ئافره‌تا ئێكێ یه ل سه‌ر ئاستێ پارێزگه‌ها دهۆكێ بوویه رێڤه‌به‌را رادیۆیێ
سێمێل، دلڤین ره‌شید:
ئه‌میرا گوران، رێڤه‌به‌را رادیۆیا به‌رده‌ره‌ش، د دیداره‌كێ دا بۆ رۆژناما ئه‌ڤرۆ گۆت: سه‌ربۆرا من ل گه‌ل كارێ راگه‌هاندنێ ژ سه‌نته‌ره‌كی ره‌وشنبیری ده‌ستپێكر ل به‌رده‌ره‌ش، ل وی ده‌می به‌رپرسێ سه‌نته‌ری پشته‌ڤانیا مه‌دكر ئه‌م تشتی بنفیسین و گرنگیێ ب خواندنێ بده‌ین، ئه‌ز ژی به‌ردوام بووم ل سه‌ر نڤیسینا هه‌لبه‌ست و بابه‌تان، ئه‌ڤێ یه‌كی ئه‌ز پالدام نێزیكی كارێ راگه‌هاندنێ ببم، هه‌ر ژ زارۆكینی ئه‌ز گوهداره‌كا باش بووم ژ بۆ رادیۆیێ.
هه‌روه‌سا گۆت: ئه‌ڤه چه‌ندین سالن ئه‌ز ل بۆارێ حزبی و ره‌وشنبیری دا كاردكه‌م و ل ده‌ڤه‌را به‌رده‌ره‌ش كێم ژن هه‌نه كاربكه‌ن دڤان بۆاراندا، ژبه‌ر هندی ژی ئه‌ز وه‌ك كادره‌كا پارتی وان ب فه‌ر دیت كو ژنه‌ك ببیته رێڤه‌به‌را رادیۆیێ، سوپاس بۆ وێ باوه‌ریا وان دایه من كو ئه‌ز وه‌ك ئێكه‌م ژن ل سه‌ر ئاستێ پارێزگه‌ها دهوكێ بوویمه رێڤه‌به‌را رادیۆیا به‌رده‌ره‌ش و هه‌بوونا من وه‌ك رێڤه‌به‌را رادیۆیێ كارتێكرنا خوه هه‌بوو ل سه‌ر ئافره‌تێن ده‌ڤه‌رێ كو ئه‌وژی وێ وێره‌كی بده‌نه خوه و بهێنه دناڤ كارێ راگه‌هاندنێ دا، چنكو ل ده‌ڤه‌را مه كێم ئافره‌ت هه‌نه د ڤی بۆاری دا كار بكه‌ن، ئه‌گه‌ر ژی ڤه‌دگه‌رن بۆ وێ چه‌ندێ كو هێشتا ل ده‌ڤه‌را مه شه‌رمه ئافره‌ت كارێ راگه‌هاندنێ بكه‌ت، به‌لێ نوكه من چار كارمه‌ندێن ئافره‌ت هه‌نه جهێ خوه دناڤ رادیۆیێ دا كرینه و هیڤی خوازم ژ هه‌ر ئافره‌ته‌كی چ جاران ده‌ست به‌رداری هیڤی و ئارمانجێن خوه نه‌بن و به‌رده‌وام بن هه‌كه د ژیانێ دا چه‌ند ئاسته‌نگ ژی هه‌بن خۆدان ئیراده و باوه‌ریه‌كا ب هێز بن، ب تایبه‌ت ژی د كارێ راگه‌هاندنێ دا، چنكو چ جوداهی د ناڤبه‌را هه‌ردو ره‌گه‌زان دا دكاری دا نینه.
