ئافره‌تێن دهۆكێ خوه ژ خولا ئیراقێ ڤه‌كێشا
ئه‌ڤرۆ:
د داخویانیه‌كێ دا سه‌رۆكا یانه‌یا ئافره‌تێن دهۆكێ بۆ رۆژناما ئه‌ڤرۆ دیار كر ئه‌وان ب فه‌رمی خوه ژ خولا ئیراقێ یا فۆتسالێ ل سه‌ر ئاستێ یانه‌یێن پلا نایاب ڤه‌كێشا پشتی ئێكه‌تیا ته‌پا پێی یا ئیراقێ داخوازا وان ب جه نه‌ئینایی.
زێده‌تر جریسك یۆنس گۆت: هه‌رچه‌نده ب هه‌موو شێوه‌یه‌كی مه نه دڤیا ب گه‌هیته ڤێ قۆناغێ لێ ژبه‌ر زولما ل تیما مه هاتیه كرن ئه‌م نه‌چاربووین مه بڕیاره‌كا بڤی ره‌نگی بده‌ین كو ب فه‌رمی تیما خوه ژ خولا فۆتسالا پلا نایابا ئیراقێ ڤه‌كێشین، مه ب فه‌رمی داخوازا مافێ تیمێ كربوو ژبه‌ركو ئه‌و شاشیا چێبوویی ژلایێ لژنا فۆتسالێ ل ئێكه‌تیا ئیراقێ بوو، ئه‌و رێنمایێن د كۆمبوونا هۆنه‌ری دا هاتینه ده‌ركرن ئه‌م ئاگه‌هدار نه‌كربووین ل سه‌ر بابه‌تێ یاریزانێن پیشه‌كار.
هه‌روه‌سان ناڤهاتی دیاركر به‌ری ده‌ستپێكرنا خولێ ئه‌وا به‌رهه‌ڤیێن باش كربوون و دو یاریزانێن پیشه‌كار و چه‌ند یاریزانه‌كێ باش هه‌بوون لێ ژ نشكه‌كێ ڤه د ده‌مێ یاریا ئێكی یا خولێ ل گه‌ل یانه‌یا كچێن به‌غدایی سه‌رپه‌رشتێ یاریێ نه‌هێلا ئه‌م ب دو یاریزانێن پیشه‌كار پشكداربكه‌ین ب بۆهانا هندێ رێنما رێكێ دده‌ته بتنێ ئێك یاریزان پشكداربیت، سه‌رباری ب رێیا تله‌فۆنێ لژنا فۆتسالێ مافێ پشكداریێ دابوو دو یاریزانان پشتی مه چه‌ندین بزاڤكرین لێ ژبه‌ر شاشیا لژنا فۆتسالا ئیراقێ ئه‌م بێ به‌هركرین، له‌وما ژبه‌ر بێ سه‌رۆبه‌ری و گوهۆڕینا بڕیاران ژ نشكه‌كێ ڤی مه بڕیارا دووماهیێ دا و تیما خوه ڤه‌كێشان و ئه‌و یاریزانێن مه ب نڤێسارێن ده‌ستبه‌رداریێ به‌ر ب یانه‌یێن دی چوون.
بۆ زانین ل حه‌فتیا بۆری یانه‌یا ئافره‌تێن دهۆكێ نێڤسارا فه‌رمی داخواز كربوو لژنا فۆتسالێ ل ئیراقێ ئه‌نجاما یاریا ئێكێ ل گه‌ل كچێن به‌غدا ب هه‌لوه‌شینیت ئه‌وا ب خوساره‌تیا ئافره‌تێن دهۆكێ هاتیه هژمارتن و ژڤانه‌ك بۆ یاریێ بهێته دیاركرن لێ ئه‌ڤ داخوازیه هاتبوو ره‌دكرن.
