ئافره‌تێن دهۆكێ ب لاوازیا دارایی دێ پشكداری خولا ئیراقێ بیت
ئه‌ڤرۆ،
دهێته چاڤه‌ڕێ كرن ل ئه‌ینیا بهێت تیما فۆتسالا یانه‌یا ئافره‌تێن دهۆكێ پێنگاڤا خوه یا ئێكێ د خولا ئیراقێ دا وه‌كو نوونه‌را پارێزگه‌هێ بهاڤێژیت ئه‌وا بڕیاره هه‌ڤڕكیێن وێ ب شێوه‌یێ خول دو قۆناغ ب پشكداریا حه‌فت یانه‌یان كو حه‌فتیێ ئێك گه‌ڕ بهێته كرن.
د گه‌ڕا ئێكێ دا ئافره‌تێن دهۆك دێ بیته مێڤانا ئافره‌تێن به‌غدا، ژ یاریێن دی زه‌ورا و تیجاره، جه‌ویه و ره‌واندۆ، یانه‌یا نه‌فت ئه‌لشیمال دێ یا چاڤه‌ڕێ بیت.
ل دۆر دووماهی به‌رهه‌ڤیێن نوونه‌را پارێزگه‌هێ زنار زوبێر جێگرێ سه‌رۆكێ یانه‌یا ئافره‌تێن دهۆك بۆ رۆژناما ئه‌ڤرۆ گۆت: دبیت بۆ وه‌رزێ ئه‌ڤ ساله شیانێن هه‌ڤڕكیێ مه نه‌بیت ژبه‌ر كۆمه‌كا ئه‌گه‌ران ژ وانا به‌رهه‌ڤیێن كێم كو بتنێ ئه‌ڤه سێ رۆژه ده‌ستپێكری و شیانێن دارایی یێن لاواز بتنێ ژێده‌رێ پشته‌ڤانیێ ژلایێ كارگێریا پارێزگه‌ها دهۆكێ وه‌كو مینحه‌كا هه‌یڤانه بۆ هه‌موو یانه‌یێن پارێزگه‌هێ هاتیه دان و ئه‌م بتنێ سێ ملیۆن و پێنچ شه‌د هزار دیناران وه‌ردگرین ئه‌ڤ كۆژمه هه‌موو پێدڤیێن مه چاره‌سه‌ر ناكه‌ت، لێ ژبه‌ركو ئه‌م ناهێلین ده‌لیڤه‌یا خولا ئیراقێ ژ ده‌ستێن یاریزانێن مه بچیت كارگێریا یانێ هه‌موو بزاڤ كرینه پشكداریێ بكه‌ین ل دووڤ شیانێن به‌رده‌ست و هه‌رده‌م مه شیان نه‌ما دێ وی ده‌می نه‌چاربین بڕیاره‌كا نه چاڤه‌ڕێ كر بده‌ین.
ناڤهاتی ئه‌وچه‌نده ژی دیار كر تیما وان ب كادرێ راهێنانێ و پرانیا یاریزانان كچێن پارێزگه‌هێ نه ژبلی دو پیشه‌كارێن وه‌لاتێ ئیرانێ و ئێكا عه‌ره‌ب ئه‌ڤچه‌نده پێخه‌مه‌ت زێده‌تر مفا ژ شیانێن وان وه‌ربگرین تایبه‌ت یاریزانێن مه، هه‌رچه‌نده وه‌كو تیمه‌كا پشكداربین لێ هه‌ر یاریه‌كا دكه‌ین ژبۆ سه‌ركه‌فتنێ و هه‌ڤڕكیێ بیت.
