن بۆری گوره‌ی سیسته‌مێ پارالێل هاتینه وه‌رگرتن، ئه‌م دگه‌ل وه‌رگرتنا ئه‌ڤی پاره‌یێ زۆر نینه بۆ خواندنێ ب سیسته‌مێ پارالێل، قوتابی بهه‌ر حال هه‌تا قۆناغا دوازدێ دوماهی دئینیت و قه‌یران و نه‌بوونا كاری ژی هه‌ر یا زێده دێ چاوا قوتابی شیان هه‌بن خواندنا زانكۆ په‌یمانگه‌هێن سه‌ر ب حوكمه‌تێ ژی هه‌ر پاره‌ی بده‌ت، پاره‌یه‌كێ زۆر ل قوتابی تێته وه‌رگرتن بۆ سیسته‌مێ پارالێل و ئێڤاریان پێدڤیه پێداچوون بۆ بهێته‌كرن، سالا بۆری لسه‌ر داخوازامه وه‌كی په‌رله‌مان داشكاندن بۆ كریا خواندنێ هاته‌كرن، ئه‌ڤساله‌ژی دێ داشكاندن هه‌بیت و كریا خواندن وه‌كی هاتیه دیاركرن نابیت، ژبه‌ركو دڤێت ره‌وشا ئابوورا وه‌لاتیان و قوتابی به‌رچاف بهێته وه‌رگرتن، هه‌تا مه شیان هه‌بن دێ كار بۆ كێمكرنا پاره‌ی كه‌ین، هه‌گه‌ر ئه‌وژی ئه‌ڤساله نه‌هاته‌كرن دێ وه‌كی دو سالێن بۆری داشكاندن بۆ هێته‌كرن، هه‌تا قوتابیێ هه‌ژار بشێت درێژیێ ب خواندنا خۆ بده‌ت و لسه‌ر پاره‌ی نه‌مینیت.
ئاشنا عه‌بدولا گۆتژی” ئێك ژ ئاریشه‌یێن وه‌رگرتنا قوتابیان ل زانكۆ په‌یمانگه‌هان نمره‌یا وه‌رگرتنێ یه، واته قوتابی لسه‌ر بنه‌مایێ نمره‌یێن پۆلا دوازدێ تێته وه‌رگرتن و هنده‌ك جاران قوتابی نه‌ڤێت ل پشكه‌كێ بخوینیت، به‌لێ سیسته‌م نه‌چاریه ژبه‌ركو نمرا ئه‌ڤی قوتابی بۆ ئه‌ڤێ كۆلیژێ یان پشكێ هاتیه دیاركرن تنێ ماف هه‌یه ل ئه‌ڤێ پشكێ بخوینیت، هێشتا وه‌لاتێ نه‌گه‌هشتیه ئه‌ڤی ئاستی حه‌زا قوتابیێ ده‌رچووی به‌رچاف بهێته وه‌رگرتن، سبه‌ی وه‌زاره‌تا خواندنا بلند بڕیارێ بده‌ت بێژیت هه‌موو قوتابیه‌كی ماف هه‌یه بۆ نموونه ل كۆلیژا نۆشداری درێژیێ ب خواندنێ بده‌ت هه‌موو قوتابی دێ پێشكه‌شی ئه‌ڤێ كۆلیژێ بكه‌ن، واته وه‌رگرتنا قوتابیان گرێدایی جڤاكێ مه‌ژی هه‌یه، بێگومان پێدڤیه سیسته‌مێ وه‌رگرتنا قوتابیان بهێته گۆهڕین، به‌لێ هێشتا چو پێنگاڤ بۆ نه‌هاتینه هاڤێتن و ئه‌ركێ وه‌زاره‌تا خواندنا بلند و ڤه‌كۆلینێن زانستیه ئه‌ڤێ ئاریشێ چاره‌سه‌ر بكه‌ت و سیسته‌مه‌ك بهێته بجه ئینان هنده‌ك حه‌زو ئاره‌زوویێن قوتابی ژی تێدا هه‌بن.
